#میرزای لوڕستانی#
پادشا ڕۇ کەرد نە ئەعیان و ئەمیر
نمەز چېش کەرۇن بکەران تەدبیر
یە چە حاڵېوەن یاوان وە ئەمیر
عېلاجش چېشەن واچن بېتەقسیر
بزورگان ئامان یەکسەر بە گوفتار
ئاخرولئەنجام ئامان بە ئەخبار
یەکێ وات ئەڵبەت یە کار دېوەن
دېوان هەمیشە کارشان ڕېوەن
یەکێ وات جنۇن ئەسەر دان نە ڕاش
یەکێ وات سەودان نەمەکەرۊ فاش
یەکێ وات سەفراش ئەغڵەبە کەردەن
جەو بۊنە جە خواب خوردەن وېیەردەن
هەر کەس بە ڕەنگێ ئامان نە گفتار
مەتبۇعی تەبعش نەبۍ شەهریار
وات ئەی حەکیمان نادرەی ساڵان
جەی کارە پېم دەن یەکسەر ئەحواڵان
حەکیمان ئامان یەکسەر بە گوفتار
عەرزکەردن وە شاﮪ کای واڵا تەبار
سوپای عەشق نهان جەسەر جەم کەردەن
جەو بۊنە ڕاحەت ئارامش بەردەن
هەر عېشقەن خۆراک، خواب حەرام کەرۊ
عېشقەن یانەی فام وە تاراج دەرۊ
پاشا با وەزیر ئەمیرانی پېش
شی وەلای فەرزەند نۇر دیدەی وېش
واتش ئەی فەرزەند نۇری چەمانم
مایەی حەیاتم ڕۊحی ڕەوانم
یە چە سەودانان یاوانت وە سەر
پەنەم واچە ڕاست خەبەر سەرانسەر
گرەوا ئەمیر پەی یار مۊنېس
نەوحەش بوڵەند کەرد نە جەمعی مەجلېس
واتش ئەی پدەر تاجی سەری من
غارەت شی وە بەخت بەدئەختەری من
دەردم کارېوەن نەدارۊ دەرمان
ئەر دەوام کەرۊ سەد هەزار لوقمان
ئاما بە گوفتار وات ئەی نۇری چەشم
گرەوا بە زار بە دیدەی پڕ نەم
بەشقی خوداوەند واچە پېم تەمام
کۍ سەندن بەی تەور وەنەت عەقڵ و فام
[1]