#ئاغا عەنایەت#
ڕۊزگار شیشەی عومرم شکستەن
ڕاگەی ئومېدی حەیاتم بەستەن
تەکلیفم ئینەن پەرێ ڕای نەجات
موناجات کەرۇن قازیولحاجات
یا ڕەب بە حاجەت ڕەسۇلی سەروەر
قازیولحاجات ڕۇی دەشتی مەحشەر
یا ڕەب بە حاجەت جەلال و ئەقدەس
دەستگیری مەزڵۇم غەریب و بېکەس
یا ڕەب بە حاجەت زۇلجەلالی وېت
بە عەرشی عەزیم لایەزالی وېت
یا ڕەب بە حاجەت پېغەمبەرانت
بە عەرش و کۆرسی قەترەی بارانت
یا ڕەب بە حاجەت شای دوڵ دوڵ سوار
مورتەزا عەلی کوشندەی کوففار
بە ئەشکی دیدەی فاتېمەی زەهرا
هەم بەو شەهیدان دەشتی کەربەلا
بە ناڵەی دەرۇن عەبداڵانی بەر
مەکېشان نە دڵ وادەی سوب سەحەر
بە سەدای ئەزان ئەڵڵاهو ئەکبەر
بە شوعلەی جەماڵ پاکی پېغەمبەر
یەک ڕای نەجاتێ بنێرە نە وەر
بە شەرافەتی سەییدی سەروەر
بە دەستی بەستەی زیندانییانت
ئەسیر و مەزڵۇم گۊشەی شارانت
جەمعی زیندانی ئەکرادی بەدبەخت
فریادڕەسی کەر نەی فشاری سەخت
دە ساڵەن زوخاو جارییەن لېمان
بەشەرێ نېیەن ڕەحم کەرۊ پېمان
یا ڕەب بە حاجەت ئېسمی ئەعزەمت
بەو مەلاییکان خاس و مەحرەمت
یەکەم جار بەو ڕەحم بېپایانەکەت
بەو عەتا و کەرەم بېسامانەکەت
پیر و ئاخرشەڕ عاسی و عوسیانبار
قەبۇڵ کەر وەنەم تەوبە و ئېستېغفار
خالېق و زاتت غەیر جە لوتفی وېت
ڕای ئومېد قەتعەن مەخفی نېیەن لېت
ئاگا نە ئەحواڵ دەردەدارانی
شەفا دەهەندەی کول بیمارانی
ئەم دردە دۇچار ئېمەشان کەردەن
هەر ساتێ سەد نەوع بەدتەر جە مەردەن
کەریم کەرەم کەر کەرەم بۍ شومار
زیندەگی پېمان بېیەن زەهری مار
یا ڕەب بۊ بە عېشق خاسانی دەرگات
غەریب و بېکەس دۇرکەفتەی وڵات
مەزڵۇمی ئېمە جە حەد وېیەردەن
ئېحیامان کەرە هەناسەم سەردەن
بەخشەمان وە نۇر پاکی پېغەمبەر
نەی زیندانی تار وەسەن دەردیسەر
ڕەحمێ کەر وە حاڵ عایېلە و سەغیر
یا ڕەب نەجاتێ نەی دام و زەنجیر
تاقەت و سەبر و حەوسەڵە بڕیان
یەکسەر تەمام بی پەردەی دڵ دڕیان
زەڕڕەیێ ئیمان جە مۇ باریکتەر
ها وەختەن شەیتان باوەرۊش وە بەر
قوەی وجۇدیم، کول نەبەین شېیەن
عومرم جە پەنجا و چوار ڕەد بېیەن
عەینم بۍ عەینەک تەم و بوخارەن
زیندەگی پەرێم چۇن زەهری مارەن
یا خوڎا وە ڕەحمت کارێ بسازی
با کۊتا کەرۇن ڕۇدە درازی
ئېستېدعام ئینەن جە لای خوداوەن
شاد کەرۊم دیدار عایېلە و فەرزەن
عومری تەبیعی سەرئامان جۊشۊ
قەبۇڵ مەفەرما چی غوربەت بەرشۊ
ئارەزۇم ئینەن یا حەیی داوەر
نەی زیندانی سەخت باوەریم وە بەر
قوەی وجۇدی و سەروەتی دنیا
کول تەمام بېیەن ڕیشەمان کنیا
بەدتەرین زوخاو دنیا کول وەردم
یەک ڕۊ ئاسایېش وەسەر نەوەردم
نەحیف و زەعیف پیر و گرفتار
غەریب و بېکەس، موحتاج، دەردەدار
عەنایەت فەردت کول موناجاتەن
سەرتا وە پایین دۊعای حاجاتەن
کافییەن وەسەن سەردەرد ماوەرۊ
ئومېد هەن خوڎا قەبۇڵش کەرۊ
ئېلتېجام ئینەن جە لای هامسەران
وە یەک فاتېحە ڕۊحم شاد کەران
دۊعای مەغفېرەت نە دەرگای داوەر
درېغ نەکەران بەشقی پېغەمبەر
[1]