بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و هەشتا و پەنجەمە
دمای ئەردەڵانی سانەکۍ و ئاغا و بەگەکۍ هۆرامانی مەیان، تاکو سەڎ ساڵۍ چێوەڵی حوکم کەران، تاکو ئیسەیچ وەچەکۍ و نەوکېشان مەنېنۍ، ئا دەسەڵاتۍ هۆرامان و زوان و کەلتوور و کەلەپوورو هۆرامانیشان پەی یەرۍ هەزار ساڵا پارېزنان، سەڎان قولۍ و قەڵێ و ڕێ و شارۍ و شوورێ و بەڼگاوۍ و جۋۍ ئاودارای و مەڕۍ دەسکەردېشان وەشۍ کەردېنۍ، چڼین قەباڵۍ نویسیێ سومەریۍ و ئاشوورۍ و ئارامیۍ دلۍ هۆرامانیەن جیێمەنېنۍ، هەزاران پارچە ئاڵتوونۍ و سکۍ و شمشېرۍ و دەسخەتۍ ئېزیێنێ، مروڤی هۆرامی زیاتەر کەسی ساڎە و زیرەک و دەسڕەنگین و بۍ گرفتەن، فرە هۆڵېشان دێنۍ وېشان جە شەڕەنگېزۍ و جەنگ و جەڵەبەی پارېزنان، خەڵک و خاک و زوان و باخاتۍ وېشان وەشېمسیان، جۊرێ جە وۍ پەرەسییشان چەنەن کە ماکو مەنەیۆشانەن، گەر وەروەڵایی ئی سەڎ ساڵە ویەردەیە نەبیێ فرە حەزشان بە تېکەڵی غەیر جە وېشان نەبۍ، ئانەیچە سیفەتێ مەنەیۆ و بەردەوامی هەر میللەت و نەتەوێوەن، سەختتەرین دایوەنەو بنەچە و ڕەچەڵەکو هۆرامی بە دەسو خان ئەحمەڎ خان کوڕو هەڵۆ خانی میرو ئەردەڵانی بېیەن، کە بە ملهووڕی وېش گەرەکش بۍ مل بە هۆرامیەکا نامنۊرە، تۊقەو هۆرامانو تەختی پایتەختیش دا، گەرەکش بۍ ڕیشەو ڕەچەڵەکو بەهمەنەکا جە بېخ بەربارۊن و شۊرۊشاوە، گردو وەچەکاش بە ژەن و زارۊڵۆ قەتڵ و عام کەردۍ و شکۆ هەزاران ساڵەیشان ماڕاش، دوەم سەدامی نەفرەتی بۍ، کە گردو ناوچەو هۊرامانو لهۊنی بەشو ئێراقیش کۊچ پەنەکەردۍ پەی ئوردوگا زۊرە ملەکا، دەگێ و یانۍ و کاشانە و باخ و هاناۋۍ و کەلتوور و باوە کۊمەڵیەکۍ هەزاران ساڵەیشان جە بېخ بەرئاردۍ، وەختێ گېڵێوە بېجگە زوانەکەیشان کە ئاڎییچ بەشێ فرەش چەنە بیەبێ، هیچی چامنەشان پەنە نەمەنەبۍ.
هۆرامان جە کۊنەنە سنوورش جە ئیسەی فراوانتەر بیەن، سنوورو دەسەڵاتو بەهمەنی یەکەمی جە سنە و کرماشان و لوڕستان و شارباژێڕ و قەرەداخی ترازیابۍ، تاکو نزیک بە ئەهوازی و دهلۆران و کوت و باقوبە و کەرکووک و موسڵ و هەکاری و تەبرێز و مازیندەران و بیجار و سونغر و کەنگاوەر و هەمەڎان و ئەسفەهان لوابۍ، دەلیل پەی ئانەیچە ئا خەڵکە جیامەنېنۍ کە ئینێ هەکاری و زازا و موسڵ و کەرکووک و نزیک باقوبەی و یاگەکانو تەری، کە فرە دوورېنۍ جە هۆرامانی و تاکو ئیسەیچ شېوە زوانو وېشان پارېزنانشان، سەردەمو ئەردەڵانینە بە هۊکارو دڕڼەیی سەفەویەکاوە فرەو ئا سنوورا جە هۆرامانی پڕچیێ و خاکو هۆرامانی بی بە نیمە، هەرچن جار و بار جە سنوورو بەهمەنەکا نزیک بېوە، بەڵام جە کۊتایی ئەردەڵانەکانە سنوورو هۆرامانی جارێتەر بیۆ بە نیمەو میانو سنەی و کرماشانی و شارباژێڕی و سلېمانی و شارەزووری و قەرەداخینە نەترازیا، سەردەمو سانەکانو هۆرامانینە چونکوم بە جەنگی دلېنەو وېشاوە خەریکۍ بېنۍ و ماڵ و مڵک بەشکەردەی مەشغووڵۍ کەردېبېنۍ، ئا سنوورەو کۊتاو ئەردەڵانیچ پەی جاری یەرەمی بیۆ بە نیمەو سنوورو هۆرامانی جە هەڵەبجەی و سەی ساڎقی و پېنجۋېنۍو سنەی و کامیارانی و جوانڕۆی نەترازیا. بە ئامای جافەکا پەی هەڵەبجەی و شارەزووری، گېڵای شۊنەو لەوەڕیرە و دیاریکەردەی سنوورو عوسمانی و ئێرانی و جەنگی وېشانەو میانو میرنشینە کوردەکا و جەنگەکۍ میانو کورد و قاجارەکاو دماتەر جەنگو ڕەزا شای دژ بە سانەکان و بەگەکانو هۆرامانی، هۆرامیەکۍ دەسەڵاتی سیاسیشان نەمەن، دماو ئانەی سنوورو هۆرامانی ئاڼەی تەر وەرتەسک بیۆ، پاسەش سەرئاما هۆرامیەکۍ سنە و هەڵەبجە و پېنجۋېنە و شارەزوور و جوانڕۊشا جیائاستو ئامێوە پەی بنارو کەشەکا. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]