چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی حەفتا و دوەمە
وەرنماییم کەردو دمای نمێ نزێ فرېم کەردې، شەوې کابرێوە بەردانێ پەی یانەی پەی نان واردەی، ئامایمێ و مزگینە وتیمې، ساعبێ کە چەمېم کەردێ، دەوراندەورو مزگینە نیشتېبېنېرە، کابرێوە کۆت قسې:
مەلا گیان چی لوانی ئا وارە؟ چېش مەکەری؟
واتم: مەوانو
ماچۊ: دماڕۊ مەبی بە چېش؟
واتم: مەبو بە مەڵڵای عال.
ماچۊ: ئا کاتە چېش مەکەری؟
واتم: دەگێوەنە بوو بە مەڵڵا.
ماچۊ: دەسا کاکەو وېم، ئېمە تۊما لکان دڵەرە؛ هەر جە ئیسۆ پەنەت ڕازیېنمې.
واتم: ئاخر... ؟
ماچۊ: ئاخرش گەرەک نییەن، جارێ با قسەکام تەمامنو: یانەقۊڵێوەو بزێت مڎەیمې پەنە، دۊکەیش بوەرە، کەرەکېچش پەی وېت، زەکاتو دەغڵ و دانیچت مڎەیمې پەنە. ها! مزانو ماچی منی سەڵتەو بېژەن چەنی متاو یانەڎاری بکەروون؟ حۆت ڕوې لوە پەی سەرو هانەو ژەنا، هەر کناچێ تەقیا دڵتۆ پەیت مارە مەکەرمې. بە خوڎا مەزانوو کناچې من هورمەچنی، چوونکوم جە گرڎو کناچا زەریفتەرەنە. من ڼامېم برایماغان.
منیچ واتم: ئاغا، بە هەقەت ئانەی سەرو من واتت زیاڎەن، بەڵام برێوەم ئینا ئېراق؛ ئەڎام فرە پەرېشانەشەنە، ملو مەمېزوشۆ و ماروشۆ!
بە هەزار زوانې کوڵې وېمۆ کەردېمۆ، وەرۋە مدرێبێ، پەی ڕاکې پەرسام، سەرو وەروېرە لوانې تاکو یاوانې (بڵەسەن) کە وەڵتەر نیشانەشا دابېنا. تاکو توولەڕێ حێوانی مەنێ خەمم نەبې، چاولای مەگنېنا دلې وەرۋې و تاکو زەنگۊڵېم چەقېنې. خوڎای ڕۊشکەردۆ تاکو وېرەگا من دلې وەرۋېنە مەتلیېنې؛ ۋا وەرۋە مەکەرې سەروچەممەرە؛ هېزم چەنەبڕیابې تاکو پڕێنە یاگە پێ تووتام دیڎې و شۊنیم هورگېرتې. سەرو تەپێ بەرزیۆ دەگاو (بڵەسەنېم) دیڎە، بە خشکەیی وېم سەرو وەرۋېرە خل کەردۆو و یاوانې پاڵو نزیکتەرین یانەو دەگێ. لوانې دلې هوڎێ لڼگېم درژې کەردې و پاڵمدا دیوارێوە، نەوەشێ چاگە مەناڵنې، پاسە ئاما وەرچەمام کە گرانەتاش بۊن، ژەنێ دلېبەرەکەنە دیڎاش و لوا، چوار پەڼج ژەنی تەرې چەنیش ئامێوە و پەیم دیڎېنې و واتم: واڵەکام چی تەماشەم مەکەردې؟
یوەشا ماچۊ: ئۆ خوڎا شوکور خۊ تۊ ساقەنی؟ برا بە خوڎا ئەجیاما مەردەنی؛ ڕەنگەو مەردەیت نیشتېنە وەنە، ڕەنگە ئاورات بۊ.
واتم: نەخێر، ئاورام نییەن، سەردمەن.
گورج سۊبەشان کەردۆو ژەنێشا قاپە شۊتێش پەی ئاردا، ماچۊ: پیا دلې وەروېنە گیروەرۊن، ئاورایېنە مەگنۊو هەس بە ئاورایی نمەکەرۊن، دمای شۊتەکەی نان و پەنیرش ئارد، ئڼەم وارد لەمەم ماسا. پاڵێکېم کە قاچېمەنە وەتېبېنېشا کەردېمۆ پەیام و هەرچی خولقەشا کەردا لوانێ پەی مزگی و وەردەمو سۊبەو مزگینە وېم وشک کەردۆ. ساحېب یانەکە کە نامېش قېخا حەسەن بې، کە زانابېش مېمانەکەش لوان پەی مزگی، کیاستەبېش شۊنیم؛ نەلانێ. مەڵڵاو دەگێ بەردانېشۆ پەی یانەی و دانوولې گەنماش دانې پەنە. خواوڕاسان مەڵڵا جە من کۊلکە مەڵڵاتەر بې؛ منش لاوە فرە عالم بېنا، شەوې مزگینە چەنەم پەرسا: کەس هەن بلۊن پەی ئا وارەیە؟ دوې کەسېشا واتې کە چۊدارېنې و بزې مەبەراوە (کەناروێ)؛ کۆتانې گەلشا، بەڵام بزې دلې وەرۋېرە بەرنەشېنې؛ مەشیێ ڕامان پەی ماڕێنې و بەبې خشپە بلان. مەرەجیېم ناخوونې پەیام ژانی کەران، واتشان تۊ بیاوە (ئەنجینە) و یاگې بگېرە تاکو ئېمەیچ مەیاومېت پەنە.
واتم: ئەنجینە چکۊن؟
واتشان: هەر ئەچا پېچەنە گوم بییەی دیارەنە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]