چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و سېڼزەهەمە
من کە هیچ کەسێ نەشناسېنا، وېم و دەفتەر و قەڵەمێم کەردەبې خەبەرکیانو وېم! کەچەڵەکې، یەک چەمەکې، ئەشقەمە زلەکې و لووت لارەکا ئەژمارېنا، ئینجا قسەکاشا مەنویسېناوە: چن ماساویت گېرتې؟ گامېشت ئەسا؟ تازە جە بەغڎا گېڵانێ، لوانې پەی زیارەتو کەربەلای، هەرچی مەواچېنې مەنویسېناشۆ..
شەوێشا پەیمانکار ئاما کە بە هەرمانبەرەکانی بواچۊ: لۊدې بارە گەچ و خشتې بەتاڵ بکەردې. منیچ لوانی پەنەم واتې: نەلدې بەبې هەقدەس بکەردېش! داواو دە دینارا بکەردې، واتشان: هەر بە بې وەراوەر و بە بەلاش کەردەنمان!
واتم: هەتیم، ڕۊنە دواڼزە دەمئەژمارې هەرمانە مەکەردې؛ شەوە هینەو وېتانە!
هەرمانکەرې ملەجېڕېشا کەردې و کابرایچ ماچۊ؛ شش دینارېتا مڎەو، یەکسەر واتشان خاسەن! نەمدرێ پەیشان زیاڎ بکەرۊن. پەیمانکار فرە قینیش جە من هۊرگېرتېبې. ڕوێشا ڕیزە خشتې مەژمارېنا، واتم: چڼەنې؟
ماچۊ: دواڼزە هەزارې
واتم: نەخێر، ئاڼە نییەنې.
قېڕناش: تۊ دژمەنیم چەنی مەکەری! پووڵێش نییا باخەڵەم، پووڵەکەم داوە، واتم: شاڼزە هەزارېنې و چوار هەزارېت ویر شیې، بەرتېڵم نمەڎەو و هەقەو هەرمانبەرا نمەوەرە!
هەرمانەما تەمامنا؛ موهەندیس ئاما ماچۊ: ئەچا حېسابەیە کە من کەردەن، حۆت هەزار دینارې ئینایمې وەڵېوە؛ چوونکەتی ناستەنت دزیم چەنە بکریۊ. تاکو ئیسە هەقت مانگێ دواڼزە دینارې بییەن، لوە پەی بەغڎای چن قاقەزێ هۊربگېرە تاکو بتاوون پەیت بکەروون بە هەژدە دینارې، کەچی پا حاڵەیچ بەرشی کە جە ئیدارەو تەلەفوناتی چل واتە و واچې میانو نوعمانیە و کووتیشان زیاڎ سەر حېساب کەردېنمې!
بەغڎا ڕاکارەکېم کەردې؛ وەرەقەو عەدەم مەحکوومیەتیم مەنەبې، شش ڕوې سەرو یۊیۆ لوانې، جەمێ ئەفسەرې دەرەجەدارې گۆرې مەواچېنې سەوای بۊرێ! ڕۊی ششەم پۊلیسێ دلېبەرەنە پەرساش: چېش بی؟
واتم:کاکە ڕۊبعە دینارێم پەنەبڎە!
گورج لواو وەرەقەش پەی ئاردا، قەسەمش وارد کە تەنیا سەڎ فلسېش پاڎی یاوان و یەرې پەڼجێش دان بە ئەفسەرە زەلامەکا!
سەرنام: هامیانەیی مەحمووڎ ئەحمەڎی جە بەغڎا
تاکو گېڵانێ پەی کووتی، موهەندیس تەساڎوفش کەردەبې؛ بەردەبېشا پەی بەغڎای، ئامانێ بەغڎا؛ چەنی مەحمووڎ ئەحمەڎی بیانې هاممەنزڵ؛ کە ماوێ جە بەغڎا ژەن و زاروڵەش چەنی بېنې و نەیاوان خەرجیشارە؛ کیاستېبېنېش پەی سلېمانی و هۆشەگۆرێنە هۊڎێوەش پەی گېرتېبېنې کە هەشت خېزانې تەرېش چەنەبیېنې؛ وېش جە بەغڎا بە تەنیا مەژیوې. مەحمووڎ نیمەو ژیوایش دلې زیڼانینە گوزەرنابې؛ سەرەش پەی بەزما مەوریې، ئاڎیچ پېسە من پژگیابې، شەوېنە ئارەقی گرانبەهای دلې پەرداخێ قەراخ قرنجیای کۊنینە مەوەرېوە ؛ پېوەرەیچ چاییش دلېنە وەرېنمێ، مەشیێ لچېما بگېڵنێنې تاکو وەرو قەراخە قرڼجیاکەی نەگنان؛ نەک زامڎارې ببان! پەرداخی تازە مەسانېناو ئاڎ ماڕېش، حەزمەکەرې پا پەرداخە مەڕیایە ئاوی و ئارەق بوەرۊوە! جارجارەی مېمانداری گۊرانیواچ و موسیقادانی مەکەرې؛ بەڵام پەرداخ هەر نەفاڕیې!
شەوېنە جلې کوردیې مەپۊشې و مەزیېرە، لوې پەی قاحبەخانەی، چاگە کەسێ مەچڕې: پەنەش مەواچې پووڵەکەت پەنەمەڎە و کارم هەر ئاڼە پەنەتەن کە پەیم بگېڵنیۆ چەنی یاوانې ئېگە و سەرگوزەشتەت چېشەن؟ چن جارێ گەوادەکا دارکاری کەردەبې، تەرسێبېنې قاحبەکېشا چەنە بڕفانۊ. ئا ڕازېشە گلېرې کەردێ و چاپش کەردې بە نامې (سایې دەرەبەگینە). هەر فۆرمێشا بەرمەشې دوەسەڎ دڼېش پەنە ئارېناوە پەی یانەی. کتېبەکە چاپەنە بەرشی، دەسشان گېرت سەرشەرەو مەحمووڎشا گېرت. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]