نۋیستەی: ئاکۆ مارانی
11و ئەپڕیلو 2017
مانیفێست-کەرڎەو ڕاۋەبەری ناوچەو ھۆرامانی
ڕېکۋستەی و ڕاۋەبەریی ھەر کۊمەڵېۋې تایبەتمەڼیی وېش ھەن و ڕەنگۆدای پەیۋەڼییە کۊمەڵایەتییەکا و پېکئامای کۊمەڵایەتیی ئا کۊمەڵې ھەن؛ سەرو ئا بنەمێ، کۊمەڵې خېڵەکییە و پەیۋەڼییە کۊمەڵایەتییەکېش سەرۊکخېڵ و تفەنگچیې سەرۊکخېڵی و ڕەشەخەڵک موازۊ، بە واتێۋە تەرە، ڕېکۋستەی و ڕاۋەبەریی خېڵەکی - سیستەمی فیئۆدالیستی موازۊ، ھەر پاسە شار و کۊمەڵې چینایەتییۊ ھەرمانبەری و بۆرجوازی، دۆڵەت و دەزگەی پۆلیسیی و زیڼان و ئەشکەنجە و ھامشاری و ھاموڵاتی ملکەچ موازۊ. ۋەرانۋەرو ئاڎېشاچۆ کۊمەڵې ئازاڎە یان شار و دەگا ئازاڎەکې ڕېکۋزیا و ڕاۋەبەریی ئازاڎ موازا، کە ڕېکۆتە کۊمەڵایەتییەکې و یاسا سرۇشتییەکې با بە سیستەم و یاسا و بنەماو ڕاۋەبەریشا و بەس چنی سیستەمو دێمۆکراسیی ڕاسەۋانە یان وېڕاۋەبەریی کۊمەڵایەتی گونجېیا.
ئەر ئېمە بېلایەنانە سەرنجو ۋەڵېنەو (مێژۇ) ھۆرامانی بڎەیمې و گەرەکما نەبۊ لاسایی کۊمەڵەکا دۆروبەری کەرمېۋە و ۋەڵېنەی دۆڵەتمەداری پەی وېما نەسازنمې، ناوچەو ھۆرامانی فرەتەر ئازاڎ-شار و ئازاڎ-دەگا بېیەن و ھەر یاگېۋو ۋەڵېنەو ھۆرامانینە سیستەمی دەسەڵاتداری| دۆڵەتسالاریی بېیەبۊ، یان ۋەرەنجامو نمایەڼەیی داگیرکەرا بېیەن، یان ۋەرەنجامو ۋەرەنگاری ھەڵمەتۊ دۆروبەری بېیەن، کە بە ساچیای چنی دوژمنو دوژمنی، جەنگاۋەری ئازا و سەرکۆتە کریان بە سەردار و سالار. پەی ئانەیە کە بە تەمامیی پەی ئېمە بەرگنۊ، کە پېکئامای کۆمەڵایەتیی ھۆرامانی ڕیکۋزستەی دەسەڵاتدارانە| دۊڵەتگەراش ھۊرنەگېرتەن، متاۋمې سەرنجو یەرې چېۋا بڎەیمې:
یەکەم : دەرەبەگایەتی چە ھۆرامانەنە ۋەرەنجامو پېکئامای خېڵەکی نەبېیەن، کە پېکئامێۋی چینایەتی ھەن و خۊبەخۊ سەرۊک و ملکەچ سەپنۊ، بەگەکې یان دەسکەلاو سەفەوییەکا بېیېنې یان دەسکەلاو ئوسمانییەکا بېیېنې و فرەتەر دەفتەرداری| باجسانې ئیمپڕاتۆرییەکا بېیېنې، ھەر ۋەرو ئانەیچە بېیەن، کە بە بەگە ڕۇتې ئەژناسیێنې و خودو ۋاچەو (بەگ و بەگلەر)ی سەرچەمېۋی زۋانی تورکیشا ھەن.
دوەم : سەرو بنەماو ئانەیە کە ماچا چە ھۆرامانەنە جۊریۋ چە دێمۆکراسی و ڕاۋەبەری دێمۆکراسی بېیەن و ئاماژە بە ورڎەکارییەکاش مڎا [ھەرچڼە من چنی نامەنېیایش بە ژیرلەو مەرې ناکۊک ھەنا و ژیرلەو مەرې کەسایەتی بېیەن، نەک سیستەم، سیستەمو ھۊرۋچناکەی پارلەمانی نەبېیەن، بەڵکو بە جۊرو دێمۆکراسی ڕاسەۋانەی| کۊنیشتی گەلییانە بېیەن؛ چۇنکە ھەم کۊنیشتی گرڎینەو خەڵکیینە ئەنجامدریان و ھەم وېھۊرۋچنای و ھۊرۋچنای ڕاسەۋانە بېیەن و ھۊرۋچیێکې یاگەگیرو خەڵکی نەبېیېنې، بەڵکو ئەنجامدەرې بڕیارەکا خەڵکی و بەدیئاۋەری پەنەۋازییەکا خەڵکەکەی بېیېنې؛ کەسېۋ|کەسېۋە کە خەڵکی| دەنگدەرا ڕاسەۋانە دلې کۊنیشتی گرڎینەینە ھۊرۋچنابۊ، بەدڵنېیاییۆ مشیۊ ھەر ئا خەڵکە یان ھۊرۋچنې تاۋابۊشا کەسە ھۊرۋچیاکەی لابەرا. ھەر پېسەو دێمۆکراسی ڕاسەۋانەو [ڕیکۋزتەی و بڕیاردای وارۆ پەی سەری] یۊنانی کۊنی، نەک سیستەمی پارلەمانی، کە بە زۊردارەکی نامۊ دێمۆکراسیش باڵارە بڕیێنە و کریان بە دېۋجامەو دێمۆکراسی، تاکو دێمۆکراسی ڕاستینە [وېڕاۋەبەریی کۊمەڵایەتیی] چە ۋیرو خەڵکینە بەرکریۊ و شېۋیۊ، ھەر پا جۊرە کە چی سەردەمەنە ئېمە ۋینمې، کە دەسەڵاتی سەپیاو مشەوەرە ڕامیارەکا و سەرمایەدارەکا بەنامو ڕاۋەبەری خەڵکی [دێمۆکراسی] بە خەڵکی ئەژناسنیان.
یەرەم : چە ناوچەو ھۆرامانینە بەس ئا کاتې ڕاۋەبەریی کۊمەڵې شېۋەو دۆڵەتداریش بېیەن، کە ناوچەو ھۆرامانی کۆتەن چېرو دەسو داگیرکەرا، کە سیستەمو دۆڵەتەمەداریی پاشاییشا بېیەن و بەپاو ڕېکۋزستەو سیستەمی ئیمپراتۆرییەکەیشا، دەسەڵاتدارەکې ھۆرامانی نمایەڼې دۆڵەتمەداری ئیمپراتۆرەکا بېیېنې. ئەگینا سەردەمەکا بەرو داگیرکریاینە ناوچەو ھۆرامانی وېڕاۋەبەریی ئازاڎ-شار و ئازاڎ-دەگایشا بېیەن. ھەر ۋەرو ئانەیە تەنانەت چە ئیسەیچەنە، کە ناوچەو ھۆرامانی چېردەسو دۋې دۊڵەتا ھەن، ئەر پارتییایەتی و فەرمانداریی ئا دۆڵەتا چە دەگاکا ھۆرامانینە لابەرمې، ژیۋای و ڕېکۋستەی و ڕاۋەبەریی دەگاکا توشۇ گرفتاری نمەبۊ، چۇنکە ھەڵای کولتۇرو خەڵکو ھۆرامانینە بنەماکې ھەرەوەزی و ئاشتەۋایی کۊمەڵایەتی و پېۋەرەژیۋای و وېکۊمەکیې کۊمەڵایەتی مەنېنې، کە دماینەو سیستەمو ئازاڎ-شاری| ئازاڎ-دەگای بېیەن و ھەن.
چە ئیسەنە سەربارو ئاڵۇڎە-بېیەو ئاۋەزو فرەو کەسە ھۆرامەکا بە ڕامیاریی و پارتییایەتی و ئاراستەگەریی ئایدیۆلۆجی و ڕامیاریی-کەرڎەی ۋیرۆکەرڎەی و بڕۋای ئایینیې، ھەڵای بنەماکې ئازاڎ-شاری|ئازاڎ دەگای بەشېۋەنې چە ئاۋەزی کەسیی و کۊمەڵایەتیی ھۆرامەکا. سەرو ئا بنەمێ ئېمە چی ڕۊزگارەنە بە ئەۋەگېڵای پەی سەرو ۋېیەرڎەی ڕاۋەبەریما، کە ڕېشەی کولتۇرییش ھەن، متاۋمې وېما چە تەنگەلاییە ڕامیاریی و ئابۇرییەکا ڕزگارکەرمې و سیستەمېۋی ئازاڎ و یەکسان و داڎپەروەر پەی وېما ڕیکۋزمی و بەدیبارمې.
پەی ئانەیە، کە ھەنگام بە ھەنگام سیستەمېۋی چامنە بۊۋە بە بەشېۋ چە ئاۋەز و کولتۇری کەسیی ھۆرامەکا یان کەسانېۋی کە چە ناوچەو ھۆرامانینە مژیۋا، پەنەۋاز ھەن، کۆمەڵېۋ ھەنگامې سەرەتایی بنیەیمې و پایەکا ئا سیستەمەیە، کە ڕیکۋزیا کۊمەڵایەتیی و کولتۇریی و جەماوەرییەکې پېسەو ئەنجۇمەنی و شورێ و ھەرەوەزی و کۆمونې ھەنې، ڕېکۋزمې و کەرمېشا بە یاگەگیرو سیستەمی ملھوڕانەو دۆڵەتی، کە بېژگە نەھامەتی و دۋەبەرکی و ستەم و ملھوڕیی ڕامیاریی و پارتییایەتی و قاڵبدای ئایدیۆلۆجیی ھیچی تەرش پەی کۊمەڵۊ ئېمە و ھەر پاسە تەمامو کۊمەڵەکا جەھانی بەدیناۋردەن، بەڵکو چانەیچە زېیاتەر ڕۊبەڕۊ ئېمە چە بېیەی و بنەما کولتۇریی و ڕاۋەبەرییە مرۊڤییەکا وېما دۇرې ۋزۊۋە و ھەر کەسېۋی ھۆرامی-زۋان کە بە جۊرېۋ سەردەمو ۋەڵې سەرھۊرڎای پارتییایەتی و زاڵ-بېیەی سەراسەریگیریی سیستەمو دۆڵەتیش ۋیرمەنەبۊ، یان ئەژنەۋیەبۊ، متاۋۊ کەسایەتی و کولتۇرو کەسەکا ئیسەی و کەسەکا ھیزی بەراۋرڎ کەرۊ .
نەۋاچیا نەمەنۊ، نە ڕېکۋیێکې سیستەمی سرۇشتیی کۊمەڵەکا ھیزی بەبې خېیاڵ و ئارەزۇ و گەرەکبېیەو [ئیرادەو] ئەڼاما کۊمەڵەکا بەدیئامێنې و نە ڕېکۋستەی سیستەمی ڕامیاریی کۊمەڵەکا ئیسەی بەبې دلېنەبەرڎەی خېیاڵ و ئارەزۇ و گەرەکبېیەو [ئیرادەو] ئەڼاما کۊمەڵەکا بەدیئامان و سەپیان. سەرو بنەماو ئا ئەزمۇنگیرییا، ئەگەرو ڕزگاربېیەی مرۊڤایەتی چە سیستەمو سەروەریی چینایەتی [سیستەمی دژە-مرۊڤایەتی و دژە-ژیۋاریی و دژە-سرۇشتیی] پابەڼو کۊششی کۊمەڵایەتییانەو ئەڼاما کۊمەڵەکا بېیەن و ھەن، کە ئەزمۇنەکا ۋەرەنگاریی ۋەڵېنەیی کۊمەڵەکا سەرانسەرو جەھانی سەلەمنان و پېسەو کۊمەڵېۋ وانې.
ھەنگامە سەرەتایی و بنەڕەتییەکې ئەۋەگېڵنای و ڕېکۆۋزتەی وېڕاۋەبەریی کۊمەڵایەتیی کۊمەڵە سرۇشتییەکا:
- درۊسکەرڎەی گروپەکا ھامکاریی و ھەرەوەزیی کۊمەڵایەتی دۇر چە دەسەڵاتو پارتییە ڕامیارییەکا و ھەژمۇنو ئاراستە ئایدیۆلۆجییەکا و وېسەپنای فەرماندارییەکا و کۆمپانییەکا و دۊڵەتەکا.
- درۊسکەرڎەی ئەنجۇمەنەکا ڕاۋەبەریی کۊمەڵایەتی سەرو بنەماو پەیڕەۋکەرڎەی دێمۆکراسی ڕاسەۋانە|وې-بڕیاردای خەڵکی.
- ھۊرۋچنای ئەڼاما ئەنجومەنەکا سەرو بنەماو شارەزایی و تواناداری و دڵسۊزی و ئەزمۇنداری.
- ڕېکۋستەی ڕاۋەبەریی دەگایا و شارەکا سەرو بنەماو وېڕاۋەبەریی گروپە جەماوەریی و کۊمەڵایەتیی و ھەرەوەزییە کارە، یان پېکئاۋرڎەی ڕاۋەبەرییەکا چە ڕاو ئاڎیشاۋە.
- ئەڼامې ئەنجۇمەنەکا و ئەنجۇمەنەکې نمایەڼې ڕاسەۋانەو خەڵکی با، نەک یاگەگېرو خەڵکی و نمایەڼەیی ھەمیشەیی؛ نمایەڼەیی چە وېراۋەبەرییەکانە کاتیی و بېلایەنانە و بەبې بەرتەریی کریۊ.
- ئەڼامې ئەنجۇمەنەکا و ئەنجۇمەنەکې، دەسەڵاتدارې و بڕیاردەرې نېیەنې و ن.مەبا، بەڵکو ئەنجامدەرې داوازیا و بڕیارەکا خەڵکی ھەنې، کە دلې کۊنیشتە گرڎینەکا خەڵکینە گرڎو خەڵکی سەرشا بڕیارەمڎۊ و پەی ئەنجامدایشا ئەڼامې ئەنجۇمەنەکا و ئەنجۇمەنەکې هۊرۋچیا و دەسنیشانې کریا.
- ئەڼامې ئەنجۇمەنەکا ئازاڎې ھەنې چې ۋیرۆکەرڎېۋی ڕامیاریی یان ئایینییشا ھەن، بەڵام مافشا نېیا، ۋیرۆکەرڎەی و ئاراستەی ڕامیاریی و ئایینیی وېشا سەرو خەڵکییەرە سەپنا، یان تېکەڵو ھەرمانې و چالاکییەکا ئەنجۇمەنو ڕاۋەبەریی کەرا.
- گرڎو ئەڼاما ئەنجۇمەنەکا چە کۊنیشتی گرڎینەو خەڵکینە ھۊرۋچیا و ھەر کات ھەر ئەڼامېۋ چە ماۋەو ئەڼامەتیشەنە ھەرمانې یان چالاکی و بڕیارې نادرۊسی کەرۊ و بڎۊ، خەڵکەکە داۋاو کۊنیشتی نائاسایی ئا یاگې کەرۊ و ئەڼامەکەی لابەرۊ و ئەڼامېۋی تەر پەی ئەنجامداو ئا ھەرمانې، کە بە ئەڼامی ۋەڵینې ئەسپاریێنە، دەسنیشان کەرۊ.
- پەی ھۊرسەنگنای ھەرمانکەرڎەی و خزمتەکەرڎەی ئەنجۇمەنی و ئەڼامەکا ئەنجومەنی، گرڎ شش مانگېۋ جارېۋ یان ساڵېۋ جارېۋ کۊنیشتی گرڎینەو خەڵکو دەگاکا یان گەڕەکەکا شاری کە ئەنجۇمەنەکەشا چنە ھۊرۋچیان، ئەنجاممڎریۊ و چا کۊنیشتە جەماۋەرییەنە بڕیارې تازې مڎریا و بە ئەنجۇمەنی مسپاریا و ئەنجامگیریی بڕیارە ۋەڵینەکا کریۊ و ھەر پاسە ئەرکو ئەڼاما ئەنجومەنی تازەی یان ئەڼامە تازەکا دەسنیشان کریۊ.
- دماو ھۊرۋچنای و دەسنیشان-کەرڎەی ئەنجومەنو دەگاکا | گەڕەکەکا شاری ئەنجۇمەنی ناوچەیی گرڎو دەگاکا|سەرتاسەرو شاری ھۊرۋچیۊ و ھەر پاسە ئەنجۇمەنی باڵا یان سەرتاسەریی ھەر ھەرېمېۋی وېگەرڎانی [وېڕاۋەبەریی کۊمەڵایەتی] چە نمایەڼە ھۊرۋچیایا گرڎو ئەنجۇمەنە ناوچەییەکا دەسنیشان کریۊ.
- بڕیاردای سەرو دەسۇرو ڕاۋەبەریی و دەسنیشانکەدەی سیستەمو ڕاۋەبەریی پېسەو ھەر بڕیارېۋې تەرې مافو گرڎو خەڵکی ھەن و دلې کۊنیشتە جەماۋەرییەکانە چە بارەش بڕیارە مڎریۊ.
- بڕیاردای سەرو جۊرو سیستەم و پەرۋەرڎەی و وەنەی و ئاماڎەکاری پیشەوەریی، پەی گرڎو خەڵکې و کۊنیشتی گرڎینەو ئەنجۇمەنەکا و بەشداری شارەزایا ئا بوارا گېڵۊۋە. پەی نمۇنەی خەڵکی یان ئەڎا و تاتەکې چنی مامۊسایا ئازاڎې ھەنې، کە جۊرو ڕاۋەبەریی فېرگاو زاڕۊڵەکاشا و سیستەمو وەنەیشا چنین ھەن و مشیۊ چنین بۊ، دەسنیشان کەرا.
- سیستەمو ڕېکۋستەی خزمەتگوزارییە کۊمەڵایەتییەکا و ھەر پاسە گرڎو بوارەکا تەرو ژیۋای و پەنەۋازییە گرڎینەکا خەڵکی پەی گەرەک-بېیەی و ئارەزۇمەڼیی خەڵکی گېڵۊۋە و ئەنجۇمەنە پایەیی و سەرتاسەرییەکې تەنیا مافو ئەنجامداو بڕیارەکا خەڵکیشا ھەن.
- بەھرەمەڼیی خەڵکی چە خزمەتگوزارییەکا بە بەشداری و کۊمەکو خودو کەسەکا پەیوەست ھەن، چە سیستەمی کۊمەڵایەتی خزمەتگوزارییەکانە چڼ بەشداری و کۊمەک کەرا، ئاڼە بەھرەمەڼې با، ھەڵبەتە کەسانې ۋنەقۊمیێ و کەمئەڼامې و نەوەشې و زەیسانې بەبې ھیچ مەرجېۋ مافو بەھرەمەڼ بېیەیشا ھەن و مشیۊ پەنەۋازیی و ناچاریی کەسەکا ۋەرو چەما گېریۊ.
- پارتییایەتی و چالاکی ڕامیاریی و ئایینداری چە سیستەمو وېڕاۋەبەریی کۊمەڵایەتی جېیا ھەن و پېسەو حەزی و ئارەزۇمەڼیی کەسەکا مەنۊۋە و بە ھیچ جۊریۋ ن.مەبۊ چنی ڕاۋەبەریی کۊمەڵې تېکەڵ کریۊ. ھەر کەس ئازاڎ ھەن، کە سەر بە چ پارتییۋ، ئایینېۋ بۊ و چ حەزېۋی کەسیی وېش بۊ، بەڵام ھیچ کەس پەیش نېیا، حەزە تایبەتەکا وېش سەرو کۊمەڵېرە سەپنۊ، یان کەسانې تەرې بە ئەنجامدای و پەیڕەۋکەرڎەی حەزەکا وېش ناچارې کەرۊ. ھەڵبەتە ئانەیچە ڕۆشن بۊ، کە ئازاڎی ۋیرۆکەرڎەی و جېیاۋازی باۋەڕی بنەمێ سەرەکییې وېڕاۋەبەریی کۊمەڵایەتی ھەنې و مشیۊ با.
- یۊگیرتەی ھەر ھەرېمېۋی چنی ھەرېمېۋی تەری، یان جېیابېیەی ھەر ناوچېۋی چە ھەرېمېۋی، بەس سەرو بنەماو ڕاپەرسیی گرڎو خەڵکو ئا ھەرېمەیە یان ناوچەیە چە ڕاو کۊنیشتی ئاسایی یان نائاسایی ئەنجۇمەنە پایەیی و سەرتاسەرییەکاۋە بڕیارمڎریۊ، ئەرنا ھەر کۊششېۋ پەی جېیاکەرڎەی ناوچېۋی یان لکنای ھەرېمېۋی گنۊنە خانەو پیلانگێڕی ڕامیاریی دژو خەڵکی.
- سیستەمو وېڕاۋەبەریی کۊمەڵایەتی ڕېکۋزیا سەرو بنەماو بەشداریی ڕاستەۋانەو خەڵکی، تەمام پېچەۋانەو سیستەمی پارلەمانی|دۆڵەتیی ھەن و بەس سەرو بنەماو یۊگېرتەو ئەنجۇمەنە ئازاڎەکا، شورا ئازاڎەکا، ھەرەوەزییە ئازاڎەکا، گروپەکا یاگۊ ژیۋای و ھەرمان-کەرڎەی مەرزیۊرە و بە کۊنیشتی گرڎینەو خەڵکی و بڕیاردای ڕاسەۋانەو خەڵکی پەشتی بینۊ و گرڎ بڕیاردایېۋ یان ڕېکۆتېۋ بە ڕەزامەڼیی خەڵکی سەرو بنەماو ڕاپەرسییە گرڎینەکا مڎریۊ و ھەر بڕیارداییۋ یان ڕێکۆتېۋ سەرو بنەماو پارتییایەتی و فەرمانداریی و دۊڵەتی ڕەۋاییش نېیا و دژو سیستەمو وېڕاۋەبەریی خەڵکی بۊ.
- ئا بنەمێ و ھەر بنەمێۋې تەرە، کە چنی پېکئاۋرڎەو سیستەمو وېڕاۋەبەریی کۊمەڵایەتی سەرو بنەماو دێمۆکراسی ڕاسەۋانەی گونجیۊ و بە یاۋای بە مەرامەکا خەڵکی خزمەتکەرۊ.
- ....تد .
------------------------------------------
وەنەرې بەڕێزی، پەی ئەژناسای پیتە تایبەتە ھۆرامییەکا دلې ئی نۋیستەیە، سەرو لینکو پیتەکا کلیک کەردې:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ې: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]