ئەر من سەگڵاۋ بېیێنۍ
نویستەی: #ئاکۆ مارانی#
دەمەو ۋېرەگا بۍ و پەڵەهۆرېۋی سېیاۋ ۋەرو ڕۊجیاریش گېرتەبۍ. دوورۆ دەنگەدەنگو تووتا و خەڵکی ئێۋ. ئاڎ قەراخو ڕۊخانەکەینە مەنەبېرە، چەمېش بڕیېبېنېنە گېجوارڎەو کەفو ڕۊخانەکەی، بازنەو گېجاۋەکۍ پېسەو خولۊ چەمەلېۋەی بۍ. ئاڎ پاسە ۋڕبېیەبۍ، ئەجۍ شۊنۊ چېۋېۋیەرە گېڵۊ.
هەست و ئاۋەزش کۆتەبۍ ۋشکنای هۊش و دەروونو وېش. شۊنۊ وەڵامو پرسیارە هەردەمییەکاو وېشەرە سەرگەرڎان بۍ؛ چی پاسە، چېشم کەرڎ، چ تاۋانېۋم هەن؟ چی مشیۊ تاکو مەرڎەی من کڕۊڵ بژیوو، ژیۋای یان گیرۊڎەیی؟
ئەر ئینە ژیۋای بۊ، ئاخۊ بەڎبەختی چنین بۊ؟
تاکو گۆرە بییا، ئاۋاتم یانېۋ بی، پەڕ چە بېدەنگی و ئارامی، کەچی بە سەردەمو ... موازوو و ئاخ ... .
گرڎ خەتاو وېم بۍ، ڕزگارم بېیەبۍ، فرە ڕېکۆتۍ ۋەرۆ ئامێ و من چە زەنگو هاگاڎارییشا نەیاۋاینە، دەی بوەرە، ئانە دەرڎەت بۊ، تۊ شایېستەنی، فرە چانەیچە زېیاتەر؛ شایېستەو ژیۋایچ نېیەنی!
نا، بەس ئا کەسۍ شایېستۍ ژیۋای هەنۍ، کە چە ڕېکۆتەکا مېیاۋانە و وېشا لامڎا و شۊنۊ سۊزی نمەگنا و هەستی کتوپڕو لەمېشا پەیڕەۋکەرا.
ئەی ئاۋەز و ۋیرۆکەرڎەی چېش؟ ئاۋەز و ۋیرۆکەرڎەی دەسەمۊ دۆروبەری کریێینۍ و زاڎەو هەژموونو ئەۋیشا تەریەنۍ، بەڵام هەستی دەروونی نا، ئاڎ وېزاڎا و چنیما گۆرە بۊ، هەردەم پېسەو ڕانمای ئېمە چە مەترسییەکا هاگاڎار کەرۊۋە و چڵاکنۊمارە.
ئاخ ئەر ئا ساتۍ ... ئاۋەزم مڵکەچو هەستە چڵاکنەرەکەیم بېیێ، ئیسە من دنیێۋی تەرەنە و باریېۋی تەرەنە بېنۍ، من بە دەسو وېم ژیۋایم دلېنەبەرڎ و تۊقۊ بەڼەیی زەمانەیم کەرڎەنە ملو وېم. ڕەنگا من شایېیستەو ژیۋای و ئاسووڎەیی نەبېیەبوو، پۆچی.
شڵپەو سەگڵاۋەکەی ئاڎش چڵاکنارە ... وەشڵێ بە وېت، نە خاۋەنکار و نە حکوومەت، نە مارەیی و نە کرېیانە، نە ژاۋەژاۋو میدیای و نە جەنگ و نە زیڼان، نە زەڕ و نە نان ئەسای.
هیچ مرۊڤېۋ ئېڼەو تۊ بەختەوەر و ئازاڎ نېیەن.
بەبۍ ئانەی ئاڎ بە وېش بزانۊ، هاگاش چە سەگڵاۋەکەی نەمەنە بۍ، چەمېش بڕیېبېنېۋە گېژاۋەکۍ.
تۊ نەزانەنی، هیچەنی، سفرو دماو فارېزەینی. تۊ پېسەو سفری بەس بېیەنۍ بە گۆرەکەرو
کەسا تەری و هیچی تەر. تۊ .. تۊ .. ئاخ تۊ، تۊ پرڎە بېیەنی و ناکەسۍ سەرتەرە پڕێنێ و بەس قورسایی و تۊزۊ بنۊ پاڵاکاشا و تفۍ ئاڎېشا پەی تۊ مەنېنېۋە.
دیسان بە هۊڕینۊ کەشتیېۋی چا خېیاڵەنە چڵاکېیاراۋە. شەپۊلۍ ئاۋەکۍ ڕوەشەرە ئامێ، پاڵێکېش کەمېۋ تەڕۍ بېیۍ. ورڎە ورڎە شەپۊلەکۍ پېسەو تەلیسمېۋی ئاڎی پەی لاو وېشا کېشکەرینۍ. ئاخ شەپۊل، ئەر تۊشا چە من نەکەرڎێنی، ئیسە من چی لیتەنە گیرم نەوارڎەبۍ!
ئینجا کۍ ماچۊ چینەیە خراپتەر ڕوەنەڎۍ؟
بەڎبەختییەن، ئەر مرۊڤ ۋەڵتەر سەرەنجامو بڕیارەکاو وېش زانابېیێ، یاڼزە ساڵۍ بە خېیاڵۍ و چەمەڕایی شەپۊلېنە نەۋېیەرنېنۍ و چی بەڎبەختیچەنە گیرۊڎە نەبېنۍ. ئاخ.....
هەتیم بەخوڎا تۊ گېلەنی، ئیسە ئیتر هیچ داڎ نمەڎۊ، بەس مەرگ. بەس مەرگ متاۋۊ تۊ ڕزگار کەرۊ و هیچی تەر.
ئاخ مەرگېش بېیەن بە یانەسیب و پەی گرڎ کەسی بەرنمەشۊ. ئاخ ... گېیان وەشڵێم بە وېت، بەڕاسی تۊ وەشبەختە بېیەی ئی سەردەمەتە نەڎی. وەشڵێم بە وېت.
ۋەرە ۋەرە شەپۊلەکۍ زېیاتەرۍ و بەهېزتەرۍ بېنۍ. پاسە چەمېش بڕیېبېنېنە، ئەجۍ دەسۍ میهرەبانېنۍ و گېیانی مانیاو ئاڎی شېلا. خەریک بۍ ئارەزوو وۍ فڕەدای ئۆ باوەشېشا سەرشەرە زاڵبۍ و چەمېش کۆتۍ لېۋە.
پڕېۋەنە گەفای تووتېۋی پەشتیشۆ بە تڼی ئاڎش چڵاکنارە و بە تەرسی و پەشۊکېیایۆ بەرەو کەتوار پرنگیاۋە. گەفەو تووتەکەی ئەجۍ ئۆ ئاڎی چڕۊ، پېسەو قیژەو ئەڎێۋۍ، کە ۋینۊ خەریکا زاڕۊڵەکەش قولەبانېۋۆ گنایگنۊرە .. تووتەکە قەپۊزەش ئۆ پەشتۊ دەسۍ چەپو ئاڎی نزیکە کەرڎۆ. مېیاچەماش نېیا دەسشۆ، ئاڎ بەنیمە لاکەرڎەیېۋۆ، پەشتۊ پەنجاش مېیاچەماو تووتەکەیرە ئاۋرڎ. دیش خاۋەنۊ تووتەکەی ڕەو ئاگەی مێۋ، ژەنېۋە نیمەتەمەنە، پەتۊ تووتەکەیش دەسۆبۍ. بە دەنگېۋی سۊزاۋی و ئارامۆ چە ئاڎیش پەرسا؛ خاسنی، خۊ نەتەرسای. ئەجۊم خراب چڵاکېیایرە، پاسنەن؟
سپاس، نا .. نا .. تووتېۋی فرە مېهرەبان دېیارا، تۊ یاۋەرېۋی فرە دڵسۊزت هەن، وەشڵێ بە وېت.[1]