ئەلەپەشە قارەمانو ڕۊمانێ هۆرامیې
نویستەی: #ئەسعەد ڕەشید#
یەرەم بەشە
ئەلەپەشە، دمای کوشتەی کابرای مەرزوانی، پەی تەکبیر و ڕایێ چەنی ئەفراسیاو بەگی نیشتەرە، دماتەر بە چەم ساغی یارەی برایش جە نیمەشەوێنە وېش یاونا خزمەتو شېخ نەجمەدینی جە خانەقاو بیارې، دمای گېڵنایۆ سەرتاپاو قۊمیاکەیش پەی شېخی گېڵناوە، شېخ هەناسێوەش هورکېشت و دەسێش ئارد ڕیششەرە و یەخې کەواکەیش کەرڎەشۆ چېرو بیبینەکەیشەرەو (دڵو وېشەنە واتش!): تەوەنێوە نەزان وزۊش گمە، بە هەزار زانێ بەرنمەیۊوە.
شېخ نەجمەدین بە دەنگی بەرز ئا پەندېشە نەواتە، دڵو وېشەنە، نە مامۊ ئەلەی ژنیە، نە نویسەری!!
* چېرو ڕانمایی حەزرەتو شېخ نەجمەدینینە، ئەلەپەشە دەگاو هانەگەرمڵەیش جیائاستەو کۆت ڕا پەی ناوچەو موکریانی، پەی خانەقاو دەگاو (برهان)ی، سەر بەشارو بۊکانی، بە نامێوەشېخ نەجمەدینی پەی شېخو دەگاو بورهانی، ئەچاگە وېش پەنا بڎۊن تاکو خوڎا دەرێ خێریش پەی بکەرۊوە. ئەلەپەشە دمای خوڎاحافیزی چەنی ژەن و زاروڵاش و چەنی ئەفراسیاو بەگی، کۆتڕا پەی دەگاو نۊتشەی، چوونکوم چاگە کاروانسەرێوە و تەویلێ هەسەراش چەنەبې، ئەچاگۆ کاروان گنې ڕا ڕوەو سنەی و ماییدەشتی و ناوچەو موکریانی. ئەلەپەشە شەوې کاروان سەراو دەگاو نۊدشەینە مەنۆ، ئانەی کە یاگې سەرنجیەن ئا ساعبانە ئەلەپەشە یەرې جار کاروانسەراو نۊدشەیۆ کۆت ڕا ڕوەو ناوچەو موکوریانی، ئەپی تەرزە:
* بارام و یارە دمای نیمەڕۊی گېڵێوە ڕوەو دەگاو هانەگەرمڵەی و ئەلەپەشەیچ ئا شەوە کاروانسەراو دەگاو نۊدشەی مەنۆ و سەحبێ زوو دۆگە بە دۆگە چەنی کاروانچیا ڕاو ناوچەو موکریانی و شارو بۊکانی و دەگاو بورهانیش گېرتەوەر. سەرقافڵەو کاروانەکەی ڕانە کاتێ یاوې کاروانسەراکا هەواڵو ئاراسەو ڕاکېشا وەنەپەرسې و ئاڎیچې ڕانماییش کەرېنې.
* ئەلەپەشە دەگاو نۊدشەیۆ چەنی کاروانێوە کۆت ڕا ڕوەو میاندواوە، هەر ئەچاگە ساحېبو کاروانسەراکەو نۊدشەی ڕوەش کەرڎە ئەلەپەشەی و واتش: کاکە تۊ شانست هەن و بەختەت ئاردېنە، ئڼا ساڵێوەنە دوېجار کاروان دەگاو نۊدشەیۆ ڕوەو میاندواو مەگنۊ ڕا.
* کاروان، ساحبێ زوو هەڵای نماو ساحبی تازە بیېبې دەگاو نۊدشەیۆ کۆت ڕا ڕوەو میاندواو، ئەلەپەشە نەزانی میاندواو چکۊن و چن دوورا، پەرساش ئەو سەرقافڵەو کاروانەکەی.
ئەفراسیاو بەگ؛ برازاو جافرسانی کەسێ وت و وریا، خاوەن ویرێ تیژ و قووڵ، هەرپېسە نویسەری ئیشارەت پەنە کەرڎەن. ئی هەقیقەتە وەڵتەر چن کەس و نوویسەرێ تەری سەلەمنان، گەر گوزەرێ بکەرمێ بە نامیلەکې نویسەر شاکیر فەتاحی، بە نامې (گەشتێ پەی هۆرامانی)، ئا هەقیقەتەمان پەی ڕۊشن مەبۊوە، شاکیر فەتاحی ڕەحمەتی دلې گەشتەکېشەنە یۊچا کەسە نامڎارو زیرەک و ڕامیارا کە چەمش پەنەکوتەن و هورستە و نیشتەی بییەن چەنیش، ئەفراسیاو بەگ بییەن. شاکیر فەتاح باس جە زیرەکی و زیتەڵەیی و قووڵی ویری سیاسی ئەفراسیاو بەگی کەرۊن، زیاتەریچ باس جە تاکتیکو ژیوایش کەرۊن، کە چن بە وردی و بە بەرنامە لاقۊرەکاش منیۊ، ماچۊ ئاڎ هەرگیز ڕێوەرە دوې جار نەلان، پێرە لوابۊ، پۆلارە ئامانۆ. هەر سەرو ژیوای ئی کەسایەتیەو هۆرامانی، دکتور محەمەد ئەمین هۆرامانی چېوێ مەگېڵنۊوەو ماچۊ: سەروەختو تەلەبایەتیم، چەنی چن تەلەبێ خەڵکو هەڵەبجەی کە باعزێشا وەچې بەکزاڎە جافەکا بېنې، لوایمې پەی سلېمانی، دیارەن پەی وانای لوێنې، ماچۊ من کۆتا وەڵې تەلەبەکاو پلەکانی هۊتیل جمهووری لوایمې سەر، دمای ئانەی هۊڎېما گېرتې پەی مەنەیۆ، هۊڵەکەنە چەمم کۆت بە کابرێوە پاک و پۊختە و وەشپۊشی، چن کەسێ دۆرشەنە بېنې، کاتێم زانا پیوە ئاما پەی لایماو ماچۊ: جەنابو ئەفراسیاو بەگی گەرەکشەن چەمش بکنۊ پەنەتان، ئېمەیچ لوایمې پەی خزمەتیش.[1]