ئەشقی ئەوەشاریا
بەشەی یەرەمە
ئا ڕوە سەرکاو وېش فاڕابێ و جلێ زەریفێش کەرڎېبېنېنە. وەڵێ ئانەیەنە بەیرە وار، شانازەش وەرو بەرەیەنە دیە پەشۆکیەیبێ تەختێویەرە. ئینەشە بە فرسەتێوی عال زانا، شکەش بەردە ئی تەختە مشیۊ هینوو ئاڎې بۊ و گەرەکشا بەرۊش سەر. بې ئانەیە ویر جە چېوېتەری کەرۊوە ئامارە وار و لوا ڕوەشه و و نزیکەش کەوتەو. پڕێوەنە شانازە لاش کەرده و وەنە. دیا سەرتاپایشەرە و بزېوش وست سەرو لچاش و واتش:
سەواخێر سەرکاو گیان، ماشەڵڵا، ئینە پی سەحبەنە پەی کۆگەی ملی و پەی چیشی پېسە وېت ڕازنانەو؟
سەرکاو بە قسەکې شانازێ کوچېو شڵێژنا و بە دەنگېوی نزم واتش:
قەرارا بلوو پەی شاڎی یۊ جە ڕەفێقەکام
-شاڎی بەشت بۊ، ئیشەڵڵا پەی وێچت. بەشکەم پی زوانە دڵوو ئەڎایت و واڵەکات وەش کەری. من مزانوو گرڎ پەلەشانە تۊ ژەنی باری.
سەرکاو پەی وەڵامو قسەکې شانازێ هیچش نەبې واچۊ. دیا پەی تەختەکەی و واتش:
ئەر گەرەکتا ئی تەختیە بەری سەر من متاو یاردیت بڎەو، مزانوو قۆرسا و بە تەنیا پەیت هۆرنمەگیریۆ.
-یاخوڎا دەست وەش بۊ، ئەر زەحمەت نییا با بنیەیمێش دلې ئاسانسۆرەکەی، دمایی وېم بەروش یانە.
قسەکې شانازێ بە ڕۊشنی دیارە بې، قسێ دڵیش نیەنە. حەز کەرې سەرکاو چەنیش بلۊ سەر و تاوێو چەنیش بنیشۆرە. کاتێ تەماشەو ڕومەتوو سەرکاوی کەرې، پەڕ بې جە جوانی و وەشەویسی. کەلاو بې جە شەوقوو ژیوای. کاتێ چەم بڕێنە دلې چەمە ئاشقەکاش، حەز نەکەرې چەمۍ گېڵنۆ لایېوتەرەرە. وێچش نەزانې ئا پەڕچینە هێقمە چېشا ئینا بەینشانە.
شانازە کاتێ تەختەکەش دلې ئاسانسۆرەکەیەنە ئارد بەر و بەردش یانە، جە دەلاقەو هوڎەکېنه دیاراراوە وار، مڎیۊ سەرکاو لواوە پەی یانەی. نزیک بە چارەک سەعاتێو پەشۆکیا تەختەکەیەرە و جار جاریچ چەمۍو وزێ ئه و هاڵەکەو یانەو سەرکاوی. دیسان زەنگوو بەرەی دریاوە وەنە. ئی جارە دڵش خورپېوش کەرد و چەمەڕاو ئا زەنگیە نەبې. دەلاقەکەنە دیارە وار مڎیۊ ماشینێوی سووری وەش ڕەنگ وەرو بەرەو یانەیەنە مدران و بەرەو ڕاڼدەی کریانه و و کەسیچ لاشەنە دیار نیا.
هەرپاسە تەختەکەش ئاست جیا و بە دڵەورکێوە ئامارە وار. نزیکوو ماشینەکەی کەوتەو. بوەو چەرمی تازەی و دەڵقوو سەرو سەندەلیەکا، نیشانە دێ ماشینەکە تازەن. ئا ماشینە چا نۆعیە بې، کە چن ساڵې بې ئاواتش وازێ.
دیا پیلا و پەولاو وېشەرە، دیش کەس دیار نیا. سەرو سەندەڵیەو ڕانەندەیه و عەکسێو و پاکەتێو نریابێرە. عەکسەکەش هۆرگېرت و دیاش پۊرە. وېش بې و مەنسوور کە کاتو دەزگیرانداریەنە گېرتەبېشا. پەشتەو عەکسەکەیەنە چن خەتێ نویسیابێ.
شاناز گیان ئازیزەکېم، مزانوو بە دیەی ئی ماشینیە، چېشت گنۊوە ویر. ئینا ویرتەنە ئا کاتە دەزگیراندارێ بېنمێ و هیچما نەبې؟ تۊیچ فرە حەز کەرېنی ماشینێوی چامنەما بۊ، ئیتر چا ڕوه و چەنی وېم قەرارم دا بە هەر جۊرېو بیەن ئا ماشینتە پەی بسانوو. هەناسەکېم ڕۊ ئەڎا بییەیت مەبارەک بۊ. فرە پەنەم وەشا ئارۊ وەڵێ ئانەیەنە من بەوه یانە، هەنارێ بنیەنە دلې ئی ماشینیە و دەورېوش پەنە دەیەو.
شانازە بە دیەی عەکسەکەی و وانای ئا چن خەتەیە، وەقرەش وەنە بڕیا. چەمېش پەڕێ بییێ هەڵسی و لاشەش تەمیارە. شاڎی و زەوقوو چن ساتێ چاوەڵتەروو دیەی سەرکاویش چەنە ئەسنیاوە، نەزانې ئینە چېشا و خەریکا چېش ڕوە مڎۆ. نەما پاکەتوو چېرو عەکسەکەی و کەردشەو، نامې ساحێبوو شېرکەتوو ماشینەکەیش چەنە بې.
خاتوو شاناز، سڵام و حۆرمەت. وەڵێ گرڎ چېویەنە جە قووڵایی دڵیماوە، سەرەوەشیتا چەنە کەرمې پەی مەردەی کاکەمەنسووری. کاکەمەنسوور مانگێو وەڵێ مەرگیش، ئاما لاو ئېمە و داواو ئی ماشینیشە کەرڎە و واتش پەی ڕۊ جە ئەڎا بییەی سی ساڵەی ژەنەکېم گەرەکما و مشیۊ چا ڕوەنە دیاریم کەرڎەن، ئامادە بۊ. ئېمەیچ بەپاو وادېوی کە دابێما و ئێحترامێو پەی قسەکې ئاڎی، هەر پا جۊرە وېش واتەبېش، ئارۊ سەرو کاتی ئاوردما وەرو بەرەی پەیت.
ئیسە ئی ماشینە هینوو جەنابیتانە، تەنیا چېوێو کە سەرو شمە گنۊ، ئانەنە کە تەشریف باردێ ئېگە تاکو سەنەدەکەیش کەرمې بە نامېتاوە.
شانازە چا کاتەنە سەرەش ئاسەبێرە سەرو نامەکەیەرە و گرەوای گرەوێ، دەنگو پەیاو کەسېویش پەشتەو سەرەیشه و ئەژنەویە. لاش کەرڎەو، مڎیۊ سەرکاوا و شاخە گوڵېوش ئینا دەسەو. بە چەمۍ پەڕ جە هەڵسیوە دیا سەرکاویەرە. سەرەش نیاوە سەرو فەرمانەو ماشینەکەی و ئی جارە بە دەنگی بەرزتەر دەسش کەرده و گرەوای. چەنی هەڵسەکاش حەسرەت و مەراقێ مجیێنېرە وار. کەوتەنە دلې بەربەرەکانېوې سەختێ، جە لایێوه و ویرێ کۊنێ وازش چەنە نارێنێ و کۊڵێشه و نەبېنېوە، جە لایېوتەریچه و ڕۊتوو ژیوای تازەی، هانیش دێ و ڕوەو ئەشقێوی ئەوەشاریای بەرێش وەرەو.
سەرکاو ئاگاش جە هیچی نەبې و نەزانې چېش قۆمیان. بە دەنگېوی ئارام و نزم پەرساش:
چېش بیەن شاناز خانم؟ خوڎانەخواسە چېوی خراب خۊ نەقۆمیان؟
شانازە دیسان سەرەش بەرز کەرده و ڕوەو سەرکاوی و بە دەنگېوی تێکەڵ بە گرەوای واتش:
هیچ سەرکاو گیان، دڵم فرە تەنگا.
سەرکاو کوچېو ماتش کەرد. گوڵەکەش دا دەسشه و و واتش:
ڕۆ ئەڎا بییەیت مەبارەک
کەوت ڕا تاکو بلۊ پەی شاڎیەکەی.
ڕەزا بەهمەنی.[1]