وېش مەی
بەشو ویسۆمی
بە ئەڎا گەورێم واتم زەنگ بڎە پەی یانەو زهووری واچە گەرەکەمەن چەنی کوڕەکەیشا تەنیا قسە کەروو.
ئاڎەیچ وەشحاڵە بییە و واتش: خاس ئەدا بۊ قوربانەت.
زوو یاوانی سەرو قەراری ، دڵوو وېمەنە واتم نەکریۆ پاسە خیاڵ کەرۊ فرە دڵم پی وەسڵەتیە وەش کەرڎە بۊ، بەڵام دیسان بە وېم واتم بېخود مەکەرۊ. گیرام زوو یاوایبوو، خۊ کۆفر نەبییەن. شۊنی دە دەقێقارە یاوا وەروە. بە چڵیە گوڵی ڕۊزوە، خوەی گېرتانی. واتم تاکو ئیسە پەیمان گوڵش پەی ناوردێبېنې. دیسان ئا فەقیرەیە لەیەک دێناوە چەنی کوڕو دلې خیاڵ و ڕویاکام. وەشحاڵ بې، بەڵام من فرە عادیە بېنې. واتم: سەعید ئاغا گەرەکمەن بېپەردە قسێ وېم کەروو تکات وەنە مەکەروو ناڕەحەت نەبی چەنەم، واتش: نە، فەرماوە
دەسم پەنە کەرد، گرڎو قەزیەکې وېم و پەیمانیم ئەوەڵ تاکو ئاخر پەیش گېڵناوە و ئاخرشوە واتم: حازرەنی چەنی کناچیە ژیوای هامبەشیت دەس پەنە کەری کە تەماموو ویر و خیاڵش هەن لاو کەسیە تەریوە؟
جوابێوەش دانیوە گرڎو لاشەیم نیشت لەرزای.
واتش: نە خاتوو سەحەر وەشم نمەی، بەڵام ئانە کە تۊ ماچیش وەشەویسی نییەن گرڎش خیاڵ پڵاوێنێ. ئەر ئاڎیچ عاشق بیایا چا ماوانە مەشییایا لایکەمەوە ئیشارەتیەش بە وەشەویسی کەردایا. دڵنیای بە ئاڎ عاشقو تۊ نییەن. ئەر عاشقو تۊ بیایا هیچ کات نەلێ و جیات نازێ. ئاڎ بۊنەو تەنیایی وېشەوە تۊش گەرەکە بییێنی. ئیسەیچ ڕەفېقێش دەورەشا دان و کەم و کوڕیش نییەن و یاگې تۊیچشا پەی پەڕوە کەرڎەن. دڵنیای بە عێشق و وەشییایی تۊ یەک لایەنەن و هیچ دماڕۆیە وەشش نییەن کە دڵو وېت پەنەش وەش کەری.
یا ئەڵڵا ئی کوڕە چېشش وات؟! پاسە بزانوو قسێ هەقێش کەرڎې. شۊنی خوڎاحافێزیرە ڕاسە ڕا وېم یاوناوە یانە. تاکو ڕۊ بیوە ۋیرێم کەرڎېوە پەی قسەکاو سەعیدی. قسېش هەقێ بېنې، بەڵام هیچ کات دڵم قەبووڵش نەکەرڎې.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]