چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و هەشتا و یەرەمە
واتم: من شوېعی نییەنان.
ماچۊ: من زانو، تاکو ئیسە ویس کەسې پېسە تۊیش منەرە کیاستېنې پەی سووریەی.
تەلەفونش هۊرگېرت: شېخ شەعلان! یۊم هەن سەوای میاونیش کۊمپانیاکانو من! مەشۊم کەسیچ نەگېرۊش، ماچۊ: ئېشەو مېمانو من بە!
منیچ واتم: ملو ئۊتیلە.
ماچۊ دەسا سەوای دەمئەژمار هەشت بۊ پەی مەکتەبەکەیم.
سەعات هەشت و چارەک ماشینێ ڕەنگ شەرابی تازە وەربەرەنە مدرا. شېخ عەرەبێ عەگاڵ بە سەر، چڕیاش، ماچۊ: سوار بە! ڕوەو سوریە کۆتڕا. پاڵو چایخانەو کەسکیرە ئامایمې. ئا پۊلیسې کە وەڵتەر گېرتەبېناشا ڕیزی بیېبېنې و سەرجەم حورمەتشان پەی سەیارەکەو شېخې ئەرمانا. یاوایمې سیایانەو شېخی؛ نانو نیمەڕۊیم وارد. بە قولەسیاوێش وات بە ماشینو من بەرەش پەی بنکەو کۊمباینو تۆحەلەی. تۊحەلە ئېراقی بې؛ درەوەو خەڵکو سوریای کەرې. ئەرمەنیێ وەکیلش بې. تەحویلش وەرگېرتا. چن هەرمانبەرێ درونای و کۆمباینی چاگە بېنې کە چوارشان کوردې بېنې. (کۆمباین: مەکینەو درەوې)، شەوې سارانە مەنانێ، هەڵای نانو وېرەگای نەوریابې، پڕێنە بی بە سیمرخ سیمرخو هەرمانبەرا.
واتم: سەرو چېشی مەگژیەیدې ؟
ماچۊ: ئای ئا سەگبابە نما کەرۊ؛ یانی ئەها من جە شمە خاستەرەنان! بە خوڎا مەشۊم نماش ویربەرمێ! سەوای ساعبێ ساییقێ ئەرمەنی دلې خەلەیرە، بەرداش پەی (تربەسپی). تەرسەو ڕێم نەمەنە. لوانې دیوەخانو حاجۆی. قاوەچیێ چاگەبې. بە کوردی وېمانە پەرساش: کې ئینا یانەنە؟ کەی متاو حەسەناغای بوینو؟ فرە سەرو وې واتش: ئەز ب عەرەبی نزانم!
ئا ڕوە پەڼج شەممە بې. شەوەو جمعەی هیچ، سەوای ڕۊ شەممەی بە چەققە و هەرا و خرمەو پەیا چڵاکیانېرە. هەر کەس پارچە تفەڼگێ ژەنگنینیچش بې چېرو زەمینینە بەرش ئاردەبې، ڕروەو کەشی لوې.
واتم: خەبەر چېشەن؟
واتشان: قاچاخچی بە مەیې قاچاخېوە خاکو تورکیاینە بەرشییەن و جەندرمې نەتاوانشان بگېراش، ئامێنې مەیې دیرۆنێ (دەگێوە سووریا) بەران کە مڵکو یوسفو حاجۆی براو حەسەناغایەن. تەنیا تفەڼگێش بییەن. تەقەش ئەو جەندرمە تورکا کەردەن، چوار جەندرمې و ئەفسەرێش کوشتېنې و ترکې ڕەمێنې. تەرسی هەنە بە هېزێ فرۆ بگېڵاوە، ملمې یاردی یووسفی. جەمیل حاجۆ، کە براو حەسەناغای و کارو ڕەعیەتش ملەنە بې، چەنی یۊی هەرا و چەقێش بې مەپەرسە. جەمیلاغا ماچۊ: سەیدا (یانی مامۊسا) بڎیە ئی هەتیمەیە بادی مریچڵە کوشش ئاردەن، گرۊڵیەش ویس مەترې بڕ نمەکەرۊ ، ماچۊ ملو جەڼگو ترکا! پاسە چەنی بۊ؟
واتم: برا ترکی مزانی؟
ماچۊ: ئەی چەنی؟ دوې ساڵې سەربازو ترکا بییەنا.
منیچ واتم: جا کە پاسەن دلې سەنگەرینە بچڕە: برای جەندرمە! کوچێ ماریفەتت بۊن! بۊ وەردەمم تاکو مریچڵەکوشێت بنیەو پۆ!
کابرا ماچۊ: بزانە سەیدا چەنی خەتەش کېشتە؟! پاسەش وات و بې ئانەی لابکەرۊوە لوا. لوایمې دلې جەبهەکەی، پۊلیسې سوریېچ ئامێ. ئەفسەرەکەشان بە لاڵیایۆ ماچۊ: ئېمە ساحیبې ژەن و زاروڵەینمې؛ حەیفا کوشیەیمې. چەکەکېما چەنە وەربگېردې! ئېمەیچ بەردې پەی یانێوە. خوڎای یاونا، بیې بە ساحېبو ویس و یەک تفەڼگا، بەڵام جەڼگ نەخېزیاوەو بە قېخایی مامورا سنوری، کوشیارە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]