#میرزای لوڕستانی#
پەرسا جە ئیشان عەزم کۊ دارید
ڕەزاتان وە کۊن ڕە وە کۊ دارید
دېیارەن بوزورگ عەزیم ئەلشانید
پەنەم بواچان ئەگەر مېھمانید
ئاما بەجواب بەنگینە دەرحاڵ
واتش ئەی خاتۇن ساحېب زوڵف و خاڵ
مەھامی دارۇن جە شەھر جزیر
ئەمن غوڵامم ئی جەوان ئەمیر
ئەگەر نەسیب بۊ ھەر دۇ مېھمانیم
مېھمانی بەکر مەلەک ڕېحانیم
مەلەک چۇن شنەفت بەرشی جە ھۊش
وات منم ڕېحان وەش ئامانان وەش
بشان بیانە پېیابان جە زین
ئەڵبەت مەیانۇن پەیتان من قەرین
کەنیزێ دەردەم پەی ڕەنمایی
کېیاست چەنیشان پەی عوزرخواھی
یاوان وە قۊناغ بەکر بۍ مەدار
جە یانە نەبۍ بەکری مەردار
مودەتێ مدران ھەر دۇ بە سوار
کەس نەدین وە چەم ئەو ھەر دۇ نامدار
پېچاشان عەنان ھەر دۇ ھەمقەرین
تا شین وە خانەی قەرە تاجەدین
پا فرۇد ئاوەرد بەرئامان جە زین
غوڵامان بەدەو ئامان نە کەمین
ئەسپشان بەردن وە یەختەخانە
ئامان وە پېشواز خوېش و بېگانە
کەردشان مۊبەت عېزەت نمانان
بە ڕەسم و ئاداب شاھانی جەھان
خېرئامایش کەرد تاجدینی دوڵدار
فەڕتان ئاوەردەن بەخێر ھەزار بار
وەقت شام ئاما تەعام ئاوەردن
بە سەد ئېلتزاز نۊشی جان کەردن
یەکدەم جە ئیشان نەکەریم گوفتار
جە ئامای ڕېحان سوخەن کەین ئېزھار
یاوا بەخانە مەلەک بە دەوان
نیشانێ نەدی نەو ھەر دۇ جەوان
یەک دایانش بۍ عەجۇزەی دەوران
فیتنەی شەڕئەنگېز نە ھەر دۇ جەھان
پورسا ئەخبارات بەنگینە و ئەمیر
بە تەعجیل و تاب جە ئەو زاڵ پیر
واتش ئەی فەرزەند حۇری ڕەزوانی
ئامان سواران یوسفی سانی
ھەر دۇ ساعەتێ مدران بە سوار
دەییارێ نەبی پېشان دۊ ئەخبار
جە یانە نەبۍ بەکر ئاغای پدەر
ھەر دۇشان دەردەم بەربشین وە بەر
جە سەرای تاجدین پېیابین جە زین
مېھمان بە ئەون دۇ مەردی پڕ کین
مەلەک چۇن ئەژنی دەستکەرد وە فریاد
فەریادی بېشۊ واوەیلای بېداد
خەیلێ ئەو وە بەخت بەکر نەفرین کەرد
پەیاپەی کېشا دەم دەم ئاهی سەرد
فائېدەش نەبی خامۊش بی پەی وېش
ساکېن بی نە جەور زوېر و دڵڕېش
ئین بار بشنەوە ئەمیری نامدار
جە سەرای تاجدین چۇن گېرتش قەرار
[1]