باخچێوە بېگەرد
ئاماڎەکەرڎەی: ئەسعەد ڕەشید
بەشۍ هەژدەهەمە
میرزا ئۆلقاڎر، بەردەوامەن جە وېناکەرڎەی و نیشاندای سەرەکاتو تاقیکەرڎەیۆ ئیبلیسی، کاتێ تەکەببوری ناست ئەمرەو خوڎای جابەجا بکەرۊن بە سوجدە بەردەیش پەی حەزرەتو ئاڎەمی، تاکو خوڎای تۊقەو لەعنەتیش کەرڎە ملش:
ئاخر داناییش بی بە نادانی
مەحرووم بی جە فەزڵ، زاتی سوبحانی
بی بە لەعنی تەوق، شیی وە گەردەنش
جەفاو جەورو غەم، عەبەس بەردەنش
قاپی هیدایەت، بەهەشت لېش ژنیا
نامەی بەڎ نامیش، جە عالەم ونیا
جارێ با لەعین، عەدووی کینەکېش
هەر تەقەش مەبۊ، چەنی تەوقی وېش
خوڎا وە ئاڎەم مەیلی هەم جەفت کەرد
حەوا، جە لای چەپ، ئاڎەم بەر ئاوەرد
عەقدش کەرد، جە عەرش، عەشقش دا پېشان
مەشغووڵ بین وە عەیش و شاڎیی وېشان
وە ئەمری بېچوون، بینای لا مەکان
داخڵ بین هەردوو ڕەوزەی ڕېزوان
پۊشان وە باڵا، حەریری بەهەشت
چەنی فریشتان، مەکەرڎەن گوڵ گەشت
حەقق فەرما، ئەلیەوم، سروشتەن وە خاک
عادی مەکەن نەفس، وە خورد و خوراک
نەفسی هەوڵناک، نەدارۊ قابل
یەک دانە، گەندم، نەکەن، تەناول
بەرز نەبۊ سەدای، بۍ مەجازیتان
شەیتان جە ناگاه، نەدۊ بازیتان
بەرشۊ جە لاتان، هەوای نەفسانی
یە بین، بە فرقەی، ئەهلی ڕوحانی
واتشان بەل، ئامانەن سەددەق
موتیعم وە ئەمر، قەتعی ڕەزای حەقق.[1]