باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و وېس و ششەمە
سەرەتاو ئامای وەحیې پەی محەمەڎی، تەمەنش یاوا بە چل ساڵی. کاتێ محەمەڎ دلې مەڕەو حەڕاینە وەرمش کۆتەبی پۊرە، پڕێنە جوبرەئیل پېسە میرزا ئۆلقاڎر ماچۊ؛ بە ئەدەبەوە چڵاکناشەرە و هاییش کەرڎەوە، واتش بوانە، ئاڎیچ ماچۊ: من خوڼەواریم نییەن، جوبرەئیلی فشارا، تاکو یەرې جار پەنەش وات: بوانە، ئیتر ئەچاگۆ محەمەڎ یەکەم پېخامش جە خالقیشۆ پەی یاوا.
عومری هومایۊن، شای خەیرولبەشەر
یاوا، بە چل ساڵ، بە ئەمری داوەر
چوون ڕووی دووشەنبە، خاسەی ئەیام بې
یەومی هەڤدەهەم، شەهری صیام بې
شای خەتمی، پەنا، حەبیبی داوەر
شەفیعی دیوان، زەلزەلەی مەحشەر
جە غاری حەڕا، خاوش بەردەبې
جە بانی سەنگێ، تەکیەش کەرڎە بې
بە ئەمری فەرمان، پاڎشای جەلیل
نزوول کەرد، وە خەیر، جەودەم جوبرەئیل
بە شکڵی سوورەت، وېنەی ئینسانی
چەنی توحفەیات، وەحیی ڕەببانی
جە غاری حەڕا و ئەجای بەهەشت بۊ
یاوا وە خزمەت شای فریشتە خۊ
چوون شکۊفەیێ جە ڕووی پەردەوە
وە ئەدەب، حەزرەت، بېڎار کرڎەۋە
جوبرەئیل واتش: یا ئەحمەد ئیقڕەئ
شەفیعی دیوان، باعیسی مەبدەئ
جواب دا، حەزرەت، جە ڕووی خەوف و بیم
فەرما: چېش واچۊم، من خۊڼەوار نیم
جوبرەئیل، وە سەخت، حەزرەت، وشارا
تا، پالووی ڕاسش، جە چەپ، ویارا
گومان، بەرد، داخۊ، جەنەتلماوا
موقەدیمەی مەوت، وە گیانش یاوا
دووبارە، ئیقرەء، واتش جوبرەئیل
بواچە حوکمەن، جە دانای جەلیل
حەزرەت، وات: خۊ من هیچم نەوانان
چېش واچووم، حەقق وېش، عەلیم و دانان
دیسان، وشارا، ئەندامی حەزرەت
نم دا، وە باڵای، نەمامی، حەزرەت
سێ بارە، ئەو پەیک بەڕندەی ڕەهبەر
ئیقرەء، تەکلیف کەرد، ئەو بە پېغەمبەر.[1]