کورد دلې چەرخەکا تاریخینە
هۊرگېڵنای و ئاماڎەکەرڎەی: ئەسعەد ڕەشید
بەشەی: چوارسەڎ و نەوەڎ و نۊهەمە
* تاریخو (00-05-1994ز.) کوشیای جەلالو حاجی حسێن کەلۆشی، دلې شارو سلېمانینە کە گەرەکشبیەبې میانجی جەنگی براکوشی بکەرۊن، نامبریا ئەندامێ کۊنو کاژیکی بې و ساڵەو حەفتاکانە یۊبې جە ئەرەمەرزن و ئەندامە بەرزەکانو پاسۊکی و دماو هەشتاکا ماڕېش لاو یەکیەتی نیشتیمانی کورڎەسانیرە.
* تاریخو (00-05-1994ز.) سازنای کۊنیشتێ سەرو جەڼگی براکوشی پەی (کاوە غەریب)ی جە ئەمستەردام – هۊڵەندا، کە خەڵکی دلې کۊنیشتەکېنە بە ئاشکەرا دژمانی مەڎېنې بە هەر دوە تەرەفە جەنگکەرەکا.
* تاریخو (00-05-1994ز.) کوشتەی ڕېباز و حەسەن کوېستانی و جەلال محەمەڎ محیەدینی بە دەسو هېزەکانو پارتو دیموکراتو کورڎەسانی، کە هەریەرې ئەندامې بەرزې یەکیەتی نیشتیمانی کورڎەسانی بېنې.
* تاریخو (00-05-1994ز.) کاتو جەنگەکەو میانو یەکیەتی نیشتیمانی کورڎەسانی و پارتو دیموکراتو کورڎەسانی جە شارو هۆلېرې قیمەتو فەردێ ئاردا یاوا (80000) دینارې.
* تاریخو (00-05-1994ز.) بە درېژایی ئی مانگې قۊمیای جەڼگی براکوشی میانو یەکیەتی نیشتیمانی کورڎەسانی و پارتو دیموکراتو کورڎەسانی و بزوتنەوەی ئیسلامینە، دەنگوباسەکې پاسە مەیاونان کە (600 تاکو 2000) کەسېشان جە یۊترینی کوشتېنې).
* تاریخو (01-05-1994ز.) خېزیای جەڼگی براکوشی میانو هېزەکانو یەکیەتی نیشتیمانی کورڎەسانی و پارتو دیموکراتو کورڎەسانینە جە شارو قەڵادزې، کە تاکو مانگەو ئابو هەر ئا ساڵې سەرەمڕەبی.
* تاریخو (02-05-1994ز.) هۊتەرەو هېزەکانو یەکیەتی نیشتیمانی کورڎەسانی پەی سەرو بارەگاکانو پارتو دیموکراتو کورڎەسانی جە دلې شارو ڕانیەی، کە ئەنجامەنە دەسشان گېرت ملو بارەگاکاشارەو دوېشان دمای دیلکەرڎەی گرۊڵی واران کەردې، کە ئینې نامەکېشانې: ئەحمەد ساڵح بەگ (وەرپەرسو لقو ڕانیەی)، ئازاڎ محەمەڎ قادر.
* تاریخو (02-05-1994ز.) فەرەیدون عەبدولقاڎر و ئازاڎ بەرواری لوێ پەی دهۊکی، بە نیازو ئانەی ئاییرو جەنگو ناوچەکەی بکوشنارە.
* تاریخو (02-05-1994ز.) هېزەکانو یەکیەتی نیشتیمانی کورڎەسانی جە قەڵادزې، (19) نۊزڎە کەسې پارتیشان دیلې کەردې و دمایی گرۊڵیوارانشان کەردې، کە یۊ چانېشا عەلی حەسۆ میرخان بې، کە دمای کوشتەیش سەرو جادەکانو قەڵادزېرە کېشتشا شۊنەو ماشینیرە، ئینېچ نامې بڕێ تەریشانې: حەمەد عەبدوڵڵا ساڵح، ئەمیر عەبدوڵڵا ساڵح، خورشید ئەحمەد، محیەدین لەشکریانی، خانۆ مەجید وەلی، فەخری حەمەد ئیبراهیم خان.
* تاریخو (02-05-1994ز.) تاکو ئارۊ، داهاتو پانیشتو کورڎەسانی پی تەرزە دابەش مەکریې، سەڎەنە (35) پەی یەکیەتی نیشتیمانی کورڎەسانی، سەڎەنە (35) پەی پارتو دیموکراتو کورڎەسانی، سەڎەنە (15) پەی حکومەتو هەرېمی و سەڎەنە (15) پەی پارتەکانو تەرو کورڎەسانی.
* تاریخو (03-05-1994ز.) تاکو (02-07-1994ز.)، ئەچی ماوەنە پەرلەمانو پانیشتو کورڎەسانی هیچ نیشتەرێش نەکەرد، وەرو جەڼگو براکوشی.
* تاریخو (04-05-1994ز.) لوای کۊسرەت ڕەسول عەلی پەی لاو مەسعود بەرزانی پەی سەری ڕەشی بە (350) چەکدارېوە، پەی چارەکەرڎەو ناکۊکیەکانو میانو یەکیەتی نیشتیمانی کورڎەسانی و پارتو دیموکراتو کورڎەسانی.
* تاریخو (04-05-1994ز.) گېریای (11) یاڼزە ئەنداما پارتی و بزوتنەوەی ئیسلامی دلې شارو هەڵەبجەینە، بە دەسو هېزەکانو یەکیەتی، کە دماتەر گرۊڵیوارانشان کەردې، ژەن و زارۊڵەکې ئا کەسا ماچان کە وەر چانەی بکوشاشان ونەو لاشەیشا بەرئاردېنې، کە ئینې نامەکېشانې: فەریق تۆفېق عەلی (12) ساڵە، کەیکاوس محەمەڎ ڕەمەزان، کەمال عەبدوڵڵا نادر، فەیسەڵ غەفور محەمەڎ، نەوزاد غەفور محەمەڎ، فوئاد جەمیل، باقی قادر ڕەشید، ناتق عیزەت عەبدولکەریم، سدېق تەقی عەبدولڕەحمان، سەیفەدین ئەحمەد محەمەڎ.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید. [1]