باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شەسسەمە
قوڕەیشیەکۍ کە هەواڵو پێمانو مېیانو محەمەدی و ئەهلو مەدینەیشا ئەژنی، لەشکەرشا بەردۍ سەر، حەزرەت فەرماواش: چېگە کەس نەمەنۊ، مەشۊم بارکەردۍ پەی مەدینەی، ئیتر موسوڵمانەکۍ، تاک تاکو، هەم بە کۊ، بە پەنهانی هیجرەتشان کەرد پەی مەدینەی، تەنیا حەزرەت و ئەبووبەکر چاگە مەنێ.
جەودما حەزرەت شای خەیرولئەنام
مازوون کەرد ئەسحاب زومرەی خاس و عام
هیچ کەس نەمانۊ چی سەر زەمینە
مەبۊ هیجرەت کەن گرد پەی مەدینە
یاران وە مەخفی یەکیەک کۊچ کەردەن
تەشریف وە ماوای مەدینە بەردەن
ئەوەڵ جە ئەسحاب کەسێ هیجرەت کەرد
فەرموودەی حەزرەت هەم بەجا ئاوەرد
جەنابی سەعید ئیبنی عومەیر بۍ
بە قەولی ئەبو یەلمە دڵگیر بۍ
خولاسەی کەلام، گرد هیجرەت کەردەن
یەک نە شۊنی یەک گرد تەشریف بەردەن
بغەیر جە حەزرەت سیدیقی ئەکبەر
هەنی کەس نەمەند (دیار البشر)
تا یەک ڕۊ حەزرەت شای خەیرولئەنام
ڕووی خیتابش کەرد وە ئەهلی ئیسلام
ئېشەو جە خاودا وەیتەور دیم وە چەم
کەردەنم هیجرەت جە مەککەی ئەعزەم
شیم وە زەمینێ گرد نەخلستان بۍ
جە بەینی دوو کۊ شەهرش عەیان بۍ
من واتم: داخۊ یەکام مەقامەن
گومان بەردم موڵک و ماوای تۊهامەن
نمەز هیجرەتگای ئەهلی سەکینەن
زاهیر یەسریبی ئەهلی مەدینەن
بەڵۍ مەخسووسەن شای خەتمی پەناه
بغەیر جە سیدیق عەلی مورتەزا
باقی جە یاران ئەسحابەی سەروەر
کەس نەمەندەبۍ جەلای پېغەممەر
بۍ بەچەو عەیاڵ یەکسەر پەرێ دین
هیجرەت کەردشان وە یەسریب زەمین.[1]