چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی حەفتا و یەکەمە
ویرش چەنەکەرېناوە: ئا سۊفیە فرە دەسبڕەن، قیمەتو ئەسپە جوانەکەی زیاتەر داوامەکەرې تاکو پەی کابرایش وێبکەرۊن! پەیم نویست.
ساعبێ وەرمەنە بېنا، گۊشم چۆبې سۊفی واچې: هەر کەس ئارۊ بڎۊ کوېسانی بە هیلاک مشۊ، لۊتکې (کەکی کۆزاد)ی تەمەنە. سۊفی ئاماوە چوەر، چەنەم پەرسا متاوو سەفەر بکەرو؟
ماچۊ: بەڵې، هەواش فرە وەشەن، بڎیە وەرەتاو کۆتەن!
واتم: نەشارەزانان، هیچ کەسێ شکە نمەبەری چەنیم بێ؟ ماچۊ: یەرې تمەنې بڎە، کابرێوەش گەل وستا کە تاکو سەرو کوېسانو گڵەزەردەیم بەرۊن. هەوا تینیش بې، هەر کە یاوایمې بنارو کوېستانی، بی بە تەم و تەمەلوولێ چەم چەمی نەوینې، کابرای بەڵەڎ واچې: دەسگېرە بیبینەکەو منۆو بگنە شۊنیم، وەرۋەێ فرې وارێبې؛ دنیا فرە تاریکە بې، ئا کابرا شارەزێوە سەیر و تەمام بې: ئېگە چاڵینە، ئینە تەوەنینە، ... کەچی دنیا لووسەو پەڕ وەروەبې، چەنی زانې، نمەزانوو! دلېڕاسەو کەشینە مدرا، واتش: تۊ چېش مەژنەوی؟
واتم: هیچ
ماچۊ: دەسا تۊ یاگې وېتەنە بچەقە، نەجمی، من ملو هەر ئیسە مەوە.
دمای تاوێ ئاماوە، ماچۊ: پا هوربگېرە با بلمې تۊ ڕزگار بکەرو و من بگېڵوە. سەڎ تفەڼگچیې بانەیې دلې وەرۋېنە گیرشان واردەن و ڕا بەرنمەکەران؛ نەیاووشان پەنە گرڎ فۊتیان.
منش یاونانې لاو وشکانی کوېسانی؛ زەمینی وشک و دارەسان، واتش:ملی پەی (سووتوو)ی مېمانو یانەو سەیڎ عەوڵای بە، وېش گېڵاوە. بە غار سەرەچېر بیانێ، کڵاوەکېم گېریا لقێ؛ لام نەکەردۆ، جیامەنە، واتم ئانېچ پەی تۊ! یاوانې (سووتوو) لوانی یانەکە، پەڕبې جە ژەنی جوانې و بې پیایا، واتشان پیێکېمان لوێنې گەرمیان پەی بارە قاچاخا؛ فەرماوە مېمان بە! واتم ملو، واتشان ئا ڕێ بگېرەو لوە پەی (سەرتەزێن)ی. تووشو جادەو (بانە _ سەردەشت) بیا؛ ماشینێ سەربازی پارە ویەرد، فرە تەرسانې؛ بەڵام بەخێر ویەرد. دلې دەگێوەنە دەنگو گۊرانییەو داوەتی ئاما، چاگۆ لوانې دلې دۊڵێ و پەرسام، واتشان دەگاو (سەرتەزێن)ینە و یانەو حاجی شېخەیش چەنەن و مېمان مەگېرۊ وې. لوانې هۊڎێوە دوې کەسېش چەنەبېنې؛ دیاربې مېمانېنې. ژەنی سەماوەرەشان ئاردە چوەر کە وېمان چایی بوەرمېوە. دمای نماو عیشای حاجی و چن کوڕێش ئامێوە، داوەتەکەنە بیېبېنې، حاجی هەر واچې: شەرتەبۊ دەسو دە پیرەژەنام فشاران، خېرئامایش کەردیمې؛ جلەکېش چەنە ئەسایمې و کیاستېش پەی شتەی،. پیێوە فرە نان بڎەو وەش مەشرەف بې، ساعبێ گۊشم چۆبې واتش:
مەڵڵای هایی نمەکەردێ با بوسۊ؛ بەخوڎا مەڵلا ئەجۊ بېگاری مەکەرۊ و جە نماو ساعبی بېزارەن.
دمای نان و چایی، حاجی ئېتێ کالېش بە گۊرەوېوە ئاردې؛ ماچۊ: مەڵڵا، تۊ دنیات نەڎیېنە! بە پاڵێ شاریې پاژنەڎارې، دلې وەرۋې و هەڕېنە سەفەر نمەکریۊ، کالەکېش کەردې پام، ئەسپارانېش بە کابرێوە، ماچۊ: تاکو مەیاوۊ (سیاوما) هەرچیش سەربێ یەخې تۊ مەگېرو؛ من حاجی شېخەناو مەشناسیم. ڕانە وەرۋێ قورسە کەردشەرە، تاکو یاوایمې دەگا، وەرۋە یاوا زەنگۊڵېما. یانەو کابرای هامڕایم تەڕ و تاریک و تەڼگ بې، فرەیچ سەرد بې. لوانې مزگی؛ مزگی فرە وەشی قەڎیمی بە خشتې سوورې، خەڵکێ فرە دۆرو سۊبەی تاودریاو مزگیرە نیشتېبېنېرە.
واتشا: کاکە تۊ مەڵڵانی؟
واتم: بەڵې.
واتشان: سەرو چەمامان، دە ئارۊ وەرنماییمان پەی بکەرە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید.[1]