کورد دلۍ چەرخەکا تاریخینە
هورگېڵنای و ئاماڎەکەرڎەی: ئەسعەد ڕەشید
بەشەی چوارسەڎ و سی و دوەمە
* تاریخو (#03-11-1979#ز.) وەڤدێ جە کیانیاکانو دۆڵەتو ئېرانی کە پېکئامابې جە: سەباغیان و سەحابی و داریوشی فروهەر، داواشان جە حېزبو دیموکراتو کورڎەسانو ئېرانی کەرڎە کە پېوەرە دلې بەستو مەهابادینە بنیشارە، جە لاو حېزبو دیموکراتو کورڎەسانو ئېرانیۆ غەڼی بلوریان و کەریمی حیسامی بەشدارې بېنې.
* تاریخو (#04-11-1979#ز.) بەستەی نۊیەمین کۊنگرەو پارتو دیموکراتو کوردەسانو ئېراقی جە تەرگەوەڕ و مەرگەوەڕو وەرکۆتو کورڎەسانی.
* تاریخو (#04-11-1979#ز.) تۊقدای و گېرتەی باڵیوزخانەو ئامریکای جە تاران بە دەسو وانکارە تڼڕەوە شېعەکا ڕژېمو تازەو ئېرانی، کە دماجار گرڎو ئەنداما باڵیوزخانەکەی بە بارمتە گېریێ و بی بە مایې پېڎابییەی جەنگی دبلوماسی میانو ئېران و ئەمریکاینە، شایانو باسین کە دماتەر بیناو باڵیوزخانەکەی دریا بە ژڵېوەی ڕزگاریوازو فەلەستینی جە تاران.
* تاریخو (#06-11-1979#ز.) پەی یەکەمین جاری ڕادوینو دەنگو کوردەسانو ئېرانی سەر بە حېزبو دیموکراتو کورڎەسانو ئېرانی، بەرنامەی تاقیکاری وېش وەڵاکەردۆ، کە بە چن سروودێ دەسش پەنەکەرد و دماتەر وتارێ دکتور قاسملۊیش پەی کۊمەڵانو خەڵکو کورڎەسانی وەڵاکەردۆ.
* تاریخو (#11-11-1979#ز.) بەستەی کۊنگرەو سەرداریی کاتی (قیادە موەقەتە) جە وەرکۆتو کورڎەسانی.
* تاریخو (#13-11-1979#ز.) حېزبو دیموکراتو کورڎەسانو ئېرانی گلېرۆبییەیێ گۆرەش جە فەرمانداری مەهابادی پەی خەڵکی ڕېکۋست، پەی چەنەکۊڵیای جە بار و دۊخو کورڎەسانی.
* تاریخو (#15-11-1979#ز.) وەڵاکەرڎەیۆ یەکەمین بەرنامەی ڕادوینی دەنگو کوردەسانو ئېرانی.
* تاریخو (#17-11-1979#ز.) خومەینی دلې بانگەوازێنە ئانەش درکنا کە مەشۊم کیانیاکې گەلو کورڎی و حکومەتی ئیسلامی بە ئاشتیانە دەس بە واتە و واچی بکەران.
* تاریخو (#17-11-1979#ز.) تەمامیای جەنگی یەرەمانگەی میانو پېشمەرگەکانو وەرکۆتو کورڎەسانی و داگیرکاری ئېرانی.
* تاریخو (#17-11-1979#ز.) خومەینی فەتوێوەش دژو کوردەکانو وەرکۆتی بەرەکەرڎە تاکو دژو کۊماری ئیسلامی ئېرانی نەمدراوە.
* تاریخو (#20-11-1979#ز.) دمای بانگەوازەکەو خومەینی کۊمیتەی میانی حېزبو دیموکراتو کورڎەسانو ئېرانی جە کەشۆ وەستەرە پەی دلې شاری، دماتەر گلېرۆبییەیێ خەڵکی گۆرە دلې مێڎانو چوار چراو مەهابادی سازیا کە دلېشەنە دکتور قاسملۊ و چن کەسێ تەرې قسېشا پەی خەڵکەکەی کەردې.
* تاریخو (#10-12-1979#ز.) نیشتەرەی دەسەو کیانیایاو خەڵکو کورڎی یانەو شېخ عیزەدین حوسێنی جە مەهاباد، جە بارەو چەنیبییەی واتە و واچی چەنی کۊمارو ئیسلامی ئېرانی قسەوباس کریا.
* تاریخو (#12-12-1979#ز.) دلې هۊڎەو فەرمانداری مەهابادینە، ئەرەنیشتەی دەسەو کیانیایا خەڵکو کورڎی چەنی دەسەو کیانیایا کۊمارو ئیسلامی ئېرانی سازیا، کیانیێکې دۆڵەتی ئینې بېنې: سەباغیان، سەحابی، داریوش فروهەر، کیانیێکې خەڵکو کورڎەسانیچ ئینې بېنې: شېخ عیزەدین حوسێنی (وەرپەرسو دەسەی)، دکتور قاسملۊ، غەڼی بلوریان، کەریمی حیسامی، هەم جە کۊمەڵەی و چریکە فیداییا یۊ دوې کەسې بەشڎارې ئەرەنیشتەکەی بیې، کە بەبې ئەنجام کۊتاش ئاما، چوونکوم دۆڵەتو ئېرانی ئاماڎە نەبې چەنی کیانیاکاو پارتە ڕامیارییەکا ئەرەنیشتەی بکەرۊن.
* تاریخو (#14-12-1979#ز.) حېزبو دیموکراتو کورڎەسانو ئېرانی یاڼزە سەربازې کرماشانیېشان دیلې کەردې و ئاردېشا پەی مەهابادی.
* تاریخو (#20-12-1979#ز.) ڕۊنامەو ئیتڵاعاتی ئېرانی گەڵاڵەکەرڎەی وېڕاوەبەریش (خودگەردانی) جە چن مادێنە وەڵاکەردۆ، کە هیچ مافێ چامنەش پەی کورڎی مسۆگەر نەکەرڎەبې.
* تاریخو (#24-12-1979#ز.) قۊمیای جەنگو سماقوڵی، دژمەن بە هېزێ زەبەلاحۆ هۊتەرەش کەرڎە سەرو دەگایەکانو سماقوڵی و سەرچاوەی، ئەنجامەنە وەرەنگاری هېزەکانو حسکی بیێ و هەشتا سەربازېشا کوشیێ و هېزەکەو حسکیچ دەسکوتێ فرەشان گېرت. هېزو پېشمەرگەی چن کەسێشا شەهیڎې بیې کە ئینە نامې باعزێشانە: شەهیڎ سەی سەلیم، شەهیڎ شینە بۆڵێ، ..... هتر.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید.[1]