فەرهەنگی جوغڕافیایی هەورامانی
شۊنۊ پەنج ساڵا زەحمەت و تەلاشی شەو و ڕۊیی، بە کاغەزی نەفیس و چاپی ئۆفسێت کە نەقشەکېش بە شێوەی ڕەنگیەنێ چاپ کریا و ئاما بازار.
ئی کتېبە جە هەزار لاپەڕێ و دوې جلدێ بەقەتعی وەزیری چاپ کریان و دوانزه بەشێن. جلدوو یەکیش چوار بەشێن: باسێوی گرڎین سەرو جوغڕافیاو هۆرامانی، فەرهەنگی مەوزووعی هۆرامانی، فەرهەنگوو واژەکا و بەشو چواری هۆرامانوو لهۆنی. جلدوو دوېچ هەشت بەشێن: هۆرامانوو ژاوەرۆی (ژاوەرۆ سنەی، ژاوەرۆ سەڵواوای، ژاوەرۆ کامیارانی)، هۆرامانوو تەختی، هۆرامانوو کەراخوو ڕۊخانه و سیروانی، هۆرامانوو شامیانی، هۆرامانوو هەرېموو کوردستانی و هۆرامی زوانێ بەرو جوغڕافیاو هۆرامانی.
کتېبوو (فەرهەنگی جوغڕافیایی هۆرامانی) پەی یەکۊم جاریا منویسیۆ و وەڵا بۊوە. ئینە زەروورەتێو بې کە هۆرامان و گوستەرەی جوغڕافیاییش بنویسیۆ و بلۊنە دلې قاڵبوو کتېبی و من ئەجۊم بییەی ئی کتېبییە دلې گرڎو کتېبیانەکانە و بە تاییبەتت کتېبخانه و یانەکا و حەتتا بوومگەردیەکانە پەنەوازا.[1]