داستانو حەیدەر و سنۊبەرې
بەشەی یاڼزەهەمە
حەیدەر سەوقاتیەکەو سنۊبەرېش گېڵناوە، ماچۊ من پیێوە خانەڎانەنان، پەنەۋازیم بە زەڕی نیەن، موڵکو شا عەباسی ئینا وەردەممەنە، من تەنیا عەشقو سنۊبەرېم گەرەکەن:
حەیدەر بەگ واتش، ئەی حۊری جەمین
عەرزش مەسمووعەن، ئەو شۊخی شیرین
بەڵام خوانی زەڕ، بەرەوە دما
عەرز کەرە پا بۊس، ئەو حوری لەقا
جە یۊمنی ئیقباڵ، پادشای ئېران
باشی باڵادەس، گشت نەڕە شېران
ماڵم ئەفزوونەن، جە گەنجی قاروون
شوکور موحتاجی، بە زەڕ نەداروون
ئەوەڵ، جە سایەی جوققەی شا عەبباس
جە لام بې حەدەن، یاقووت و ئەڵماس
دوەم جە ئەڵتاف باڵای سنۊبەر
فراوانم هەن، گەنج و ماڵ و زەڕ
بەڵام ئەو جە لای موخلیس نەوازیی
جە موڵکی ئېران، پەی سەر ئەفرازیی
ببۊ وە مېهمان، بەندەی کەمتەرین
بە یادی دەوران فەرهاد و شیرین
ئەڵبەت شنەفتەن، چن جارێ شیرین
بییەن، وە مېهمان فەرهادی مسکین
ئەر ئەو زیادەن، شیرینی ئەرمەن
ئېمەیچ فرە کەم، فەرهادی کۊکەن
بەڵکم جە ئەڵتاف باڵاو ڕووی دوڵبەر
جەمینی باڵای ڕەعنای سنۊبەر
ئاوا بۊ، یانەی، وېرانەم ئەمشەو
ساکن بۊ، دڵەی دېوانەم ئەمشەو
با گیانی شیرین، پایەندازش کەم
ڕۊحم وە پېشکەش، خەمزە و نازش کەم
مەبۊ وەلحاسڵ وەنەم بۊ مېهمان
پەی سەر ئەفرازیی شېرانی ئېران. [1]