باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و هەشتا و هەشتەمە

میرزا ئۆلقاڎرو پاوەی چی بەشەیچەنە، هەر باس جە واتەو گۊشگېرتەی قوڕەیشیەکا کەرۊن کە گەرەکشانە کېتابەکەو محەمەدی پارە پارە کەران.
زوبەیر دا جواب وات: بە من و تۊ
ئەی عوقدە موشکیل گوشاڎ نمەبۊ
ئەو کارە وە سەخت مەبۊم ئەو نەزەر
بشۊ سالیسێ هەنی پېڎاکەر
هیشام گەردش کەرد هەر تا کە تاوا
تا وە لای مەتعەم بن عەدوی یاوا
دیسان جە لای ئەو حیکایەت کەردش
نەقڵی ئەسحابان نە بەین ئاوەردش
وات: ئېمە دووکەس سەلاسە هەم تۊ
بشین پارە کەین سەحیفەی بەڎخۊ
با سیلەی ڕەحم بەجا باوەرین
خوېشان مەحبووس سەر ئازاد کەرین
واتش وە زوبەیر یاخۊ من و تۊ
خەیلێ زەحمەتەن عیلاج نمەبۊ
بشۊ وېت ئاسا هەم تەقالا دەر
ڕەفیقی چوارەم جە نۊ پېڎاکەر
هیشام شیی وە لای ئەبولخەیری نام
مەتڵەب بەیان کەر یەکایەک تەمام
ئەبولخەیر وات: عەیبی نەدارۊ
ڕەفیقی پەنجەم لازمەن ئارۊ
هیشام نەپەرسا جە کەس نیک و بەد
تاکە شیی وە لای ڕەبیعەی ئەسوەد
ڕەبیعە واتش: وە بانی دیدە
ئینە ئەمرێوەن دڵ پەسەندیدە
تا سەحەر یاران بوینوون وە چەم
ساتێ پەی تەدبیر بنیشین وە هەم
خاترت جەم بۊ دڵ ماوەر وە تەنگ
پارە مەبۊ خەتتی سەحیفەی بەڎڕەنگ
ئەو شەو خۊ شەوبی تاکە سوب سەحەر
خرووس وانا (الله اکبر)
هیشام بېدار بی دڵ جە خاوی خەم
هەر چواری موشفیق یاونا وە هەم
درەنگەن وە هەم مشوورەت کەردەن
قەدەم وە مەجلیس موشریکان بەردەن
دیسان ئامۊشۊی چەشمەی زەمزەمەن
جە کەعبەی شەریف جەرگشان جەمەن
ئەوەڵجار تەواف حەرەم کەردشان
چەو دما سوجدە (هوبەل) بەردشان
جە ناگا زوبەیر واتش: ئەی مەعشەر
ئەی قەومی قوڕەیش، قەومی کینەوەر
وە کام دین ڕەوان ئېمە وە بۍخەم
بویارین دنیا وە ناز و نیعەم
بە ڕەفاهییەت شەو وە ڕۊ بەرین
هەر سوب تا ئېوار ئیسراحەت کەرین
جامەی ڕەنگاوڕەنگ ئەلوان بپۊشین
بادەی خوشک وار عەشرەت بنۊشین
مەتعووماتی خاس شیرین لەب چەش کەین
دڵ جە هەوای زەوق ئاهەنگ دڵوەش کەین
بەنی ئەعمام گشت جە بەنی هاشم
گرد وە دەرد وجووع هانە تەلاتم
ئەولادی عەبدولموتەلیب تەمام
گرد بین وە سەرژان واتەی خاس و عام
وەڵڵا من ئەوڕۊ وېم کەرد ئاوارە
تا ئەو سەحیفەی نەکەم سەڎ پارە
ساکین نمەبوون من جەی زەمانە
قەسەم هەر وە بورج بەرزی بتخانە.[1]