ئەیوب سۆباشی بە شېش ساڵۍ و یەرۍ زیڼان سزا دریا
هۊرگېڵنای: #ئاکۆ مارانی#
ئەیوب سوباشی، سەرۊکی ۋەڵینو کۊمەڵەو پەیجۊرییە کورڎییەکا چە ئیستانبوول، به تۊمەتو (ئەندامەتی چە گرووپۍ تیرۆریستتتیینە) به شېش ساڵی و یەرۍ مانگۍ زیڼان سزا دریا؛ پەیۋەنییۍ تەلەفۆنییۍ چە بارەو فېرکەرڎەو زۋانی کورڎی، چالاکییۍ کۊمەڵەو پەیجۊرییە کورڎییەکا و بەشداریکەرڎەی چە ناڕەزایەتییەکانە، ئانۍ پېسەو بەڵگا ئا دادگەییکەرڎەییە و سزادایەکەی هەژمارۍ کریێبېنۍ.
بەپاو جاڕداو کوردپرێسی، ئەیوب سوباشی، سەرۊکی ۋەڵینو کۊمەڵەو پەیجۊرییە کورڎییەکا (Komeleya Lêkolînên Kurdî) چە ئیستانبول، به تۊمەتو (پاگەڼە کەرڎەی پەی گرووپۍ تیرۆریستیۍ) و (ئەڼامەتی چە گرووپۍ تێرۆریستیېنە به (6) ساڵۍ و (3) مانگۍ زیڼان سزا دریا. ئا سزێ چە ڕېکۆتو 18ی ئۆکتۆبەری (2024ز.) چە جەلەسەو دادگاو تاۋانی شماره (24) ئیستانبوولی بەرشېیەن و چی دماییاۋە ورڎەکارییەکېش ۋەڵێکریێنېۋە.
دادگا دلۍ پەیلۋاکەو وېشەنە، بەشداریکەرڎەو (سوباشی) چە کۊمەڵەکانە، چالاکییەکۍ کۊمەڵەو پەیجۊرییە کورڎییەکا، قسەکەکەرڎەییە تەلەفۆنییەکېش چنی کەسانېۋی که وازیارۍ فېربییەی زۋانی کورڎی بېنۍ و هەرپاسە پۆستە ۋەڵێکەرڎەکېش چە تۊڕە کۊمەڵایەتییەکانە پېسەو بەڵگەو سزاداکەی ئاماژەشا پنەدریان.
چالاکییە ناڕەزایەتییۍ و جارداییەکۍ پېسەو بەڵگەو تاۋانی چە ڕیزو ئا چېۋانە بېنۍ، کە دلۍ ئا پەروەڼەینە پېسە (تاۋان)ی نامۍ بریێبېنی، بییەی نامۊ (سوباشی) چە بەیاڼامېۋەنە به بۊنەو ساڵیاڎو دەسگیرکەرڎەو عەبدوڵڵا ئۆجەلانی و بەشداریکەرڎەی چە ڕاپیماو (دژو بەکاربەرڎەی چەکی کیمیایی)، کە دلۍ ئا ڕاپیماینە، درووشمۍ پېسەو (چەکی کیمیایی، تاۋانا دژو مرۊڤایەتی) دریێنۍ، که بە پەیلۋاو دادگای پېسەو بەڵگەی دژو ئاڎی بەکاربریێنۍ.
هەرپاسە، ۋەڵابییەی دۋۍ هەۋاڵا چە ئەکاونتی کەسیی ئاڎینە چە تۊڕە کۊمەڵایەتییەکانە، چا چېۋا تەریەنۍ، کە ئاماژەدریێنۍ. یۊ چا هەۋاڵا پەیۋەست بە دماییئامای مانگېرتەو وارڎەین چە مانگۊ سێپتەمبەرو (2021ز.) و هەۋاڵەکەی تەریچ چەبارەی مەراسیمو ئەسپەرڎەکەرڎەی (غەریبه گزر)ۍ بېیەن، ژنېۋۍ زیڼانییە که بە شېۋېۋی گوماناۋی چە زیڼانەنە گیانش چەدەسدابۍ. بەکاربەرڎەی واژۊ (شەهید)ی بېیەن دلۍ ئا پۆستانە، کە چە لایەنو دادگایۆ پېسەو (پاگەڼەکەرڎەی پەی گرووپۍ تیرۆریستتتییۍ) نیشاندریان.
[1]
[2]