نامۍ: ناسر
نامۊ تاتەی: موحەمەڎ
ڕۊ پېڎابییەی: 1962ز.
ڕۊ مەرڎەی: 2020ز.
یاگۊ پېڎابییەی: #تەۋېڵۍ#
یاگۊ مەرڎەی: #تەۋېڵۍ#
$ژیۋاینامە$
ناسر موحەمەڎ کەریم، ساڵەو (1962ز.) جە شارەکڵەو (تەوېڵۍ) پېڎا بییەن، هەر ئەچاگە لوانەنە وانگای سەرەتایی و قۊناغەکېش بڕیېنۍ و دماتەر جە ساڵەو (1979ز.) پێمانگاو کشتوکاڵیش جە بەکرەجۊ، شارو سلېمانی تەمامنان. پېسە فەرمانبەرێ بېوېنە و دڵسۊز و خەموەری جە هۊبەو کشتوکاڵو بیارۍ دەسبەکار بییەن و یۊ بییەن چا کەسە ژڵېو و
دڵسۊزا کە تەمەنو فەرمانبەریشەنە یاگە دەسش دیاربییەن. ئی شاعېرە هەس و ناسک و ناخ پەڕ جە واچە مرواریە، دۊسو ژیوگای، یەکەم ڕۊ پاییزی ساڵەو (2020ز.)، بە هۊکارو نەوەشی سڼانی یانەئاوایی یەکجاریش جە دنیێ کەرڎەن.
چن نموونێ جە شېعرەکانو کاک ناسر موحەمەد کەریمی:
خەمەکېم:
ماچا دێڕەکېت چی خەماویېنۍ
یا هاوارەکېت، بەرزتەر جە وېشا
واتم: خامەکەم فېڵاوی نېیا
گەر کەرۊ باس و ئی گرڎو ئېشا
ئەر گېڵی دلۍ دېڕەکامەنە
زیاتەر جە بەشېم، خەمېم کۆتېنۍ.
ئی شېعرۍ ڕېککۆتو (16_04_2020ز.) نویستېنەش.

ۋەرو چەما:
ڕۆت و لەنجەت چن وەش گنۊ؛
ۋەرو چەما!!!
زوڵفې وەشېت ونارێنې نمارەشا
ۋەرو چەما!!!
ملەوان و گەردەنیتۆ موورې کەوېم کۆتە
ۋەرو چەما!!!
کەم بزیەرە ۋەرو بەرەی بەخېڵېنې!
ۋەرو چەما!!!
مەرحەباکەت ئیشارەبې دەسېت ۋستې
سەرو چەما!!!
جوابم، بې، جېیاتی جارېوی سەد جارې
سەرو چەما!!
قەسە سەرت گەر کوشتېما، بە مەرحەبا؟
سەرو چەما!!!
داواکەرە، داواتەنە، گرڎ داواکېت
سەرو چەما!!!

کۊپڕا:
یانەکۆ دڵیم، سەرڕېژ جە خەما
چن سەرد و سڕا
خەڵکی دڵوەشا، ماچا وەهارا
پێ من کۊپڕا
با وەهاریچ بۊ، پایینو کەشا
ڕەنگین برمانۆ
تەنها گۆراڵې، ڕازۊ پەنهانی
وەهاری زانۊ
ئېشېم مانیێنې دلې دېڕانە
ڕاشا مەباوە
پەنجەکې دەسیم، تەنها پێ جگەرەی
باوەشی کەراوە
با بە پ‌ېکېو تەر، ئې شەو ئېشەکېم
گرڎ سڕې بانې
تەمۊ ماتەمو، ساڵا وېیەردێم
سەرۆ لادانې
وېچم مەزانۊ، پی گرڎ ئېشاوە
چنی مژیۋوو؟ چنی مەنەنا؟
تۊ واچی چەمېم، دروې نەڎانې، من
شکەم هەنە کە نەمەردەنا
ڕەنگا پەنجەکېم، دامەنو نازو
تۊشا گرتەبۊ
نەرمە نیگاکېت، بەرۆ مەرگیشا
جە من بەستە بۊ.
کۊبەرهەمو هۊنیەر (ناسر موحەمەد کەریم)ی، جەمکریانۆ و چاپکریان، بەڵام هەتاکو ئیسە نەلان وەردەسو وانەرا و ڕۊشنویرا.
ئەسعەد ڕەشید.[1]