#میرزای لوڕستانی#

حېجاب کەرد خاتۇن دەست نە جاگەی وېش
غوڕا بە غوڕان ئەمیرانی پېش
ڕەوانکەرد خاتۇن ئەسری مرواری
پەرۍ مەم کەردش خەیلێ زگاری
شی وە ئەندەرۇن بەستش دەستی مەم
وات شەڵلا بۍ تۊ عومرم بېیا کەم
حوکم حاکمەن ھیچ نەدارۇ چار
چېش کەرۇ جە دەست جەفای ڕوزگار
سپورد وە یاران ئەمیری زیندان
بەردن وە زیندان خاتر پەرېشان
سەر تا پاش پېچان بە ڕۇق و زنجیر
وستن بە زیندان زگار و زویر
وېنەی خامۇشان قرار گېرت نە جا
ئېستېدعا کەردش بە دەرگای خودا
ڕۇ کەرد نە باڵا وات ئەی خوداوەند
نەجات دەر جە بەند بەندېیانی بەند
فەریاد ڕەسیدەی گشت بېچارەگان
ڕەها کونەندەی یاران جە زیندان
ئەر زەڕێ لوتفت هەم هەندەن ئەسەر
بە زۇدی نەی قەید نەجاتم بدەر
ئاواتەوازم بە دېیەن دوڵبەر
ئەر بدېیام ھەنێ ڕوخساری یاوەر
بېزار بیم بېزار جەی زیندەگانی
دوعام قەبۇڵ کەر فەرد وە سوبحانی
بە سۊزی دەرۇن دوعاش کەرد ئەمیر
دوعاش قەبۇڵکەرد حەیی بېنەزیر
ئین بار جە شای مەم نەکەرین گوفتار
تەجدید بە دەرۇن دەستانی ئەخبار
ئەمیر چۇن وستش نە ڕۇی زیندان مەم
نېشت وە خاتر شاد دڵشاد بی جە غەم
شەو ئاما خاتۇن دەستکەرد بە زاری
زاری چە زاری، زاری زگاری
ڕۇکەرد نە دەرگای حەیی جەبباری
واتش خودایا تۊی سەبەبکاری
یا ئېم شەو دەردم بکەری کاری
یا مەم جەی زیندان نەجات بداری
چۇنکە دوعاش کەرد بە ئەندۇههی دڵ
دوعاش بە ھەدەف یاوا موقابڵ
درۊستکەرد بەعزێ جە تەعام و نان
نېعمەتی ئەلوان مورغان و بریان
داش وە یەک کەنیز نە ڕای نەھانی
کېیاستش پەرۍ یاری زیندانی
تا کە مودەتێ کېیاست وە زیندان
جە کەبک و جە قاز، مورغان و بریان
ڕۊیێ بەکر ئاغا نە ڕاگەی نەھان
ھۊرېزا لوا ڕۇکەرد وە زیندان
دېیا دیش کە مەم نېشتن وە مەسرۇر
شۊڵەی ڕوخسارش گڕانتەر جە نۇر
ئەمیری زیندان تەڵەبکەرد وە بەر
پەرسا ئەخبارات وەردەنیش یەکسەر
ئاما بە جواب ئەمیری زیندان
جە لای خاتۇ زین پەرېش مەیۊ نان
ڕۇکەرد وە ئەمیر زیندان نەو زەمان
وات ئەی نابەکار مەردۇدی نادان
ئەر ئەمیر دانۊ بەی کار و کەردار
ئەعزای سالېمت مەرېزنۊ بە دار
[1]