ئارۊ قەڵەمێ ڕەنگینو هۆرامانی جیائاستیمی

مامۊسایا، نویسەرا، خامە بەدەسا، ویرمەڼا کوردستانی، بە تایبەت مەحاڵوو مەریوانی و هورامانی.
چن داخێوی قورسی هاگادارتا کەرمېوە کە موتەرجێم و نویسەری بەرجەستە، مامۊسا ئەحمەد موحەمەدی (مامۆ ئەحمەد) ، ئارۊ یەکشەممە (22-10-2023) جە شاروو سنەینە، پەی هەمیشە یانەئاواییش چنی کەردیمێ. پی بۊنەوە سەرو بڕیاری قەرارەن دما نیمەڕۆو ئارۊی، دەگاو دزڵیەنە بە بەشداری نویسەرا، خامە بەدەسا و دڵسۊزای فەرهەنگی و ئەدەبی و کەسایەتیەکا و جەماوەروو دەگاکێ، مەراسێموو ئەسپەردەکەردەی بلۆ ڕاوە.
زیڼە یاڎ (مامۊ ئەحمەڎ) ماوەو ژیوای وېشنە نزیکوو چل پەنجا کتېبێ تارێخیێ پەڕ بایەخێش جە حەوزەو تارێخی هامچەرخیی کوردینە هۆرگېڵنایبێنەوە سەرو زوانی فارسی و چاپێ بیێنی و چن کتېبێوەیچ چاپێ نەبیېنۍ و تاکو دمایین چرکەو ژیوایش چالاک و ئەکتیڤ بېیەن جە نویستەی و خېزناینە.[1]