باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و چوارەمە
عەبدولموتەللیب (باباو محەمەد)ی، دلې گرڎو کوڕەکاشەنە، تەنیا ئەبوتالیبش پەسینا، پەی گېرتەی وې محەمەڎی، کە دمای وېش بە جوانی و بە دڵفراوانی هاگاڎاریش بکەرۊن، چوونکوم ئەبوتالیبی ئەشناسې چ پیێوە نەجیب و خاوەن کەسایەتیێ بەهېزیەن، پېسە مزانمې ئەبوتالیب تاتەو عەلی کوڕو ئەبوتالبین، کە چوارەم خەلیفەو موسوڵمانانەن.
غەرەز، هیچ کودام، نەکەردش پەسەند
حاڵی بین جە کار، دانای خورەدمەند
تا، ئەبوتالیب، دیا، دیش بەدڵ
مەتڵەبی ئەوان، هیچ نەبی حاسڵ
زانا، ئەو سەردار، مورادش ئەوەن
حەزرەت، جە لای ئەو، سەلامەت، ڕەوەن
بە ئەو بەیان کەرد، ئەو هەم ئیزهارش
بە عەرزی پدەر، بزرگەوارش
وات: ئەر ڕەزاشەن، سەرداری قوڕەیش
بەندە، مولتەزیم، سەڎ جار، مەبۊ پەیش
شەرت بۊ، محەمەد، خدمەت کارش کەم
هەر تاکە زیندەم، کومەک یارش کەم
هەرگیز، جە ئەمرش، بەر نمەشۊم وە بەر
یەقین، مەحکومم، تا یەوملمەحشەر
محەمەد، جە لام، بە فەرموودەی تۊ
جە فەرزەندانم، عەزیزتەر، مەبۊ
فەرزەندم، نۊکەر، وېم خاکەسارش
ئەهل و عەیالم گرڎ پەرستارش
نازۊم، بنیشۊ گەردێ نە ڕەنگش
گرڎین، بوین، وە گەرد، مینای قەشەنگش
عەبدولموتەلیب، سەرداری کامڵ
ئیلتیماسی ئەو، قەبووڵ کەرد بە دڵ.[1]