چاشتەو خاڎمی
هورگېڵنای و ئاماڎەکەردەی: #ئەسعەد ڕەشید#
بەشی یەکەم
سەرنام: وەرینە
فرە زوۆن دۊس و نزیکەکېم پەنەم ماچان و تەکلیفم وەنەمەکەران پەی ئانەی ژیوای وېم و ئانەی ئامان ملمەرە بنویسووشۆ، منیچ دڵو وېمەنە واچېنې: مریچڵې تۊ چېشەنی و شۊرباویت چېشەنە! زانېنې کە ژیوایێ قۊڕ و تووڕەهاتم گوزەرنان، هەر دەم وېم وییارېنا چەنەش، بەڵام کۆتا ۋیرو ئانەی کە ئا ژیوایە پەڕ هۆراز و لېژە، پەڕ کەڼاۋو ناڕەحەتییە، جاروباریچ ساراییە هیچ نەبۊن پەی کوڕەکەیم (خانی)، کە دلې چوار کوڕانە هەر ئاڎم پەی مەنەبێ، زانینایچ گەر بژیوۊ مەگنۊنە دلې تەشقەڵەو دنیێ، بنویسوە. ئاڎ ڕەنگە ژیواچشەنە بې بەهرە نەبۊن، ئەچا سەردا و گەرمایانە ئامێنې ملو منەرە دەرزێ و عیبرەتێ وەرگېرۊو تەجرەبەش پەی پېدابۊن، یام هیچ نەبۊن دلې تەنگانەینە نائومېڎ نەبۊن و پاسە بیاوۊنە ڕاو ڕزگاری بە یەکجاری وەرش نەگېریان. وەشی و ئاسووڎەیی ژیواینە یاوەرش بۊن و نەرەجیۊچش ئا وەشییە هەرگیز جیاش نمازۊن، وەشی و شاڎی ئینێ فاڕیاینە، هەر دەم سەرەمڕە نییەنې، گەر وەنەش قۊمیا چەنی وېش ئاماڎە بکەرۊن و مل بڎۊ وەرو کۊششی، حۆلې ڕزگاری جە خەم و دەردا بڎۊن، گەر دلې وەشییاچەنە بی ویرش نەشۊن کە ڕەنگە دیسان تووشو وەنەقۊمیای ببۊن و وېش پەی ئا ڕۊیە کە هەڵای نامان ئاماڎە بکەرۊن، جا من دەمو قسام چاڎیەن و سەرگوزەشتەو وېمش پەی مەگېڵنوە. هەرچن فرە و پەرش و وەڵا پېسە تۊمو هۆرېشەی بۊن، ڕەنگە چن یاگێنە تەجرەبېش چەنە هورکڕنۊ، خۊ گەر دۊس و ئەشناسېچ بواناشۆ با هیچ نەبۊن ئەپا قسە قۊڕامە خەندە و کەیف بکەران.
سەرنام: زوانو ئی کتېبەیە
گېڵنایۆ سەرئامایام قسې وەرو هارگێنې و ڕازێنە پەی جوانێش مەگېڵنوە، ئیتر گەرەکم نییەن بواچان زانستش نییەن و ئەدەبش نییەن. فڵان بواچۊ چی چاگەنە پاسەش واتەن، ئی کتېبە بە زوانێ نویستەنم کە قسې پاڵو هارگێنې، با نەواچان واچې عەرەبیېش تېکەڵ کەرڎەن، گەر هەقیقەتتان گەرەکەن بە زوانێ نویستەنم کە دلې کۊنیشتانە قسېم پەنەکەرڎەن، هیچ وېم نەماڼان. ئا هەرمانې کە پەی شەرەفنامەی کەردېنەم و ویر و مەژگم فشاران پۆشۆ، ئەچېگەنە باسشان نییەن.
سەرنام: هەشتێ جە مشتێ
ئیسە کە ئی خەت و دېڕا مەنویسو تەمەنم شەسس و یەرې ساڵېن، ئەچا بەرزی تەمەنیمۆ مڎیۊرە وار پەی شەسس و یەرې پلا تەمەنیم، پیرینە ۋیرم ئاڵۊزیان، چېوی فرە کەمم ویرمەنەن، ویرم پېسە چەمام بې حوکوم بییەن و بە عەینەکې نەبۊ نمەوینوون. چەمې ویر و مەژگیچم کزې بیېنې و عەینەکېشا دەسنمەگنان، چەنەم ڕۊشنەن جە هەزار چېوا کە ئامێنې ملمەرە سەڎشانم ویر نەمەنېنې. ئانە مشتێ نمانەو خەرمانێ، یام پېسە کورد ماچۊن؛ هەشتێ جە مشتێ مەگېڵنوە پەیتان. سەردەمو زاروڵەییم دلې ناوچەو موکریانی دەستور چامنەبې کە مەشیێ ڕۊ جەژنې گرڎو پیایا ئاوایی دمای نماو جەژنې تېر دەم و فڵقو یۊترینی ماچ بکەران و ئینجا بە ڕیز بنیشارەو یانەو وېشاوە نان و چاشتشان پەی باران، نانو جەژنې بوەران. دۊڵەمەڼ و خوڎاپەنەدێکې برنج و شېڵانې و گۊشتاوەشا پەی ئې، بەڵام ئانې کە فەقیرې بېنې پڵاۋو ۋڵۊشېشا پەی ئارېنې. ئا گرڎ واردې تېکەڵې کریېنې و پېوەرە نان وەرېنې.
سەرنام: چی چاشتەو خاڎمی؟
خاڎمو مزگییەکەی قابلەمێ ئارې، هەرچی وەرمەنەو ئا خەڵکەیەبې ترخنېش ملو یۊیرەو پېسە جەژنانەی پەرېشۆ کە نامې نریابې چاشتەو خاڎمی. تېکەڵێ سەمەرەبې، دلې قابلمەینە دڼە برنج پاڵ نیې دڼە وڵۊشېوە، دڼە کشمیشې پڵاوی وەڵێ بیېبېنېوەو هەریۊ سوچێنە یاگېشا گېرتېبې. بەشێ جە کتېبو (چێشتی مجێور)، نویستەی هەژار موکریانی، هورئەوەگېڵنای پەی سەرو زوانی هۆرامی: ئەسعەد ڕەشید.[1]