باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و ششەمە
سەلمانی فارسی، جە خزمەتو زاهیدە ڕاهیبەکەینە بەردەوام بۍ، بەڵام دیارەن ڕاهیبەکە نەوەش بېیەن، پەوکەی سەلمان وەنەش پەرسۊ، کە دمای وېش بە کېش مسپارۊ؟
ڕاهیبەکە ماچۊ: زاهیدێ پیاخاس هەن ئینا شارو موسڵی، بە نامۍ منۆ لوە پەی لاییش، سەلمان جمارە، یاوا بە شارو موسڵی، لوانە خزمەتو پیری، پەنەش وات کە زاهیدەکە مەردەن، منش کیاستەنا خزمەتو تۊ.
سەلمان وات: ئوستاد دانای دیاریی
دمای وېت تۊ من بە کۍ مەسپاریی
وات: وەڵڵا هیچ کەس نېیەن بۍ وېنە
تالیب بۊ بە حەقق چی سەرزەمینە
مەگەر یەک شەخسێ سیڕی ساحیب دڵ
بەل تەشریفش ها، جە شاری مووسڵ
ببەر، وە لای ئەو نام و نیشانم
یە بۊت وە دەسگیر نووری چەمانم
خولاسە، عابید، کۊچی خەیرش کەرد
سەلمان دەر ساعەت دەردەم تەشریف بەرد
یاوا بە مووسڵ کەردش ئیستیسفار
پېدا کەرد ئەو پیری دانای ڕوژگار
وات: فڵان زاهید کۊچش کەرد جە نۊ
منش کیانان، وەیتەور وە لای تۊ
پیر وات: وەش ئامای وە بانی دیڎەم
درېغ نەداروم، ئەی بەرگوزیدەم
چوون دوسی موشفیق هامفەر دانی فەرد
سەلمان بە سوحبەت وېش سەر ئەفراز کەرد
غەرەز تا چن وەقت وە بۍ دەردیسەر
ویارا، جە لای پیری پاک نەزەر
تا پیر هەم شەربەت مەمات یاوا پېش
کەفت نە تەلاتم دەردی کاری وېش
سەلمان عەرزش کەرد وە ئەندوە زاریی
دمای وېت تۊ من بە کۍ مەسپاریی
ئەهلی مەعریفەت ڕیازەتی حاڵ بۊ
جەو پای ئەمری حەقق حاڵ زانی حاڵ بۊ
پیر وات: عەقیدەم وە هیچ کەس نېیەن
ئەر کەسێ بېیەن، جە دەس بەرشییەن
پەی ڕای هیدایەت، وەزعی دنیا و دین
یەک زاهیدێ هەن ها جە نسەیبین
پېڎاکەرد ئەو شەخس پوختەی پاک خەیاڵ
ڕانندەی ڕمووز، وەزعی ماه و ساڵ
سەلمان عەرزش کەرد بە وەفاڎاریی
دارۊم تەوەقوم خزمەت گوزاریی
زاهید قبووڵ کەرد خزمەتکاری ئەو
بیی بە مونیسش هەر سوبح تا بە شەو
تاکە چن ئەییام، بەندەگیی ئەو کەرد
چڼێ ویساڵش تەمام وە سەر بەرد
دیسان ئەو زاهید مەیلی حەقق نە دڵ
نە چنگی ئەجەل خەریک مەند خجڵ
سەلمان وات: ئوستاد گران نە بۊ لېت
حوکمی ئەمری حەقق یەقین یاوان پېت
تەدبیرم چېشەن سەرم بۊ فدېت
وە کېم مەسپاری من جە دمای وېت.[1]