باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و چوارەمە

عەبدوڵڵاو ئیبی سەلامی یەهوودی دمای یەرۍ پەرسا جە حەزرەتی، ئیمانش ئاوەرد، بەڵام جوولەکەۍ پەیش کۊڵیېنۍ، پەنەشان قبووڵ نەکریۍ.
یەهوودی واتەن: نەدارین خەبەر
هەرگیز پەی ئېمە نمێ ئەو نەزەر
بەڵێ ئەو کەسە مەیۊ وە لای تۊ
ماوەر و ئەحکام شای کەرەم بۍ شۊ
ئیمە و ئەو دایېم دوشمەن داریم
جە کۊ دیدەی ئەو وە چەم مەداریم
چوون کەلامی حەقق پەی تۊ ماوەرۊ
قەتڵش واجیبەن هەر کەسی کەرۊ
بەڵۍ چوون یەهوود بەحسش تەمامەن
نەوبەی عەبدوڵڵا ئیبنی سەلامەن
یەک ڕۊ ئاخېز کەرد بۍ کینە و کەدەر
ئاما وە خزمەت شای خەیرولبەشەر
حەزرەت نیگاه کەرد ئەسحاب بېیەن جەم
هەم ئیبنی سەلام ناگاه دیی وە چەم
دیش شکڵی یەهوود هیچ نەمەندەن پېش
ئاشکرا بۊی دینی ئیسلام مەبۊ لېش
بەڵ جەو دما عەبدوڵڵا سەلام
ئاما وە خزمەت شای خەیرولئەنام
وات: یا محەمەد سێ سوئال داروون
ئەو سێ ئەشکالە بە تۊ مەسپاروون
ئەو سێ ئەشکالە خەیلێ کەس وانان
غەیر جە ئەنبیا هیچکەس نەزانان
حەزرەت فەرماوا: یا ئیبنی سەلام
سوئالت یەکیەک بپەرسە تەمام
عەبدوڵڵا عەرز کەرد خەیلێ ئەندېشەن
ئەوەڵ جار مەدان ئەهلی بەهەشتەن
سێیەم سوئالم جە توخمی مەردەن
زەن جە توخمی ئەو وەلەد ناوەردەن
شېوەی ئەو وەڵەد مەدو موقەددەر
بەعزێ بە پدەر، بەعزێ بە مادەر
جەی سێ سوئالە خاترم ڕېشەن
فەرمو یا ڕەسوول جەوابم چېشەن؟
حەزرەت بە تەعلیم ئەخی جوبرەئیل
یەکیەک دا جواب، بە شەرتی قەلیل
فەرما باتین قورب زاهیر بەعیدەن
ئەو عەلامەت قیامەت ئېدەن
یەک ئاتەشێوەن مەخلووقەن بە دوود
بە ئەمری قادر قەدیمی مەعبوود
مەیۊ جە ناگاه چوون ئەسپابی حەرب
مەزانۊ مەخلووق جە شەرق تا وە غەرب
بەڵ خوداوەند بەوتەور ڕەنگش ڕەشت
جە ئەوەل تەعام پەی ئەهلی بەهەشت
زیادە جگەر جەرگی ماهینەن
پوختەی کارخانەی لاموتەناهیەن
یانی ئەو ماهی وە ڕوژ تا شەو
دنیا و دوون تەمام هانە پەشتی ئەو
جواب سێیەم هەم نوتفەی مەرد
ئەر جە توخمی ژەن ئەو غەلەبەش کەرد
وەڵەد جە شېوەی بابۊ مەدۊ ڕەنگ
یام بە نیشانە یام بە داد و دەنگ
ئەر زەن غالب بۊ خودا مەزانۊ
وەلەد جە شېوەی دایەش مەنمانۊ
چوون وەیتەور شنەفت عەبدوڵڵا سەلام
کەوت نەخاک و پای شایخەیرولئەنام
فەوریی جە ڕووی سیدق ئیمانش ئاوەرد
دینی ئیسلامش بە دڵ قبووڵ کەرد.[1]