پەراوېزو ڕۊمانو (ئەلەپەشە)ینە
بەشەی دوەمە
ڕاوچی و ڕاوە:
گاڵتەتا پی پشتییە پەلینێ نێ کە ئینا چېرو شانەیمەنە و واچدێ گوناحش یاوۆ ڕاوە کەرۊ و گېیانەوەرەکا دلېنە بەرۆ، من حەق مڎۆ بە ڕاوچی، کاتو وېش ڕاوچی جیاواز بې جە ڕاوچی ئیسەی، ڕاوەو ئۊسای پېسەو هنەو ئیسەی نەبې،
ڕاوچیەکې ئا بەدبەختێنێ کە گەنجینە سەدان تێرێشا شانێنێ و دڵ و یوېشا نەبییەن پۆ، ئیتر دماتەر ئینە دلېشانە مەنۆوەو و ئاراستەو تیرەکاشا واڕا و ڕوە کەرا ڕاوەو گېیانەوەرەکا.
وە نەبۊ ئی ڕاوچیێ چێنە حەزکەرا بە کوشتەی نێچیرەکا، نا چەنی گرڎ تیرێ کە شاناش ئا تێرێشا ویر گناوە کە شانێنېشا پەی ئانەی ژیان بدا بە کەسې و ژیانو وېشا کەرا قوربای، پەوکای چێنه چەنی پێکای هەر نێچیرێ وەڵێنە کسپەو دڵو وېشا مێ، ئەرۍ وەنەشا مەگېردێ ڕاوچیە ئەسڵیەکې عاشقە ڕاستەقینەکېنێ، عاشقە ڕاستەقینەکې ئانێنێ مەیاوا لاو یۊی و مەبا پەی یۊی، پەوکای چەنی مجېیاتی ونەو نێچیرەکا زوخاوەکاو دڵیشا مجا.
وەشا سیایا ڕاوچی ئەسڵی هەر کات ملۊ کەشەرە، سروشت وېش کەرۊوە پەیش، سروشت نێچیرش پېشکەش کەرۊ، سروشت ئا نێچیرەشە پېشکەش کەرۊ کەخەریکا بېعەیەبی کەرۊ چەنی سروشتی، بېیەن بارێ سەرو سروشتیوە.
پەوکای ڕاوچی ئەسڵی تەوازن و سروشتی تێک مەدۊ، هەر چەنی گېیانەوەرێ نێچیرگر بە واردەی نێچیرەکەی تەوازنو سروشتی پارېزنۊ.
3- دیمەن و ساوەر چنیەو ژەنا:
دلې ڕۊمانەکەینە دیمەنێ ساوەرچنیەیش چەنەن، دلې ساوەر چنیەینە چېش هەن؟
کاتېو ژەنی ساوەر چنۆ و ڕېزەکاو دلېش لابەرۆ، چاوە چەنی ساوەر چنیەکەی خېیاڵ بەرۊشۆ سنعەو گەنجیش و چەنی چنیەی گرڎ ڕېزێ ئا داواکارېشە ویر گناوە کە ئامێنێ داواش و ڕەفزێش کەرڎېنێ و دلې دڵیشەنە ناستێنېش، کاتێ مێ سەرەو ئانەی کە وېش گەرەکش بېیەن و دڵدارش بېیەن و کەسېوەش ناستەن یاوۆش پەنە ئا ڕېزێ مەچنۆو دلې ساوەرەکەینە مازۆشۆ.
کات و واردەی ساوەرەکەینە ئا ڕېزە گنۊ وەرو دانو ئا کەسی کە ڕېگر بېیەن جە یاوای بە دۆسەکەیش.
میقداد محەمەد ئەمین.[1]