هاواری ئینسانی
ڪتێبوو یادەوەریەکاو ئیسماعیل بېشکچی، کتېبوو زاڵ بییەو فام و ئێنسان دوسین سەرو ئاۋەزی عەشیرەتی و دماکەوتەیرە، کتېبوو زاڵ بېیەی دۆنیاو زانستی و ئازایەتین سەرو نەفامی و شۆنکەوتەیرە.
یەرێ کەسې بە نامې؛ زیا گۆکئاڵپ، عەبدوڵڵا جوودەت، و یوسف ئاکجورا ڕۊڵی فرەشا بېیەن سەرو ئەرەمەرزناو ناسیونالیزمی تورکی و سەر هۊردای کەمالیزمیرە. چی یەرە کەسەیە زیاگۆکئاڵپ و عەبدوڵڵا جوودەت کوردێ بېیەنێ و یووسف ئاکجورایچ تورک. جوودەت بنیاتنەروو پارتوو ئێتحاد و تەرقی بېیەن، پارتیە کە ڕۊڵی سەرەکیش بېیەن بە درێژەدای بە ناسیونالیزمی تورکی.
ئا ناسیونالیزمە تورکییەش مەرزنانەرە، بېیەن بە هۆ کۊشتارو سەدان هەزارا و نکۊڵی کەرڎەی نەتەوەو کورڎی. ئی ناسیونالیزمە باوەڕش بەدەسەڵاتوو نەژادوو تورکین و ئێنسانی کۊردشا دیل و چېر دەسەو وېشا زانان.
بەڵام ئارۊ کەسایەتییە بە نامې ئیسماعیل بېشکچی کە وېش تورکەن و دژایەتیش هەن چەنی پان تورکی، هاوار مەکەرۊ ئیتر وەسېن قات و قڕ کەرڎەی. بەڵام بەداخەوە ئێسەکانێچ فرەو کوردا بۊنەو ئایدولۆژیشاوە کە شۆنکەوتەوە ئەردوغانینێ، (ئا ئەردوغانە کە بەڕاوەبەرو ئایدۆلۆژی کەماڵ ئاتاتورکین) ئی هاوارە بەرزەشا گوش نەگېرتەن.
هاوارو بیشکچی هاواریوەن باسوو دژایەتی سەرو دیل کەرڎەو ئێنسانی مەکەرۊ. هاواریە کە داخوازیش ئانەن ئێنسان وېش جە کۊڵانە تەنگە بەرەکاو ڕەگەزپەرەستی و هەرجۊر ئەیدولۆژیاییە نکۊڵیکەر نەجات بدۆ و پالوو فام و ئاۋەزیەتینە ڕېز مەنیەورە پەی ئێنسانی بژیۆ.
مامۊستا شېرکۆ بېکەس پەی ئیسماعیل بېشکچی منویسۆ:
دارێ وتی؛
ئېمە ئێستا کە ناتوانین شەقامێکی دیاربەکر بەناوی تۊوە ناو بنیین
گۆڵێ وتی؛
ئېمە ئێستا کە ناتوانین باخچەیەکی نێو قامیشلێ بەناوی تۊوە ناو بنیین
و...
ئەوەی ئێستا کە ئېمە ئەتوانین بیکەین
هەر ئەوەیە وەک گوڵ و شێعر و ئازادی جە گېیانماندا هەڵتگرین.
سەرکەوت عەزیزی.[1]