بەشێوە جە ڕۊمانو (ئەلەپەشە)ی
نویستەی: #ئیبراهیم میکە عەلی#
جافرسان پیاێوە باڵا مییانی قەڎ و باڵا ڕېکی شیکپۊشی وەشپەنەکەوتە بې، سنعەش دەورو پەنجا ساڵێوەنەبې، چۊخە و ڕانکێوە شینکیش وەرەنەبې و بیبینێوە ئەنگۆرەی گوڵگوڵینش بینابێ و ڕوەو وەریۆ یەرێ لکېش دێبېنې بیبینەکەیش و خەنجەرێوە دەبانەی چەرمێ دەسە تەوەنینەش کەرڎېبێ چېرو بیبینەکەیشەرە و هیتێ تەسبیحێ زەردێ کارەبایێش پېچنێبېنې دەسەکەیشەرە، دەسەسڕێوە ئاوریشمش کەرڎەبێ وەرو بیبینەکەیشەرە و پەسەکێوە شینکیش کەرڎەبێ شانەی ڕاسش و هیتێ کڵاشێ گیوەیێش پانە بېنې، سان عادەتش چانەبې هەرگیز کڵاشێ نەوزێ سەرو پەیا و هەمیشە پاڵا و کڵاشش تڼ و توڵ بې، کە ئەفراسیاو بەگو هامڕێکېش دوورۆ بەرکۆتۍ فەقیانەچەرمەکېش تڼېش کەرڎېوە و کېشە داوڎبەگیەکې سەرەیش کوچێ هورشبڕنا و بە پەلە وەستەرە پەی حەوش و حەسارو وەرو دەمو باڵەخانەکەی، دەسورشدا پاسەوانێ کۊشکێ بەرەو باڵین کەراوە و ئامادێبا، دوې تفەنگچیێ خەڵکو دەگاو شۆشمېچ شۊنیشۆ بېنې ئاڎیچێ پۊشتێ و پەرداخێ و یۊ تفەنگێوە پەنج تیرشا شانۆ بې و فیشەکلۆخێشا بینێبېنې.
کە مێمانەکې یاوێ وەرو دەروازەی وارینی، پاسەوانو دەروازەکەی بە قەدرۆ لوا دەمشاوە و وېش نامنارە و واتش: جەنابو سانی چەمەڕاتانە، کەوت وەڵێشا پەی دلې حەساری.
ئەفراسیاو بەگ وەستەرە و هەڵای هەوسارو هەسەرەکېش دەسشۆ بې، هەربەنەکەو کۊشکەو سانی هەوسارەکەش دەسۆ گېرت، ئەلەپەشە و کوڕەکېچ شۊنیشەرە سەرو وەڵاخەکاشاوە پڕێرە و وەڵاخەکېشا دێ دەسو مەیتەراوە، گرڎ پێوە لوێ ڕوەو جافرسانیۆ، جافرسان کەوت شکۆ وەڵێنە خێرئامای ئەفراسیاو بەگی برازایش کەرۊ یام ۋەرو ئانەیە کە جەنگاوەرێوە نامېن و براش جەنگەنە کوشییان خێرئامای ئەلەپەشەی کەرۊ، ۋەرو ئانەیە ئەلەپەشە قبووڵش نەکەرد گنۊ وەڵێ ئەفراسیاو بەگی، جافرسان تۊقە و خێرئامای گەرمو ئەفراسیاو بەگیش کەرد و باوشیش کەردۆ پەی ئەلەپەشەی و واتش: کاکە ئەلە خێربەی و وېتا وەشێ بیدێ، هەرچڼ ئا سەردەمە کۆتاییش ئاما وەلێم کوشییای یارەی برایت لامۆ سەخت بې، وەلێم کە ئەژنیم چەنی هەقەت سانان کوچێ ئافاقەم پەی ئاما، دوې یەرێ جارێ ئی لا و ئۆ لاو یۊترینیشا ماچ کەرد، جافرسان باوشێوە گەرمەش کەرڎە ئەلەپەشەیرە و واتش: یاخوڎا هەر مەنی و ناحەزێچت ڕسوێبا، دمای ئاڎی کوڕەکې ئەفراسیاو بەگی هەردۋی ئامێ وەرۆ و دەسو سانیشا ماچ کەرد، دمای ئاڎیشایچ بارام براو ئەلەپەشەی ئاما دەسو سانیش ماچ کەرد، مەیکە کوڕو ئەلەپەشەیچ لوا دەسو سانیش ماچ کەرد، سان دلېچەماو مەیکەیش ماچ کەرد و دەسێش وست سەرو شانەو مەیکەی و واتش: ماشەڵڵات وەنەبۊ کوڕێوە کوڕو کاکە ئەلەی بۊ هەر ئەشۆم چینە بەرپشۆ.
مێمانەکې بە ڕیز چەولاوە مردێ، جافرسان بە ڕوێوە وەشۆ و بە ئانارەو هەردۋۍ دەساش خوڵکەش کەرڎې و وېش کۆت وەڵێشا و پلیکانەکارە هوروەستێ سەر، پاڵاوەژەنە پاڵێشا وەتێ و لوێ دیوەخان.[1]