جە جەوری فەڵەک ناسۊرەن دەردم
جگەر پڕ جە هوون، هەناسە سەردم
ئەسرین سەروازەن وە چیهرەی زەردم
خوسووس -فیدات بام- شای کەمەر لاڵم
ئېم شەو جە سۊزش جگەر زووخاڵم
پەرێ ناکامیت مەگرەوام بە تاو
جە بەدبەختیی وێم سەر نیام وە خاو
دیم جە خاو مەرگ: شای جەم ویقارم
مەسرووری دەروون ڕېشی زامدارم
جە کیتابخانە چوون هەردەجاران
نە دەورت دڵشاد جەم بەستەن یاران
خەسرەو وێت وە فەڕ خەسرەوانەوە
نیشتەبێت نە سەدر کیتابخانەوە
چەنیی بەدبەختان عەیش و نۊشت بێ
لاڵ بام، نام مەرگ فەرامۊشت بێ
هەر یەک وە نەوعێ مەکەردی دڵشاد
نەو قەبری تاریک نمەکەردی یاد
مەواتی ئەووەڵ نەوجوانییەن
ئیبتدای سروور کامەرانییەن
گۊشت وە ئاواز ناڵەی ئاهەنگ بێ
خاترت مەسروور جە سەدای چەنگ بێ
مەجلیسی مەخموور سەرمەستی مەی بین
موتریبان سەرگەرم ئاهەنگی نەی بین
بە شاد مەساوان سەر وە خاکی پات
ڕۊح و عومر و گیان مەکەردن فیدات
تۊ بەو تەور و تەرز هەردە جارانت
دڵداری مەدای یەک یەک یارانت
مەواتی: سوڵتان، نووری دیدەی من
خواهەری مەحزوون غەمکەشیدەی من
چۊنی جەی گەردش چەرخی نە ڕەواق
چەنی مەویاری ئەییامی فیراق؟
یە چەندێ وەختەن بێ وەفا و سیفەت
پەرێ پابۊسم نامای وە خەڵوەت؟
سەوگەندم بە زات حەیی بێ چوونەن
مەیلم چەنی تۊ جەی وەر ئەفزوونەن
شەوان بە یادت بە ڕۊژ ئاوەردەن
پەی تاسەی ڕەعنام ئیمانم هەردەن
چەنی ئی بەدبەخت بکەردی خیتاب
بەحست بێ نەقڵ تەحریر و کیتاب
جە شوومیی ئی بەخت نەحسی سیاچار
خەسرەوم، نەو خاو ناگاﮪ بیم بێدار
دیم نە ئەساسەی خەڵوەت، نە شاهەن
تەنیایی مەحزوون دەروون سیاهەن
تولووعی سوبحەن هەوا لوولووڕێز
ئاما بە یادم نە بەزمی پەروێز
وە نەرم نەر مۍ دەست کەردم وە شین
لاوناوم خەسرەو بە دیدەی نمین
واتم: خەسرەوم، فیدای فەوتت بام
قوربانی مەستیی بادەی مەوتت بام
فیدای ئەو ناڵەی سۊز جەرگت بام
قوربانی سەفەر موڵکی مەرگت بام
فیدای ئاخ و داخ وەختی فەرمانت
قوربان لوای ڕاگەی نیهانت
فیدای ساز و سۊز مەجلیسی بەزمت
فیدای تەپڵ و کۊس مەیدانی ڕەزمت
فیدای ئەو مەجلیس خەسرەوی تەورت
ئیسە بە قوربان دەستاخیی قەورت
خەسرەو، من سەرگەرد قەسری خاپوورت
فیدای ئەو یانەی تار و دەیجوورت
فیدای دوو ئەبرۆی سیای مشکینت
قوربانی کاکۊڵ عەنبەر ئاگینت
سەر گەرد دوو عەینی شەهلای مەیگوونت
فیدای مەنسووبان دڵ پڕ جە هوونت
ئاغەم، سەر هۆردار بوینە حاڵم
بە ناکامیی تۊ، دەروون زووخاڵم
قەسەم بەو جەماڵ یووسف ئاسای تۊ
موونیسم ئاهەن دایېم شەو و ڕۊ
سا فەڵەک چوون من سیاچارە بۊ
سەرنگوونی خوار، پارە پارە بۊ
نەردی مەرگش شەند پەی شای فەڕوخ فەڕ
کامەرانیی وېش نەکەرۆ تاکو سەر
باقی جە نەعیم دایېم شادیت بۊ
مەستوورە قوربان نامورادیت بۊ
#مەستوورە ئەردەڵانی# [1]