بنەچەو بەگزاڎەکا هۆرامانی
بەشۊ هەشتەمۍ

بارام سان:
ساڵەو (1075ک/ 1664ز) عەباسقولی سان کۊچی دمایینش کەردەن، چن ڕیشچەرمێ و پیاماقوولۍ هۆرامانی داواکاریێشان نویستەن پەی شاو ئێرانی کە بەشکوم یۊ جە کوڕەکاش پېسە سانو هۆرامانی خەڵات کەرۊن، شاو ئێرانی فەرمانشدان دوۍ جە کوڕەکاش کۊشکەو شاینە ئاماڎۍ بان، پەی ئا مەبەسەیچە (بارام بەگ و محەمەڎ بەگ) لوێنۍ، بە فەرمانو شای (بارام بەگ) کریان بە سانو هۆرامانی، محەمەڎ بەگی برایچش کریان بە حوکمڕانو (کەڵاتەرزان، کەمەرە، کوڕگوێز) .
(بارام سان) دمای دەسبەکاربیێش، دەسشکەردەن بە فراوانکەردەی قەڵەمڕەو و دەسەڵاتەکەیش، سەردەمو دەسەڵاتو ئی سانەینە تەنیا جە شارو هۆرامانی (هەزار) خانەوادۍ ژیوێنۍ، گرڎ خانەوادێچ چەک و چۊڵەو وېش بېیەنش، پا مانا گرڎ ساتێنە هەزار جەنگاوەرۍ پەشتەو سانیۆ ئاماڎۍ بیېنۍ، بېجگە هەزارو پەنجسەڎ جەنگاوەرا کە جە دەگایەکانو تەرو هۆرامانینە ئاماڎۍ بیېنۍ، یانی گرڎوەختێنە دوۍ هەزارۍ و پەنجسەڎ جەنگاوەرۍ ئاماڎۍ بیېنۍ.
بە نیازو فراوانکەردەی قەڵەمڕەوەکەیش، سەرەتا پەلامارەو شارەزووریش دێنە، چن کەسێ نامدارېش کوشتېنۍ، چانېشا یەرۍ پیاماقووڵۍ (زەڵم) ی، دمایی فەرمانشدان بە بەردەیۆ جوێ گۆرۍ (شاجۊ) سەری جوۋەو دەلېنېۋە پەی ئانەی ڕووبەرێ فراوان چا زەمینا ناوچەکەنە بە بەراۋۍ کریان، کە بە (سوڵتانە جوۋە) نامېش بەرکەردە.
سەردەمو دەسەڵاتو ئی سانەینە، بارو گوزەرانو خەڵکو هۆرامانی خراب بییەن، چوونکم ئا باج و سەرانۍ سەردەمو تاتەیشەنە (عەباسقولی سان) ینە لابریێ بېنۍ ئاردېشۆ، یانی ۋستېشۆ سەرو شانا خەڵکی.
(بارام سان) ، دمای (35) سی و پەنج ساڵا جە حوکمڕانی، ساڵەو (1103ک/ 1691ز) کۊچی دمایینش کەردەن، دە کوڕېش شۊنیرە جیامەنېنۍ پی ناما (قاسم سان، گەنجعەلی سان، عیسا سان، جەمشیڎ سان، حسێن بەگ، نەجەف بەگ، مەنسوور بەگ، سەیفقولی بەگ، عەلیخان بەگ، مەنوچەر بەگ) .[1]