پەیامو ئەنجومەنی فەرهەنگی و ئەدەبی ڕۊجیاری بۊنەو ئامای نۆرۊزیوە
ئاماوە وەهار، وەهاری شادی
بۊی عەتر و نەسیم غونچەی ئازاڎی
ئازیزا وەشەسیایا، ڕازیاوەتەرین سڵام و مەبارەک بادیتا عەرز کەرمې بۊنەو ئامای ساڵې تازێ و نۆرۊزو کوردەواری ئازیزیەوە. ژیوای ئېنسانی بەسیان بە فاڕیای و زەین تێژ کەرڎەیوە، سپیای ملو یەک دۊخی و یەک شېۋاریرە، ماتەمی و حەسرەت و یاس بۊ بە سەوقات و ئەرمەغان پەی ڕۊح و دەروونیت، پەوکای پەنەوازا بە پاڵپەشتی کتېبی و هازەو وانای و بروسکەو تکانێ، دایېم شۊنۊ تازەگەری و خەلقوو هەڵمەتێ ڕەنگینێوە بی. تاوی کووژی وزی و جل و بەرگی تازە و ڕازیاوە و ئاراستەو قۆناغەکاو ژیوایت کەری. خێرەد و ئەندیشە و ویری تازە پېسە ونێ هېزدارێ مجیۊرە دلې دەماری تاکو هەرمانەی هێقمتەرە و پوویاتەرە کەرینە، ڕۊحوو ژیوایت بە هېز مەنۆوە. هەر ئینەن بییەن بایس ژیوگا و سرۆشتیچ یەک هەیکەل و یەک ڕۊخسار نەمەناوە بەردەوام هازاو فاڕیای گېرۆشارە.
همێڎ هەن گرڎیما بە ڕۊحی پێوەرەیی چېرو سێبەرەو ئاوەزی و ئاوەزینە وینگاما ترۆقی فەرهەنگی و گەشەو ئا نماد و مونادا بۊ، جە ڕاساو خزمەتی گرڎینە هەڵمەتەشا دیار و وەرچەمەنە. چوون تەنیا ڕەوایەت و ئەرکوو ئېمە چی سەردەمەنە ئانەی موازۆ ڕەویەو یەک ڕېزی و تێکەڵی پوخت و پاراو کەرمېنە ملو هەیکەلو هۆرامانی ئازیزی، پارېزناو قەڵای فەرهەنگی و کەلتووری مەحاڵەکەیما و پەرەدای بە هەناسەی هۆرامیانەی، عالتەرین وزەن پەی یۊگېرتەی ڕۊحی نەتەوەی و کوردانە و نیشتمانیانە ژیوای، ئینەن تاوۆ جە دماڕۆنە وەرانوەرو تارېخیەوە بە ڕۊسووری و سەربەرزانە قەزاوەتما کەرۊ.
ئارەزوومانە، نۆرۊزێ سەرفراز و سەربوڵند پەی گرڎو نەتەوەی و هۆرامانی سەربەرزی، تێکەڵ بە هەناسەو بەرزەڵنگی و سوورەهەراڵەی، پاڵو فێنکایی قرمەو وەرواواو شاهۆینە، باڵاو نەتەوەییما پلوورەوارانێ ئاسای شکۆدار ڕازنۆوە. خەم و پەژارە ڕۊخساروو خەڵکی و ژیوایما بازۆ جیا و وەشی و برایی و تێکەڵی و سێبەرەو ئاڵاو ئازاڎی نیشتمانی و وەڵاتی گېرۆرە. پا ئاواتە.
دەسەو ڕاوەبەراو ئەنجومەنی فەرهەنگی – ئەدەبیو ڕۊجیاری. 30 مانگەو سیاوکاموو 2025ز.[1]