نان-پەتەی (نان-درۊسکەرڎەی) هۆرامی جە هۆرامانەنە
ئەوەنویستەی و دەسکاری کەردەی: ئەسعەد ڕەشید

هەرپېسە هۆرامان بە وەزی نامبانگش لوان، هەرپاسە هۆرامیەکۍ بە (نانی هۆرامی) نامبانگشان بەرکەردەن. ژەنۍ هۆرامانی، بە دەسوپلېنۍ، ماوەو یەک کاتژمېرینە، تەشتێ هەمیر پەچانو کەراش بە نان.
ژەنەو هۆرامانی چن کەرەسێش پەنەوازۍ پەی نان کەردەی، ئاڎیچۍ ئینېنۍ:
-ئاردی بە پېزۍ
-هېڵەکە، پەی وېتەی ئاردەکا.
-تەشت، پەی هەمیر شېلای.
-مەسۍ، پەی پڕچنای هەمیرەکەی و بە گۊنکە کەردەیش.
-پنۍ، پارچە تەختێوە قایمی خڕ، سەرو یەرۍ قاچە داریناوە نریۊرە، گۊنکەکۍ وزیۊ سەرش و بە دەس پانەکریۊوە.
-ماڎۍ،بە پەڕۋۍ وەشەکریۊن، جە قەبارەو نانەکەی گۆرەتەرە، گۊنکەکۍ پانەکریۊوە سەرشۆ و دریۊ ساجەکەرە.
-سەردۊڵە، پارچە پەڕوێ، یان قوماشێ پانەن، پنەکېش سەرۆ نریۊرە و ئاردی کەرا سەرش، یانی ئاردەکۍ مەگنا چېرو پنەکۍ، جارجار چنگێشا بەرماراو سەرو پنەکېرە شاناشان.
-سفرە، هەمیرە پڕچیێکۍ بە مەسەکۍ، دمای ئانەی سەرو پنەکېوە خڕۍ کریاوە، سەرشۆ ڕیزۍ کریان.
-ئایېری عال، بە دارۍ وشکۍ چېرو ساجەکەینە گڕدریا.
-دیکپا، سەرو ئایېرەکەیۆ منریۊرە.
-ساج، پارچە ئاسنێ خڕی قۆسەن، سەرو دیکپاکەیۆ منریۊرەو دمای گەرم بیەیش، بە ماڎەکۍ هەمیرو نانەکەیش دریۊ پۊرە.
نانی هۆرامی، گەر ژەنەی هۆرامییە کەرۊش و ئاردەکېش چەرمۍ و بە پېزۍ بان، فرە ناڕەحەت نیەن، بۍ وەرچاییچ مەوریۊنەو چەنی (وەزاو ڕوەنی و قەڼی)، شیرینی و پاقلاوە دروسکریۊن.[1]