ئاژەڵداری جە هۆرامانەنە
ئەوەنویستەی و دەسکاریکەرڎەی: ئەسعەد ڕەشید
بەشەی پەنجەمە
هەڵیزە:
هەڵیزە، پۊسو (مەیې یان بزې)، کە ساق بۊنەو هۊرنەدڕیابۊ و ۋڵ ۋڵ نەکریابۊ، پەژم یان موەکاش کەناوەو ئینجا بە چن دەرمانێ دەباخی، وەشش مەکەران، دماو ماوێ کەمی، ماسش چەنە ژەنیۊن.
هەڵیزە، پەنەۋازیش پی ئامرازا هەن:
دەسەڵقوت:
دوېنې، یۊشا وەرۆ، یۊشا دماوە. ئانەو وەری سەرێش بەسیۊن بە هەنگۊڵ (سەر) و هەڵیزەکېوە، ئەویتەرشان، هەرپاسە، بەستەکەیچشا بە هۊ و کاشیبەڼیۆن.
کاشیبەڼ:
ڕېڵەخوێ حەیوانینې، وەشېکریاو فرە پتەوېنې و دېر بڕیا.
بەرەبین:
بەڼێن، بەسیۊن دلېڕاسەو دەسەڵقوتو وەرینیۆ و هېقم کریۊن، دەمو هەڵیزەکېش پەنە بەسیۊن.
وەرېسە:
پەتێ قاییمەنە، جە موو بزې وەشە مەکریۊن، پەی بەستەیۆ هەڵیزەکې بە یەرەپاکەیۆ بەکارمێ.
سېپا:
یەرې دارې درېژ و ڕاسې، کە درېژیشان دوې گەزې یان زیاتەرەن، دلېڕاسەنە بە وەرېسەکې مەبەسیان یۊترینیۆ و چیلاوچۆلاوە سەرەکېشا شۊڕېباوەو هەڵیزەکېشا بە دەسەڵقوتەکاوە پۆوە بەسیۊن، پا جۊرە هەڵیزەکې هۊرمەواسیۊن، بە ئاردەی و بەردەی پەی وەری و دمای، ماسو دلې هەڵیزەکې بۊ بە دۊ، دماتەر کەرەکې جە دۊکەی جیامەکەراوە. کەرەکې گلېرەمەکەراوەو بە گەرمکەرڎەی کەراش بە ڕوەن، ڕوەنەکەی دلې (خیگە)ینە هۊرمەگېران، جە دۊکەیچ کەشکی و دۊخەوا وەشمەکەران.[1]