واچۍ (ئاداد)ی چ مانێوە مەبەخشۊن
ئاماڎەکەرڎەی و هۊرئەوەگېڵنای: #ئەسعەد ڕەشید#
(داد) بە واتاو داڎ (عدل)و ئارۊی ئامێنەو بەشێ فرەو پاشاکاو ئەشکانیچ نامېشان بە (داد) کۊتاش ئامان، یام دماگیرو (داد)ی بە نامەکېشاوە بییەن.
ئارۊ واچۍ (داد)ی جە هۆرامان بە شېوەو (تات = تاتە)ی بەکارمێ و جە ئۆرووپاچەنە (داد) بە واتاو (تاتە)ی بەکارمێ، زیاتەر ئینگلیزینە.
ئامڕازۊ (ئا)یچ، جە زوانی ئاریایی کۊنەنە جە ئاڤێستانە بە واتاو (نەفی)مێ، یام بە واتاو (زدد)ی مێ، پا جۊرە گەر (داد) بە واتاو (تاتە)ی ئاما، ئا کاتە (ئاداد)، بە واتاو (دژە تاتە)ی مێ کە (ئەڎا)نە، ئانەیچ نازنامېنەو نامۍ هەرەقەتینۊ ژەنەکۍ نېیەنە.
پاسەبۊ، فەرمانداریەکەو ناوچەکانو هۆرامانی جە دەمو ئەشکانیەکانە بە نامۍ (ئاداد = ئەڎا)ی بییەن، کە حاڵی حازریچ جە هۆرامان ئا نامۍ هەنە (ئەڎا). وەڵۍ ئانەی چېگەنە بزیەیمېرە، مەشۊم ئانەی بارمۍ وەرچەماما هەکە ژەنی کوردەی بە تەوانا و چەنەئامێ نەبەزیێ، دەمێوەن تارېخی باسکەردېنۍ، پەی نموونەی جە سەردەمو دەسەڵاتو (مادەکا)نە دمای داگیرکەرڎەی (نەینەوا)ی و ۋڕنای دۆڵەتو ئاشووری، نەینەوا کریا بە ستراپنشین و ستراپەکەیچش ژەنی میدییە بۍ، هەر پېسە (سترابون)ی باسکەرڎەن.
چەولایچۊ کاتێ یاومۍ سەردەمو فەرمانڕەوایی عەباسییەکا، بە دیاریکریایی سەردەمو فەرمانڕەوایی (ماموون) کوڕو هاروونە ڕەشیڎی، پاسە مەگنۊ وەرچەماما کە ناوچەکۍ هۆرامانی، چا دەمەنە هەڵای موسڵمانۍ نەبیېبېنۍ و (ساڵانە) بە دۆڵەتو عەباسی دېنۍ، چا سەردەمەنە خانمێ فەرمانڕەواو هۆرامانی بیېنە، هەرچن نامەکېش ساغە نەبیېنۆ، بەڵام ساڵەو دایوەنەی سکەکۍ کە بە نویستەی عەرەبېیەن، مەگېڵۊوە پەی (230)ی کۊچی.
دماتەر جە سەرانسەرو فەرمانڕەوایی سەتراب (سان)ەکا هۆرامانینە، کە ساڵەو (442)کۊچی، نامۍ فەرمانڕەواییشان جە تارېخوو هۆرامانینە ئامێنەو ئا تارېخیچە تاکو دەمو دەورەو شاهەنشاهی پالەوی بەردەوام بییەن، بەیناو بەین چن ژەنێ جە هۆرامانو (لهۊنی و تەختی)نە پېسە (سان)ی نامېشان ئامێنە.
- خاتوو هۊریزاد سانە
- خاتوو منیرە سانە
- ئامینە خانمە، کناچۍ ئەفراسیاو بەگی
- ئافتاو خانمە کناچۍ غەفار بەگی
- عاسۍ خانمە کناچۍ مەحمووڎ خانو دزڵیۍ
- نەجیبە خانمە کناچۍ مەحمووڎ خانو دزڵیۍ
- کەلسوومە خانمە
- بەدریە خانمەو جەمیلی
- خاتوو خاڵۍ
- سۊفی مروەتە (خەلیفۍ شېخ عومەرو بېیارۍ و دماییچ هینەو شېخ عەلادینو بېیارۍ)بیېنە.
بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]