ئازا گرەوای مەکەرۊ بە دەوای
کەسی ئازا، کەسی بە غیرەت هەر دەم پەی یاوای بە مەرامەکاش، دەسمڎۊنە کۊششی مەردانەو پییایانه، دلې مێڎانینە قۊڵې هورماڵۊو داواو مافەکاش و هەقەکاش مەکەرۊن، گەر بە وەشی و ئەنەیاوانەی نەیاواشا پەنە، ئانە بە ئازایی وېش و بە چەم نەتەرسیش جەنگشان پەی مەکەرۊن. یانی ئینسانی ئازا هەرگیز پەی یاوای بەمەرامەکاش و ڕزگاربییەی جە دەردەکاش پەنا مەبەرۊ پەی گرەوای. یانی بۊڵە بۊڵ و گلەیې نمەکەرۊو هەر دوورۆ ئاخې هورنمەکېشۊ، جە بې غیرەتیېنە پەنا پەی گرەوای و لاڵیایۆ نمەبەرۊ. ژیوای ئی دنیێ نەڕازیانۆ بەگوڵ و باخ و باخات، بەڵکوم پەڕەن جە گیرو گرفت و دەردیسەریا و وەربەسا و هۆراز و سەرەچېرا، ئینسانی ئازا ئا کەسەنە هەکە مەردانە مێنە مێڎان و شېرانە ملۊ پېوای پەنەوازی و مەرامەکاشۆ نەک دوورۆ پەیشا بڎیۊنەو بېجگە گرەوای و هەڵس متەرەی هیچی تەرش پەنە نەکریۊنە.[1]