یاڎەوەریێ چەنی ڕەفېقێ کۊنی
چی ڕووانە پۆستیوی کاک سێفەدینیم جە (گروپچاتوو خەڵکو بەڵخەی)ەنە جە بارەو (کاک عومەری)ۆ وەرچەم کۆت، حەتا تێکستم گەڵاڵە کەرد، نە یاوانی پورە جە وەختو ویشەنە بەشدار بوو . پۆکەی حەزم کەرد یاذو یادگاری ئا کەسایەتیە بەرزو میهرەبانەیە لاو ویمۆ وەزنووەرە.
ویرما ئەگەر سەهوە نەبوو یانەو مامو مسەفای ساڵەو (1963_ 1964)ئامێوە، چاوەختەنە هیشتا مەکتەبو بەڵخەی دماو ئینقیلابوو 1958 یۆ نەکریابیوە. یانەما نزیک بئ، چەنی کاک سێفەدینی ئاموشۆما بئ، کاک عومەریچ کە جە ئیمە کەمیو گۆرەتەر بئ، پیسەو فرەو گەنجا تەری بیبەش بیەبئ جە ئیدامەو وانای.
جە نەبیەو مەکتەبی کاک عومەر وردە وردە ئەیی لا تاتێمو شاگرد خەیاتی کەرئ. پاسە ویرمەنە مەنە بوو زیاتەر ئا وەختا بئ کە کوچما باخەنە بئ. ئینەش پەنە نەشی فیرو خەیاتی بیو، یانەنە دەسش بە هەرمانئ کەرد.
کاک عومەر ئەهلو مزگیو جەماعەتی بئ، ڕەوشت بەرزو، ڕوحسوکو، پاکوتەمیزو ڕاستگۆ بئ. جەنی ئانەیچە ئینسانیوی مەدەنیو (شارەسانی)بیو دەرکو دەریافتش مەزبوت بئ.
دەگایچەنە جە ئی بانو ئۆبان کەردەیو جوڵانەو کوڵاناو توپقاڕنیو یان بەعزە گەمە درشتاو تاقم وەش کەردەیو زۆرانبازیا، ویش بە دوور گیری. بەڵام حەر پیسە سروشتە خۆڕسکەکەو ویش تەنیا بە نەرمە گاڵتیو وەیان بە قللە وەشەکەو وێش، ئەگەر بەشداریوش کەردەبیێ.
ئانەبئ ئیمە یانەما فاڕیاوە پێ ملەگای، کاک عومەریچ یو جە دوکانەکاو کاک عەبدڵڵاو حاجی عەزیزیش گیرت بە کرئ. فرەو جارا لوینئ لاشۆ نیشینیرە، ئاذ مەشغوڵو هەرمانیو منیچ گوشگیرینئ پێ ڕادیۆکەیش، کە زیاتەرسەرو بەشەو کوردی ڕادیۆ بەغایۆ فرەتەر گورانیی وەشئ وەنینیرە.
خسڵەتیوو تایبەتو کاک عومەری، یەک نەواختیش بئ، هەمیشە بە زەردەخەنەوە قسی کەرئ، ئیتر پیا نەزانئ کەی توڕەن وە یان کەی مەزاجش یاگی ویشەنە نیا. دڵو دەرونش حەتا واچی پاک بئ، باسو خواستئ مەنفییش نەبینئ، پۆکەی ئینسان نزیکشەنە بە تەمامی هەست بە ئارامشی کەرئ.
دیارا گەنجئ جە دۆرەو هەرزەکارییەنە فرەو جارا خوذی مذانە عەشقو شیعرو گورانییو موسیقای. منیچ چی بارۆ خولیێوم بیو، عالیچ لاسانیی کەرینێ. بەتایبەت گورانیکاو حەسەن گەرمیانی. چن جار ڕووەش دێنە کە ئەگەر یووە جە گورانیەکاش سەرۆ بیێ، یان ئینا لیستو گورانیە داواکریەکانە، یوو جە زاڕوڵەکاو کاک عەبدڵڵی کیانی شوونیم.
من پێ وانای لوانی سڵیمانیو، دماتەر بەڵخە بارکریا، خەڵکەکەش هەر یو کۆت یاگیو. پەیوەندیەکیچ چەنی وەختی کاڵئ بیێ. دماتەر من حەر فرەتەر دوورکۆتاوە. نمێوە یاذم کە ئەگەر دماو بارکەردەی کاک عومەرم دییە بووە.
یاذو یادگارو ئا ئینسانە بەرزەیە باقی بوو، ڕووحو ڕەوانش چەنی ماباقی شەهیذاو بەڵخەی بە بەهەشتی بەرینی شاذ بوو ئنشەڵڵا.
فاروق سان ئەحمەڎ. [1]