بېسارانی
ئارۊ دیم بە چەم، نازک ئەندامێ
ساوای تەن تەڕاو، تۇڵە نەمامێ
عەرعەر باڵایێ، شای جەمین جامێ
زوڵفان چۇن کەمەند خەیاتەی خامێ
گېرتەبېش وە دەس تۇڵێ جە عەرعەر
ساوای نازک تەن، سافی نازپەروەر
گاه بە دیڎەی ناز مەڎېیا پېشەدا
گاه مەگېرت وە بەژن، باڵای وېشەدا
هەر وەخت پەیش مەڎېیا وەنازی چەمان
چەفت مەبی جە تاو موژەش، چۇن کەمان
ئەوسا مەگېرتش ڕاست چەنی باڵا
مەلەرزا و مەکەفت نە پاش مەلاڵا
یانی جە هەر کۊ نەمامی باخ بۊ
یا ئەو وە باڵای وېش بە دەماخ بۊ
هەنی وە باڵای وېشان نەنازان
ئاوات وە سایەی، باڵاش بوازان
[1]