ئارەزوو مەرز نمەشناسۊ
ئارەزوو ئینسانی واتا حەزو دلې ناخو ئینسانی، ئا حەزېنې هەکە گرڎ کەسێ پانېشا مەژیوۊ و زیندەگیش بەسیان پانېشاوە، پەی نموونەی حەزو واردەی، حەزو مەیلی هامسەری، حەز پەی مڵک و ماڵی، حەزو گېڵا و گەشتی، تەمامو حەزەکا تەری، بەڵام ئی حەزی خوڎای گۆرەی خولقنێنې، چەنی ئانەیچە مەرزش پەی دیاری کەردېنې، جە سنوور ترازیای حەزەکې مەبان بە مایې زەرەری پەی کەسەکەی و پەی چواردۆرەکەیچش. فرەو جاری ئارەزوو ئینسانی مەرزەکا و پەرچینەکا مەبەزنۊنە و مەماڕۊنە. ئارەزوو حەزێوە فرە بەهېزا جەدەرونو ئینسانیینە هەکە جۊشییا و خرۊشییا ساحیبەکەیش ناچارمەکەرۊن مل بنیۊ پەی سیرکەرڎەیش، هەرگیز گۊشش نییەن جە مەرزی و پەرچینی و ئا یاسا و دەسور و عورف و عادەتییا کە دلې خەڵکینە باوېنې، هەرپاسە ویر جە عەیبی و شورەیی و لومەو لۆمەکەرانی نمەکەرۊوە، کات و ناکات نمەفامۊنەو دەنگو ئەقڵی و شعووری نمەژنەوۊنە، کەسی ئازاو پاڵەوان ئانەن هەکە زاڵ ببۊن ملو ئا بەڵایرەو نازۊن مەرزو وېش ببەزنۊن.[1]