باخچێوە بېگەرد
نویستەی: میرزا ئۆلقاڎرو پاوەی
بەشۍ: سی و چوارەمە

میرزا ئۆلقاڎر و پاوەی، چی بەشېنە باس جە وەچەکا حەزرەتو ئاڎەمی کەرۊن، تا یاوایشان بە حەزرەتو نووحی. چا سەردەمەنە خەڵک بی بە دوۍ پېڕۍ، پېڕێشا کۆتۍ شۊنەو (نووح)ی و ئیمانشان ئاوەرد، پېڕێشا هەر سەرو بت پەرەسی وېشا مەنێ.
چوون نووری حەزرەت، شای ئەعلا ڕەقەم
بەرشیی، جە بەهەشت، یاوا، وە ئاڎەم
جە (ئادەم) و (شیت)، چوون قتعەی مەنقوەش
جە لای (شیت)، هەم شیی وە جەبهەی (ئەنوەش)
جە (ئەنوەش) ویەرد، وە (قینان) یاوا
چوون باغچەی بەهەشت، دنیا، کەرد ئاوا
وە یەدی قودرەت، پادشای جەلیل
جە (قینان) هەم شیی، وە لای (مەهلائیل)
وە ئەمری سوبحان، تاکی تەنیای فەرد
جە لای (مەهلائیل)، یاوا، وە لای (بەرد)
جە (بەرد)، هەم ویەرد، وە ناکام
یاوا، وە (ئیدریس)، عەلەیهی سەلام
تا وەقتێ (ئیدریس)، فەندێ بەر ئاوەرد
ئیرادەی عورووج، قەسری بەهەشت کەرد
نووری محەمەد، چوون ئاینەی ناسخ
بەرشیی، تا، یاوا، (ئادەمتوشلەخ)
جیهان کەرد ڕۊشن، سەما، تا سەمەک
دیسان تەشریف بەرد، وە جەبهەی مەمەک
نەگرتش قەرار، وە سەڎ ئیحترام
تا، یاوا، وە (نووح)، عەلەیهی سەلام
سابا، تا چن ساڵ، چوون خەرمانی گوڵ
جەبهەی پاکی نووح، بەیۊش، وە مەنزڵ
جەودما، کە (نووح)، نەبییۊڵڵا بۍ
سەرداری ئەولاد، سەفییۊڵڵا بۍ
دایېم هەر مەشغووڵ، وە ڕیعایەت، بۍ
خەریکی ئیرشاد، ڕای هیدایەت، بۍ
نیزام دەهندەی، گرد بۍ نەزمان، بۍ
جە ئەوەلین پەنج، ئەولول عوزمان، بۍ
تاکە هەفت سەڎ ساڵ، جە عومرش ویەرد
عەمری وېش، نەڕای، گومڕاهان سەرف کەرد
بەعزێ، بەو حەزرەت، ئیمان، ئاوەردەن
ما باقی، یەکسەر، سوحبەت، مەکەردەن
قەومی بۍ ئەندېش، بۍ حەیای بەڎنام
پەشت کەردەن، وە (نووح)، ڕوو وە لای (ئەسنام)
چوون جە تایفەی، توخمی قابیل بین
جە مەکری شەیتان، خەیلێ عامل بین.[1]