چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی حەفتا و یەرەمە
پېچاو پېچ لوانې، سەرو بانو دەگێوە کۆتە وەرچەمام کە دامانو هەزار بە هەزارێوە بې، هیچ یاگێوەیچ ڕاش پەی نەلېن، سەرەچېر بییانێ، یاوانې دلې پارچە سیاوانگێ (زەمینێ وەرۋەش سەرۆ شیېبۊوە)، هەڕێ ئڼە شلەبې وەختێ زانام مەخزانې و سەرو تەوەنێ پانېوە وېم گېریانێ، دیڎانې پەی واری چېش بوینو؟ تیژە تەوەنێ ئڼەو یانێ یەرەقاتی بەرزە، وەرگیچ نمەتاوۊ سەرشۆ بازی بڎۊن. سیاوانگەکەرە بە چڼگەکڕې هوروەستانێ، دیسان خزانێ پەی سەرو تەوەنەکې، هۊمېڎم نەمەن، سەردایچ هەرا کەرې، واتم حەی ئەڵڵا! وېم مەوزوورە، بۊخچەو کتېبەکام و گۊچانەکېم هوردێ، وېچم چەمېم قۊجنێ و بە قڼگەخشکې لوانې قەراخو تەوەنەکې و وېم هوردا، واتم هەپروون بە هەپروون مەبو، کۆتارە؛ چەمېم کەردێ، بە حاڵ ئاسمانې مەوینېنا؛ هیچ یاگێچم نەئېشې، تومەز کۆتەنا سەرو وەرۋێ فرې، . بە چڼگې وەرو وېم هاڵی کەردو کەلەبەرێنە سەرەم زنیۆ، یاگە چاڵو بۊخچەکێچم سەرو وەرۋەکېوە دیڎ، گۊچانەکېچم چەقێ بې. سەرو بەرزایێوە پەی وەرۋې مۊرې دیڎېنې، یاگێ درېژکۊلې قوپیێم بەڎی کەرڎە، زانام جوەنەو ئۆسەرش مەیاوۊ ئاوایی، یاگە چاڵاییەکېرە لوانې؛ فرەش نەبەرد دواڼزە تووتې زلې سەرو تەپۊڵکێوە پەلامارەشان دانې، دەسېم گۊ نەگېرېنې کە بە گۊچانەکې جە وېمشان دوورې وزوە، ناچار نیشتانېرە (پانەی کە تووتە هەقش سەرو ژەنې و ئەرەنیشتەیۆ نییەن). تووتې ئامێ و چواردۆرمەنە ئەڵقېشان بەستە و چەپۊڵېشا نیێرەو واچېنې ئامێنې لاو مەڵڵایۆ دەرس بوانان! کابرێوە سەرو تەپێوە کە بېڵێش دەسۆبې ئامارە وارو هەرێوەش کەرد: ئامانا یاردیت. ئاڎ بە بېڵەکېشۆو من بە گۊچانێوە، شۊن بە شۊنو کابرای یاوایمې دلې ئاوایی. لوانې یانێ؛ ژەنۆ یانەکەی پاپۊشې و جلەکېمش بە گزی ماڵێ و پەلامارەو ئاییرو دلې ئارگێکېم دا، کابرا ماچۊ: جە ئاییرەکەی دوور بگنۆ، نەکای لاقېت ژانی بکەران. تۊ سەرپەنجېت کەوې بیېنێ، سەردای بەردېنې.
پەرسام: ئەرې کاکە ئېگە ئەنجێنەن؟
ماچۊ: بەڵې؛ ئەمما ئەنجێنە سەختەن، ئا ئەنجێنە تۊ ماچیش ئینا ئۆ دیمو ئا کەشەیۆ. ئا یاگې تۊش پۊرە ئامانی پەڕەن جە هەشې و وەرگې، بەڵام چوونکەتی وەرۋەکې فرېنە حەتتا گیانەوەرې دڕڼېچ بەرنمەگنان.
وچانەنە بېنا، کناچێ دە دواڼزو ساڵییە ئاما چوەر، گجی جاوی سوورش پۊرەبې، لوا لای سەریۆ؛ واتش:
ئۊسا، جام و بریقەت پەنەن؟ (بە جوولەکەی وردەواڵە ورەشم مەزانې)!
کابرا ماچۊ: ئانە ماچی چېش! چی ئانە جوولەکەن یام مەڵڵا؟
دمای نان واردەی و وچاندای، کابرا دەلیلیش کەردا تاکو وستانېش سەرو ڕێ، یاوانې سەرو هانەو ئەنجینەی. زاروڵێوە وڵاخې ئاویدی؛ واتش: لالۊ مەبی بە مېمانو ئېمە؟ هەر کە واتم ئا، وڵاخېش جیائاستې و بە غار ڕوەو یانەکا بییۆ و ماچۊ بگنە شۊنیم! هەر دلېبەرۆ چڕیش:
ئەڎا مېمانێم پەی ئاردېنی، هەچکوچیم دە پەنە!
ئەڎاش جوابش داوەو ماچۊ: یاخوڎا خېربێ؛ بۊ چڼگە هەچکوچەو وېت هوربگېرە!
سەرسام مەنان: ئەی خوڎا، دلې کورڎینە هەن کە بەرتېڵ بڎۊ بە کوڕەکەیش پەی ئانەی مېمانش پەی بەرۊن؛ (حاتەمو تەی) چ گوێش واردەن!
ئا یانە کە پەیش لوانې، یانەو خەلیفە ساڵحی بې. تاکو وېرەگا هەشت مېمانې تەرېش ئامێ کە دوېشان ڕەفېقە چۊدارەکېم (شوانەکې) بېنې، پۊشاکېشا پەی ئاردیمې، پەی نماو عیشای چەنیشان لوایمې پەی مزگی. دمای نمێ گرڎو یانەکاوە نان ئاما و مېمانەکې و خەڵکو دەگاکېچ جە گرڎو واردەکانە شەریکې بېنې. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]