سەفەرو مەولانا خالیدی نەقشبەڼی پەی هیندستانی

مەولانا، دمای ئانەی سەفەرو حەجینە مەگېڵۊوە، دلۍ خانەقاکاو سلێمانینە خەریکو واتەیۆ دەرسی شەرعی و ئایینین، بەڵام نېیازو لواکەیش پەی هیندستانی پەی فەقیەکاش ئاشکەرا کەرۊن، ئاڎییچۍ هەرچن هۆڵۍ مڎان پەشیمانش بکەراوە، بەڵام ئیسفاڎەش نېیەن. مەولانا سلێمانی جیامازۊن، سنوورو ئێرانیرە مەگنۊ ڕا، موکریانەرە ملۊ تاکو مەیاوۊ تاران، چاگە چەنی موجتەهیدە بەنامبانگەکا شېعەی مەگنۊ واتەو جوابدایۆ، مەولانا گیرشان مڎۊن، هیچشان پەنە نمەکریۊ. مەولانا درېژەو سەفەرەکەیشەنە ملۊنە خزمەتو ئارامگاو بایەزیدی بەستامی و ئیمام عەلی ڕەزا کوڕو ئیمام موسای کازمی و زیارەتو ئارامگاو شېخ ئەحمەڎی جامی.
سەفەرو مەولانای دوورو درېژەن، شارو (هەرات) ی جە فغانستان، قەندەهارو کابوول، ملۊنە خزمەتو زانا نامڎارەکاشا، پەرس و ڕاشا وەنەکەرۊن، ئاڎییچۍ جوابش مڎاوە،
نامونیشانو (شېخ عەبدوڵڵای دەهلی) وەرگېرۊن، جمۊرە ڕوەو هیندستان، بە ماوەو ساڵێ ئینجا مەیاوۊ وەرۆ، ڕۊ پەنج شەممەی تەشریفش مەیاوۊ دلۍ شارو (جەهان ئابادی) ، پەی سەوایشۆ کە ڕۊ جومعەیەن، ملۊنە خزمەتو شېخ عەبدوڵڵای دەهلی. ئەچاگە شېخ عەبدوڵڵا فېرو ئادابو تەریقەتو نەقشبەڼییش کەرۊن، مەولانایچ دەسکەرۊ بە سلووک و بەجائاوەردەو ئادابو تەریقەتی.
پا تەرزە ماوەو پەنج مانگانە مەولانا مەبۊن بە یاگۍ وینگاو شېخ عەبدوڵڵای، هەم سینەش مەبۊن بە یاگۍ تەجەللاو نوورو هەقی، مەولانا ڕۊ بە ڕۊ مەقامش بەرز بۊوە، تاکو مەیاوۊ بە پلێوە باڵا، ساحېبو کەراماتی، ئیتر شېخ عەبدوڵڵا ئیجازەو ئیرشادیش خەڵات کەرۊن. هەرچن دۆرو خولو شېخ عەبدوڵڵای پەڕەن مورشیدو عاریفۍ گۆرۍ، بەڵام مەولانا خالید دلۍ گردینە دیارەن، زیرەکی و وریاییش چاڎییشا فرەتەرەن، پەوکەی بە ماوێ کەم یاگەو مەقامێ باڵا گېرۊن، مەبۊن بە یاگە بڕواو شېخ عەبدوڵڵای.
ئەسعەد ڕەشید.[1]