کورد دلۍ چەرخەکا تاریخینە
هۊرگېڵنای و ئاماڎەکەرڎەی: ئەسعەد ڕەشید
بەشەی: چوارسەڎ و شەسس و یەکەمە
*تاریخو (#15-01-1987#ز.) داگیرکاری ئېراقی لاشې (70) حەفتا زاروڵا کورڎیش دێوە دەسو کەس و کاریشان، کە گرڎشان تەمەنشان میانو (13_ 16) ساڵینە بې و پەی ئانەی یاساو قەنارەدای بگېرۊشاوە تەمەنشان پەی زیاڎکەردې، شایانو باسین پەی هەر یۊیشان (30) سی دینارې ئېراقیشان جە کەس و کاریشان وەرگېرت، کە ئاڎیچ قیمەتو ئا گروڵیا بې کە پەنەشان گرۊڵیواران کریێبېنې.
* تاریخو (#21-01-1987#ز.) تاکو (#22-01-1987#ز.) هېزەوکانو داگیرکاری ئېراقی هۊتەرەشان بەردە پەی کەشو (کلکەسماقی و پەشتەو هانەسووری و ئیلەڵڵا) و ناوچەو دوکانی و داگیرشان کەردې، هېزەکانو یەکیەتی نیشتیمانی کورڎەسانیچ دژە هۊتەرێشان پەی کەردێ و زنجیرە کەشەکېشا گېرتێ و دەیان پارچە چەکې و تانکێشان دەسکۆتې و هەم دەیەها سەربازې ڕژېمیشان کوشتې، ئەچا هۊتەرانە تەنیا دوې پېشمەرگې شەهیڎې بیې.
* تاریخو (#27-01-1987#ز.) دەمئەژمار (1:15) نیمەشەوی، هۊتەرەو تیپەکانو (85) و (86) و (91) یەکیەتی نیشتیمانی کورڎەسانی پەی سەرو هامنەهەوارو سەری ڕەشی، کە ئەنجامەنە هامنەهەوارەکەشان بە کۊشکەکې سەدام حوسێنیۆ گېرت، دەسکۊتې پېشمەرگەی گەلێ فرې بېنې، چانېشا: تەقنایۆ کۊشکەو سەدامی، (1200) پارچە چەکې، سۊچنای دوې تانکا، چوار زرەپۊشا، جەنگەکە بە سەرداری کۊسرەت ڕەسولی سەرپەرەشی کریا.
* تاریخو (#11-02-1987#ز.) هېزەکانو مەڵبەندو (3) یەرې یەکیەتی نیشتیمانی کورڎەسانی بە یاردی سوپاو ئېرانی و پەی یاڎو ساڵەڕۊ شۊڕشو گەلانو ئېرانی، هۊتەرەشان کەرڎە سەرو فەوجەو ئاکۆیانی و پایەگاکانو چواردۆریش، کە فرېشان گېریێ و هېزەکانو ئېرانی پېسە پەنەوازی یاردی هېزو پېشمەرگەیشان نەڎا، پەی سەوایشۆ ئېزگەو ئېرانی جاڕشدا و ماچۊ ڕەزمەندگانو ئیسلامی شەوەی ویەردې بە هەزاران ئەفرادې سەدامیشان کوشتې و زامڎارې کەردې.
* تاریخو (#04-03-1987#ز.) داگیرکاری تورکی بە (30) سی بالەپڕې جەڼگیېوە پەلامارەو ناوچە سنوورییەکانی و بە بۊمبێ ناپاڵمې بۊمباوارانېش کەردې، ئەنجامەنە (170) کەسې بېچەکې کوشیێ و شەهیڎې بیې.
* تاریخو (#04-03-1987#ز.) هېزەکانو یەکیەتی نیشتیمانی کورڎەسانی چن قۊڵێوە هۊتەرەشان بەردە سەرو بارەگاو سریەو سوپاو گەلی و پایەگاکانو چواردۆرو میانو قوشتەپە و پردێ میانو هۆلېر و کەرکوکی، ئەنجامەنە چڼیین پایەگێ گېریێ و دەیان لاشې سوپاو گەلی دلې مێڎانو جەڼگەکەینە جیامەنې، دەسکۆتې (80) پارچە چەکې بېنې، پېشمەرگێ بە نامې (ڕەوەندی) جاگیرو فەرماندەو کەرتی شەهیڎ بی.
* تاریخو (#22-03-1987#ز.) ناوچەو هۆلېری (12) دواڼزە کۊپتەرې و (4) چوار تەیارې پیلاتۊزې هۊتەرەشان کەرڎە سەرو هېزێ یەکیەتی نیشتیمانی کورڎەسانی، ئەنجامەنە پېشمەرگێشا شەهیڎ کەرد و دوېچشان زامڎارې کەردې، یەرې ئوتومبیلې پېشمەرگەیشان سۊچنێ.
* مانگەو (4) ئی ساڵې، هۊتەرەکانو هېزەکانو یەکیەتی نیشتیمانی کوردەسانی پەی سەرو لووتکەکانو (گۆجار و باخ و لەرزۆک و کوێرەنگ و قەیوان و ئەزمەڕ و ئۆڵاغلو) کە ئەنجامەنە گېرتەی (114) پایەگا دژمەنی و چڼیین بارەگا سەربازییا، ئەچا جەڼگەنە دژمەن گازی زەهرینش بەکارئارد.
* مانگەو (04) ئی ساڵې، داگیرکاری ئېراقی ناوچەکانو سلېمانی و قەراخ و ماوەتیش بە گازی کیمیاوی بۊمباواران کەردې، کە بی بە مایې زامڎاربییەی (400) کەسا و شەهیڎبییەی (30) سی کەسا.
* تاریخو (#09-04-1987#ز.) پەرلەمانو ئۆروپای، بڕیارێ ناڕەزاییەش جە بارەو گېرتەی و عەزیەتدای و شەهیڎکەرڎەی (300) یەرەسەڎ زاروڵە گەنجا سلېمانی بەرکەرڎە و عەینو بڕیارې سەرنجەو داگیرکاری ئېراقیش پەی ئانەی کېشتە کە سەرەمڕەبییەی ئا نۊعە هەرمانا مەیاوان ئەنجامی خراب دلې پېوەڼی ئېراقی و وڵاتانو ئۆروپاینە.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید. [1]