زوانو ئېمە سەربەۋېن
نویستەی: #ئەسعەد ڕەشید#
چېگەو چاکە، دلۍ پۆستە ئەلەکترونیەکانە، جە گلېرۆبییە ئەدەبییەکانە، فرۆ جاری باس جە زوانی کورڎی و باس جە دیالێکتە زوانیەکان مەکریۊن. هەرچن باعزێ جە شارەزاو ئەکادیمیەکا، زوانی هۆرامی بە زوانێ سەربەۋۍ و ئازاڎ مەوینان، بەڵام فرەشان پېسە بەشێ جە زوانی کورڎی حسابش مەکەران .
تەماشاکەرڎەی ئاڎیشا پا جۊرە دڎان نیان پۊرەی نېیەن پەی ئەشناسای زوانی هۆرامی و نیاشەرەی سەرو تەختەو ئەدەبیات و فەرهەنگ و دماجار وانای و نویستەی پەنەش، بەڵکوم وایەشان قوربانی کەرڎەی زوانی هۆرامین وەردەمو پەیاو زوانو وېشان. ئاڎۍ کە ماچان (شېوەزوانەکۍ تەرۍ پەی دۊڵەمەڼکەردەی زوانی کورڎی)، تەنیا هۊرگۊستەی واچە هۆرامییەکان و متەیشان سەرو خەرمانو زوانەکەو وېشان.
بە مەڵامەتو پارېزنای زوانەکەیمان، مەشۊم جە وەشباۋەڕیەو زوانی کورڎی، یام زوانی ستانداردی ڕزگارمان بۊن، چوونکوم بەپاو یاساکاو زوانی هەر زوانێ موداراو قسەکەرڎەیی و نویستەیی و شېعر و ئەدەبیش بۊن، چواچېوۆ یاسا ڕازوانیەکانە گونجیابۊن ، دوڵەمەن جە واچەو دەسەواچا بۊن، بنەماو نېر و مایش چەنەبۊن، ئیتر زوانێ ئازاڎ و سەربەۋېن.
زوانێ پېسە زوانی هۆرامی سەڎەها ساڵۍ زوانو نویستەو شېعرۍ بییەبۊ، زوانێ هەر جە کەرکوک و گەرمەسېر تاکو کرماشان و فرەو سەرزەمینو کوردەوارینە زوانی ئەدەبی بییەبۊ، خانای قوبادی و میرزا شەفیع و کەنوولەی تاکو مەیاوۊ مەلا هۊمەری ڕەنجوری جە گەرمیان، پەی مەولەوی تاوگوزی شېعرېشا پەنە نویستەبۊ، زوانێ وەڵۍ چوارسەڎ ساڵا چێوەڵی بېسارانی و مەلا پەرېشان پەنەشا نویستەبۊ، زوانێ وەڵۍ هەشسەڎ ساڵۍ چېوەڵتەر زوانو نویستەو شېخ عیسای بەرزنجی بییەبۊ، خێرەن ئیساتۍ گېراشەرە پەی ئاسو لەهجەی و شېوەزوانی؟ خێرەن مەکەراش بە بەشێ جە زوانی کورڎی کە وېش بنەچەو زوانی ڕەسەنی کوردی بۊن؟
چا زەمەنە وەڵینەنە کە زوانی هۆرامی زوانو نویستەی بییەن، زوانی کورڎی چکۊ بېیەن هەتا ئێساتۍ مەکەراش بە ئەڎاو زوانی هۆرامی.[1]