ئاخ نیشتمان
نویستەی:کوورش ئەمینی

وەڵاتەکەم، ویر و یاڎمەنه، هاوار کەرۊنه و گرڎ ڕۊ چڕایم چڕۊ ونه، وەرم مەڎۊنه و منیچ هەر پاسه، هەڵای که هەڵای تاپۆ و جەستەکەم، پەڕا جهبۊ وارانی و کەیڵۆ دلێ مڵکا و نسرمی خاکی.بۊ وەنەوشەو قەراخوو دەرەی و شانیکڵەو دلێ سەوزەڵانی وبۊخشکەو کەشی و مەحڤوو قامەتوو نینۆری و تاڵیندۆسی. هەڵای که هەڵای وەرپڕوو ڕۊجیاریم وەش مسیۆ. وەرە زەرڎەو شاهۆی دووری و دەربەن و سنێخاڵ و پسۆ خێ سەروەشم کەرا و بەرامەنه ویرێوی قووڵ و غەریب. ئیسەیچ تیجیۆ ڕۊجیاریم وەش مسیۆ که تریشکۆ مایگەزەن و وەزەنه بەرزەکانه، مڎۆره قەڎپاڵ و لانسارەکا. وەتەن هەڵای نمازۊم جگا و منیچ ئاڎی. نمازۊم جگا و خوڵکەم کەرۊ تاکو گۊشم بسپاروو به خوڕەو هانەچەمەکاش و قاسپەو ژەرەژەکاش. لوورەو وەرگەکا و گەفەو تووتەکاش. دیامانوو خڕه چەرمەی و دیارگاو قەڵوەزا. نەرمی هەڵچەکا، هەراڵەو بەیا و ماس و دۊ مەیا. زوانی بێگەردش و ئینه منەنا که ئاڎی میۆزوەوه و عەشق و وەشەسیاویش، یامکەتی ئاڎا نەرم و نیانیم مڎۆ و دڕەیەکا بەر مارۆ پامەنه. ویرم مارۆوه گۊ و هەرزەلۆ تەنیاییم هۆرمشانۆ و هامنه هەواروو بێکەسیم پەڕ کەرۊ شەوچراو ئاوەڎانی پايیزی.
درەنگانێوا تان و پۆ ویریم وڵکنانشەوه و ئەسیرش کەرڎەنا. ئێتر وارانوو جارانیبۊ نسرمی خاکەکەیش نمارۆ و گەڵاخەزانوو پايیزی تەقە مەوزۆ دەرا. دێر وەختێوا وەڵێ وەرزوو گەڵاخەزانی به زۊروو زەڕی تەقە وزا دەرا و لاشەو شاته تازه نەمامەکا، کەو و کونجێڵ کەراوه. دێر وەختێوا شەوانەی کڵکڵەوانی مەوانۆ و ڕۊچەنه مێمانۆ کەلاره وڕاکا و قبرسانه کۆنەکانه. ئێتر کووکووش نەمەنەن و واچەکێ دلێ گڵوەزێشەنه تاسیەینێ. ئێتر نەتەنیا واژەکێ، که ئاڎە وێچش تاسیەینه. دێر وەختێوا شەوانەی کوچەڵەکا هاڵی کەرا، ڤەنەکا مڕناره و نمازا بڕەژا. درەنگانێوا سەرو بانو وېماوه به تەرسي دەرڎه دڵ کەرمۍ و زوانو وېما بيەن به نوونگەو خەتەری و گەرەکشانا جه وېما ڕنيەيمێره و پۆسوو يۆتەری کەرمۍنه.
ویرما ئۊسا هامنەنه گەڵاو ڤەنەکا و داره نەرەکا یام چېروو کونەینه ئاو و دۊ وەرێ یام هەرزەلۆ نازارا بینێ و سەیوەروو لاملاشا بێ، بەڵام به داخەوه ئیسه هامنەنه و پا تەژنەو شەرایەنه، ئەیرشا منیا پوه و گڕه و دووکەڵ کوشۆشا. ویرما ئۊسا که پەیز ئەی، گەڵاو هەژگا، ئاخرین هەناسەشا دێنێ به بزڵەکاو وەهاری تاکو ژیوایشا پسانا و ژیوای دا! بەڵام به داخەوه و هەزاران داخێ؛ ئاخرین ماچەشا، بێهاز و هەناسه منیشۆره پاو وېشا و واوگژەو پاییزی مسپارۆش به دەرەکڵه وشکه بۍ ئاوەکا. ئۊسا که پايیز ئەی، کیفوو کناچڵه مەدرەسەیەکا پەڕ بۍ وامی و وەزی ترەکەی، به دیەیشا چەمۍشا بێنێ به مێمانوو ڕۊجیاری و پلوورە وارانی بەش کەرۍنێوه. ئیسه سمڵ و مێخەک لا شیەن، کناچڵەکێ وانگای، ئێتر زەرڎەخوه مەکەرا؛ ئاڎێ ئێتر مەلا سێران. ئاڎێ ئێتر مەلا پەی هانەی و مەزانا دماگەله چېشا. ئاڎێ ئینای فەیس بووکەنه و چاگەنه دڵداری کەرا. جگەی وام و وەزی، کرێم و سووراو کەرانه کیف و کوڵمەکاشا به زۊر سوورێ کەرا. ئاڎێ گاهەز هیچ وەخت هەنترینی نەوینا بەڵام دلێ تلێگرام و ئێنێستاگرامیەنه گرڎ وەشی کەرا و شەوۍ تاکو ساحبێو دوور جه هەنترینی؛ قسێ کەرا چنی هەنترینی. ئاڎێ دەنگو هەناسەو هەنترینی مەژنەوا، بۊ منەنیانه بینۆ هەنترینی بەڵام دڵداری کەرا و وېشا ماچا که فره وەشمانا! هەر یۆشا و هەر یوەشا ئینا دلێ چن گرۆ و تاقم دەسەیەنه، بەڵام جه دڵەنه گرڎێ وێڵ و تەنیا و سەرگەرڎانێنێ. ئاڎێ ئێتر کۆئێز مەلا. گەل مەکەرا، مەزانا ڕەژبەڵەک چېشا، تاکو ئیسه تەلگانه نەسیەینێوه و گەرمی ڕۊجیاری مازی خیاڵەکاشا ختلێش نەڎان. ئاڎێ مەزانا هانەو ژەنا چېشا و نەلەینێ شارۆ و تفیشا نەچنیێنێوه و دماشەره ڕەژبەڵەکشا نەکەرڎەن؛ پەوکەی هەنترینی مەوینا و پەلکێ مەگېراوه پەی هەنترینی. ئاڎێ ئێتر به ئاوەو چیاو هانېوی بێگەرڎی، دەس و پل مەشۆرا؛ پەوکەی گەرمی ئێحساسێوی ناسکی مەلۆنه چېروو پۆسیشا و چنی کەڵەشېروو ساحبی هایشا کەرۊوه. پەوکەی شەوۍنه هایشانا و ڕونه بێ¬هاز و تین تاکو نیمەڕۆ چېروو لێفیەنه تلاوتلێ کەرا. ئاڎێ پێسه کوڕەکا تاکو ساحبێو چنی هەزاران نەفەری پێوەنی کەرا، بۍ ئانەیه یۆشا لاشانهبۊ و دەس بەرۆنه دلێ قژاشا. بۍ ئانەیه یۆشا سەره بنیۆ سەرو شانەیشا و بېیاثۆنه دەرڎی دڵشا. کوڕ و کناچه شەوانەی مەوسا، پەوکەی مەتاوا شنەو شەماڵوو سەرساحبی هۆرگېرا و کوڵمێشا سوورێ کەراوه. پەوکەی زەرڎه خوه دەمشانه سیسیانەوه و سەرو لچاشا قاڵش گېرتەن. ئاڎێ ئێتر هەڵەشێ نېیەنێ و گۊرانیێوه شێته چەمەڕاییشا مەکەرۊ. مووسیقاو ڕۊحوو ژیوای نېیا دەورشانه و وێڵ و وەیلان یۊ نېیا بېیاثۆشانه و ئینەنه که ئاڎێچێ مەیاثانه کەسی. زەمان لاشاوه، دێر زەمانێوا مەرڎەن و هەناسەش کەوتەن پرخە پرخ، هەناسەش کەوتەن پرخە پرخ.[1]