باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و حۆتەمە
سەلمان جە شارو موسڵی سەرەمڕە خزمەتو پیرو کەنیسەینە بۍ، بەڵام ئاڎییچ جە پایېزو تەمەنیشەنە بۍ، پەوکەی موچیاری سەلمانیش کەرد کە بلۊ پەی یاگێ تەری. سەلمان پەرساش: دمای تۊ پەی لاو کۍ بلۊ؟
ئاڎییچ ماچۊ: ئارۊ سەردەمو ئامای پېخامئاوەرو ئاخر زەمانېیەن، تۊ بە بۍ مودارا، لوە خزمەتش، ئینا شارو نەخلستانی. سەلمان کەنیسەش جیائاستە، لوا پەی لاو کەسێ داواش وەنەکەرد پېسە شوانەو گەلەی قبووڵش کەرۊن، ئاڎییچ ڕازی بی.
پەی موددەتێ شوانیش کەرد، یاوا بە کاروانێ، وەردەمش گېرتۍ، ماچۊ: گردو گەلەکەیتا مڎەو پەنە، بە شەرتێ یاوندېم بە موڵکو عەرەبەکا.
زاهید وات: نېیەن کەسێ بەو ڕەنگە
پۊشابۊ ئەو ڕەنگ دیبای قەشەنگە
بسازیۊ پەی حەقق جەی زەمانەدا
لاوېز باوەرۊ وە بتخانەدا
بەڵام هەر تەدبیری تۊ یەک سیاقەن
هەنی ماباقی تەکلیفی شاققەن
جەی دما نیا ئەمن و ئەمانەن
واڎەی پۑخامبەر ئاخر زەمانەن
جە مەککەی شەریف زهوورش کەردەن
جوبرەئیل ئەحکام پەرێش ئاوەردەن
جە نادانی قەوم بېحەیای بەڎگومان
هیجرەت مەکەرۊ ئەو بە نەخلستان
بەینی دوو کوسار مەنزڵگاش مەبۊ
هەنی تا مەحشەر ئەو جا، جاش مەبۊ
مەلیحوللیسان ئەفزەلولعەرەب
ئومیی لەقەب هاشمی نەسەب
هەرگیز تەسەدوق نە زیاڎ نە کەم
مادامەلحەیات نمەنیۊ نە دەم
هەدیە، تەناول مەکەرد جە ئەیام
مەبەخشۊ دایېم جە گرد خاس و عام
چونکە مەیلی دین حەنەفیی پېشەن
ئەحیا سازی دین ئیبراهیم پېشەن
مەدارا مەکەر جە ڕوژ تا وە شەو
باسەلمان بشۊ وە خاک پای ئەو
چەم بدەر وە تۊز خاک و پاشەوە
دنیا و قیامات ها وە لاشەوە
زاهید ئەمری حەقق وە جا ئاوەردەش
سەلمان هەم ویداع جەو ئەهل کەردش
شیی وە لای شەخسێ چۊپانی کەردش
چن وەقت هەم نەوجا ساڵ وە سەر بەردش
تا دان پېش بەعزێ گاو و گوسفەند
سەلمان چە نیشان بەو تەور خجڵ مەند
دیش کارەوانێ دیارەن جە دوور
شیی گرتش دامان، ئەوان بە زەروور
وات: ئەی مېش و گاو گرد مەدەو پېتان
خیلافش نەبۊ یەکسەر پەی وېتان
بەڵام بە شەرتێ وە شاڎیی و تەرەب
من بەرین وە موڵک دیارگای عەرەب.[1]