زوانی یۆگیری هۆرامی و چن خاڵێ پەی وەرچەم گېرتەی
بەشۍ چوارەمە
هەر کام جە بەشێ جە کوردستانیەوە و جە سەردەمېوەنە بە ئا زوانە شێعریە شێعرەشا واتێنە و ئینە ئانەیە مېیاونۆ کە ئی زوانە زوانێوی گرڎگیر بېیەن. خانای قوبادی جە وەڵینەو (خوسرەو وشیرین)یەنە بە زەریفی ئیشارە کەرۊ کە ئی زوانە کە خەریکا پنەش (خوسرەو و شیرین)و نێزامی گەنجەوی هۆرگېڵنۆوە، زوانی کورڎیا و گرڎو کوردەسانی بە ئی زوانیە حەز کەرا، یانې خەریکا ئانەیە ماچۊ کە چا سەردەمەنە ئی زوانە زوانی ئەدەبی فرەو کوردا بېیەن. چاگەنە کە فەرماوۆ :
ڕاستەن مەواچان فارسی شەکەرەن
کورڎی جە فارسی بەڵ شیرینتەرەن
پەی چېش؟ نە دەوران ئی دنیای بەڎکېش
مەحزووزەن هەرکەس بە زوبان وېش
مەعلوومەن هەر کەس بە هەر زەبانێ
بواچۊ نەزمێ جە هەر مەکانێ
وېنەی عەرووسان زیبای موشک چین
بکەرۊش جە حوسن عێبارەت شیرین
خارج جە مەعنی نەبۊ مەزموونش
کریابۊ چوون شێعر جامی مەوزوونش
جە لای خێرەدمەند دڵ پەسەند مەبۊ
شیرینتەر جە شەهد شیرەی قەند مەبۊ
جە عەرسەی دونیای دوون بەدفەرجام
بە دەستوور نەزم نێزامی تەمام
بە لەفز کورڎی کوردستان تەمام
پېش بوان مەحزووز باقی وەسەلام.
هەرپاسە کە وینمێ خانای قوبادی ئی زوانە شێعریە بە (لەفز کورڎی) نامې بەرۆ و ماچۊ من ئی داستانێ کەروەوە لەفز کورڎی تاکو گرڎو کوردستانی حەزش پنە کەرا. کە پاسەنە ئا زوانە شێعریە زوانێو بېیەن کە گرڎو کوردستانېیەنە ڕەواجش بېیەن و شێعرێش پنە نویسیاینێ و هەرپاسە کە واتما بە تەماشا کەرڎەو نامۆو شاعێرەکاچ و ئانەیە کە جە کام مەحاڵوو کوردستانیەوە بییێنێ ئی واتە عالتەر سەلەمیۆ.
عەبدوڵڵا حەبیبی.[1]